Neisok paak leh Zogam

Neisok paak leh Zogam

Kapteel   11:32:00 AM

Neisok pak kamuh sim in ka lung sim sung ah Vaphual tawh ka gawm a, aging khia lo ka lung sim tawng pan in Zomi ka hihi. “Z - Zomite hanlungciam khangto diam” ka ci kha den hi. A khan khiat na ding mun khuavot mahmah, huih khuah mahmah in guah si tawh ki dim den mual sang dawn. Singkung dang bang mah apo zawh loh na mun Thang mual dawn. A khauh mahmah huih vot in atawntung in mut vengveng mah ta leh thuak zawh na tha a nei veve Neisokpak. Apo na mun ah panmun kip tak leh hangsan tak in la ahih man in khua hun bang zah ta in sia ta leh Awlmawh se lo hi. 

Huih mut na tawh apak kia cih om se lo in akungpi tawh kip tak in sawt pi tak aki zom hi. Ausan lihleh in a en khem peuh lung sim la ahih man in tua pak ki lo nuam vanvan hi. I tuan na mawtaw ei thu a aki khawl sak thei hi leh khawl sak pak in tua pak palh khat beek lawh ding ki lung gulh mahmah hi. It huai in i lungsim sung ah aki gen thei lo lungnop na khat hong pia ahih man in a en mi khem peuh in lung nop na ngah hi. Huih sung ah a leng mang ding a namtui gim aneih loh hang in a nam sia gim zong nei tuan lo hi. Zing sang pak in nitak avul pah nam te hi lo in sawt pi tak akiim apametlawm sak pak nam ahi hi. 

Hoih cihtak in hoih ahih man in hoih cih sim loh gen dan ding kammal dang siam leng ka ut mahmah hi. Tulaitak England gam mun khempeuh ah neisokpak te palh ahih man in agam etlawm sak mahmah hi. Lamgei singkung dang te kawm pan in etlawm takin hong pal khia hi. Mangbuh lo kawmkil pan in nuih mai sa in hong en hi. Mi te khawnawl, dai kawm pan in hong maitai sim hi. Zogam Neisok zah in a mel san selsal lo ahih manin Zogam neisokpak zah in hoih ka sa kei hi. Kawl te’n neisok pak tammuh lo ahih man in neisok pak hoih na athei kei uh hi. Thu sim lo in en neu kha uh hi. 

Mikang te in amau kiang ah tua sang hoih asak zawk uh pak om ahih man hiam ahi kei leh amau kiang a neisok pak te hoih zo lo hiam bang hang hi ding hiam na thupi bawl lo uh hi. Mite in athusim loh hangin ahoihna akiam tuan lo neisokpak. Mite in ahoih na atheih loh hang in a khasia tuan lo neisokpak. Leihoih na ah po in leisia na ah po taleh pha mawh asa selo neisokpak. Huih sia guah sia bangbang hong pai taleh thauk zawh na tha anei neisokpak. Singkung dang in dep cip taleh ahun ciang apak khai veve nei sok pak. A it huai Neisokpak aw na hoihna cikmahun in tai ngei lo ding hi. Na han ciam na khah suah ngei kei in. 

Nang hong mu ngei lo te in na hoihna atheih loh hang in ni khat ni ciang hong mu ding uh a hoih hong sa veve ding uh hi. Nang hong dep a om hang in phu khia in pak veve na hih manin mite in na hoihna hong mu uh hi. Mi te’n lonawl ah et loh in hong koih hang in dai kawmpan nuih mai tawh na hoih na lakkhia veve na hih manin ka ki pak hi. Na neisokpak pih dangte phu kha ke’n la na kiim a singkung dangte sang in athuk zaw in zung kha den in. Amau dawn tuite na thahat na ding in dawn in. Na hiang leh na teh tawh deep in la, na geina bang in amau sang a hoih zaw in pak den ta in.

Zomi aw na hoih na leh na hahkatna khah suah kei in la lung kia lo in mai nawt veve in!Khantoh ding a lam en 

SB Dongbawi 
(tawmveisung)
London