Tulai Kawlgam Gamthu In Koilam Manawh Hiam? Bob Tuangpi Abeisa 2015 gambup kiteelpi pan hong kah kumpi thak NLD in gambup uknaza hong neih zawh kum (2) bang hong cing ding hita hi. Hih hunsung ah amasa kum (5) gamukza sem Thein Sein makaih USDP kumpi maban bang teng gamsung ah kikhelna (Political change), gamsung kilemna (Peace process/Union Accord), gamsung mite nuntak khuasak zonna (Socio-economic & Job creation leh leitung gamdangte tawh kizopna (Foreign policy/International Relation) ah bang dinmun ciang tungta hiam cih etna tomkim kong kum nuam hi. Gamvai Kikhelna (Political Change) Abeisa 2010-2015 hunsungin gamvai kikhelna nasiatak kinei-in leitung bup in lamdang sakna mit tawh hong en uh aa khutbetna tawh hong muakciat uhhi. Nisuahna gamlaite khanlawhna (Arab spring) khit ah amasa pawlin hong kiciamteh-in Kawlgam khuakhalhuih (Myanmar spring) ci'n ki minthang vangvang hi. Tua zah khop mah in gams...