Thumapi: Theihkholhna ( Awareness ) chih thulu a nei a April 14, 2015 ni a ka thugelh, Lamka pansan niteng thukizakna leh Social Networks khenkhat ah suah in om hi. Tuni in hiai thu toh kisai mah thulu a nei in bangzah hiam gelhnawn le’ng i chi ahi. Theihkholhna ( Awareness ) hilhchetna i piakdan pen kibang vek lou diing in ka koih hi. I gennop pentak ahihleh mailam hun hong tung diing toh kisai thil bang hiam mengmuhna kichian nei a, nasep-silbawl khat peuhpeuh Pilsinna ( Awareness ) nei loupi a lohchinna om thei lou diing ahi chih gennuam i hi. Ei pau a, ‘ Pilsinna ’ ahihke’h ‘ Theihkholhna ’ kichi kammal omzia pen Mangkang pau a, ‘ Awareness’ kichi kammal toh agennop kibang leh kikim diing in ka koih hi. India Prime Minister, Shri. Narendra Modi in August 15, 2014 - Independence Day ni a athugenna ah, New Economic Policy, “ Make in India ” kichi puangkhe ziahziah mai hi. Gamdang akipan sumsin mite atam theipen India a laklut a, huchia sepna tuamtuam tampi piansak diing tup...