သမိုင္​း

Theme images by Storman. Powered by Blogger.

Text Widget

Sports

Gadgets

Blog Archive

Travel

Definition List

Friday, March 21, 2014

IMEI nambat tawh na phone sung thu na telnop leh


International Mobile Equipment(IMEI) tawh na phone sung thu a kim in og hilh di Website ong pia sawn ing.
Na IMEI nambat pen *#06# tawh na meek in. A zenzen in na lock Screen lock a kiat leh Battery phel in en lteh zong ki lang ding hi.


Address pen IMEI Info ah mek in na sit in.
Waranty leh Unlock te zong ki check thei hi.

Thursday, March 6, 2014

Assemblies of God Pawlpi Piankhiatna Thu

Assemblies of God (AG)
Assemblies of God (AG) pawlpi tangthu pen kum zalom 19 na kiim tan kikan thei hi. Tua hunlai in leitung mun tuam tuamah khanlawhna (revival) nasia takin om hi. Cina damsakna leh kamtuam paunate piang hi. Assemblies of God Pawlpi kipatna bek thamlo in Pentecostal movement piankhiatna tawh kisai thu-ah Charles Parham pen mi masa khat ahi hi. Ama’ thuhilhnate in Pentecostal upna naakpi takin khangsak hi. Amah pen Pentecostal upna tawh kisaia Pawlpi masa pen ‘Apostolic Faith Church’ phuan khiapa hi. Topeka, Kansas ah Bible School bawlin tua ah mi tampi Pasian’ thu sinsak hi.

Charles Fox Parham
Charles Fox Parham (1873-1929)
Atangthu kim : 
http://www.revival-library.org/pensketches/am_pentecostals/parham.html

Kum 1900 lungdambawl ni-in Parham in a sangnaupangte kiangah Lai Siangtho sim ding leh Khasiangtho tawh kituiphum cih Laisiangtho’ genna theitel dingin sawl hi. January ni 1, 1901 in Topeka-ah thu-nget khawmna om hi. Tua ah khasiangtho tawh kituiphum cih pen kamtuam pauna tawh kilang hi. Topeka munah khanlawhna naakpi takin tung hi. Tua khanlawhna in Missouri leh Texas bek tham loin California na-ngawn lawhsawn hi. Tua huhau in leitung mun tuamtuam a Pentecostal upna a neite kum thum sung (1906-1909) Revival Meeting nei dingin Azusa Street Mission, Los Angeles, California ah paikhawm uh hi.

Kum 1914 April 2-12 sung Hot Springs, Arkansas ah Pasian’ naseemte ki muhkhopna om hi. Tua mun ah Pasian’ naseem mi zathum (300) paikhawm thei uh hi. Pentecostal upna nei teng kipawlkhopna khat bawl ding khensatna om  hi. Tua panin Assemblies of God pawlpi hong piangkhia hi. Chairman dingin Eudorus N. Bell leh Secretary dingin J. Rosewell Flower teel uh hi. Tua khit kum 1915 ciang in “Jesu bek” a ci Pawl hong om hi. Tua pan in Pawlpi ka-in, thum gawm Pasian (Trinity) a sang zolo “Oneness Pentecostal” te 1916 ciangin paikhia uh hi. Pawlpi mi kiam mahleh a nung ciangin hong khang kik hi. Kum 1918 ciangin Assemblies of God pen Pawlpi kip leh muanhuai mahmah khat hong suak thei ta hi.

Leitung gam tuam tuama AG pianna thu gelh khit zawh ding hi lo ahihmanin continent tuam tuamah khen in tua pan a baih a ka muhpak teng a tom in hong gelh mai ning.

NORTH AMERICA

I theihsa mah bangin leitung mun tuam tuam a Pentecostal upna neite paikhawmin North America Continent huam sung USA ah AG pawlpi phut uh hi. USA gam sungah Pawlpi hong khang sem sem hi. Kum 1918 khitciangin Assemblies of God phualpi (General Headquarter) dingin Springfield, Missouri (USA) kizang hi. Tua pan in Gospel Publishing House tungtawn in Pentecostal upna hong taangko uh hi. Missionary nasepna tawh kisai in kum 1914 in Home and Foreign Mission Presbytery kiphuan hi. Kum 1915 ciangin kivaipuak leh nasep zia ding Dan (Law) kician takin kibawl hi. Kum 1919 ciangin nasepna a tangzai zawk nangin Foreign Missions Department kiphuan kik hi. Kum 1919 khitciangin Pentecostal Evangel kici thukizakna pen Pentecostal upna tangkona pipen hong suak hi. Kum 1920 ciangin Assemblies of God pawlpi in Aubum, Nebraska ah Midwest Bible School phuan khia hi. Kum 1922 ciangin AG munpi Springfield ah Central Bible Institute kiphuan leu leu hi. Kum 1937 ciangin Assemblies of God pawlpi in Home Missions Department phuan hi. Kum 1940 kiim in Assemblies of God pawlpi mi 76,000 American galkap sungah om uh hi. Mi 1,093 kidona ah si uh hi. Tua panin AG pawlpi in galkap sungah Pasian’ nasep kipan in kum 1944 in Servicemen’s Department kiphuan hi. US galkap sungah AG Pastor 34 bang om thei uh hi. Kum 1940  in Youth Department zong kiphuan hi. Kum 1945 ciangin General Council ten Radio Department hong phuan khia uh hi. Radio pana hun zatna masa pen kum 1946 in kinei hi. Kidona man khitciangin Assemblies of God pawlpi pen miten thei in khang semsem hi. Khalam nasepna tawh kisai Evangelism Committee kum 1965 in kiphuan hi.  Kum 1950 ciangin nailang sung hun “Revival Time” kizang hi. Tu in USA gamah AG pawlpi 12,700 om hi. Member 3,041,957 pha in minister35,483 bang pha uh hi.USA pan in AG missionary gam tuam tuamah ki khahkhia hi. Tua panin gam tuam tuam ah AG dingin kibehlap zel hi.

Canada ah Azusa Street Revival khit a sawt lo kum 1910 in Pentecostal upna tung hi. Pentecostal upna a nei Pacific leh Atlantic tuipi neh lamah om tuak hi. Mundang Toronto, Ontario, Winnipeg, Manitoba lam khawngah zong om uh hi. Prairie lamah zong USA pana peemte tam ahihmanin Pentecostal thuzui tam hi. Canada gamah Pentecostal upna khaici a tuh masa Alice Bell Garrigus ahi hi. Amah pen Boston, Massachusetts khua-mi ahi hi. Kum 1911 in Canada ah ‘Bethesda Pentecostal  Church’ phuan hi. Kum 1909 in Pentecostal Movement kipat sawm mahle-uh lawhcing zolo hi. Kum 1918 ciangin Pentecostal Assemblies of Canada phuan khia petmah uh hi. Pentecostal Assemblies of Canada pen Canada gam Pentecostal kipawlna thumte laka khat ahi hi. Hih nuaiah pawlpi 130 bang om hi. Kum 1920 in “The Pentecostal Testimony” thukizakna gambupah hawmkhia zo uh hi. Kum 1925 ciangin Pentecostal upna a nei tam ahihmanin kumpi pan theihpihna lai ngah uh hi. Tua khitciangin pawlpi khang peuhmah hi. Bethel Bible Institute khawng neizo uh hi. Tun Horizon College & Seminary, Winnipeg, Manitoba kici ta in Canada gam Pentecostal Institution masa pen ahi hi. Central Tabernacle, mi 1800 tatna Edmonton, Alberta ah kum 1972 in lam uh hi. Winnipeg's Calvary Temple mi 2,500 tut theihna zong kum 1974 in neizo uh hi.

Cuba zong gamneu khat ahih hangin AG pawlpi khangtoh mah mahna gam hi. Kum 1920 kiim in USA pana pai missionary te’ makaihna tawh pawlpi ding hi. Mi tampi in khris um in piangthak uh hi. Kum 1963 in gamsung kivai puakna hoihlo ahihmanin missionary te kiciah sak hi. Tua hunlai takin pawlpi 42, preaching point 248 leh thu-um 4,100 om hi. Gam ki-ukna a hoihloh sungin Pawlpi kiam hi. Ahizongin kum 1980 kiim panin khantoh lam manawh kik uh hi. Kum 1990 tak ciangin Pawlpi 90 leh mimal 12,000 pha ta uh hi. Revival tungin mi tultampi piangthak bek thamlo in natna pan damna ngah uh hi. Tua pan Pawlpi khangto sem sem hi. Tu in Cuba ah AG Pawlpi 8,300 bang pha ta  hi.

Brahmas ah Assemblies of God pawlpi kum 1928 in piang hi. Pasian nasem I. G Robert , Florida district pan pai in New Province a Brahmas te kiang lungdamna thu va puak hi. Pawlpi mi khen khat Church of God pana pawltai ahi uh hi. South Florida district(US) Superintendent A.G Voight awpna nuaiah kum 1928 – 1930 sung S.B Pinder in Pastor sem hi. Mi tawmcik ten Assembly masa pen pankhia uh hi. Kum 1930 cpanin Charles Kenneth Weech in pastor sem hi.  Kum 1932 ciangin Vivian Weech Pastor dingin kiteelcing hi. Aman a sanggampa Charles K.Weech leh  member dang pawlkhat tawh kum 1934 in Kemp Road, Shirley Street tawlamah sing tawh biak inn khat lam hi. Tua building pen amin dingin ‘Pentecostal Lighthouse Tabernacle’ ci-in aapna kinei ngiat hi. Kum 1935 ciangin AG pen Brahmas ah pawlpi kip hong suakta hi. Kum 1938 ciangin Earl Weech in pastor sem hi. Kum 1941 ciangin building phelin a thak lam uh hi. Amin dingin ‘Evangelistic Temple’ kici hi. Rev. Guy Shields in aapna nei hi. Kum 1948 – 1955 sung mi tuam tuamin pawlpi makaih in pawlpi khang mah mah hi. Kum 1956 tak ciangin Rev. John Wilkerson in pastor sem hi. Brahmas ah AG pen pawlpi khang mah mah khat hi.

North America continent sung mun tuam tuamah AG om beh zel in a omnasa te ah khangto sem sem hi. A tunga i gen gamte banah North America continent  huam sunga AG omna gamte; Barbados, Belize, Costa Rica, Dominican Republic, El Salvador, Equador, Guatemala, Haiti, Honduras, Jamaica, Mexico, Nicaragua, Trinidad & Tobago etc.

SOUTH AMERICA

Brazil gamah AG a phuankhia Daniel Berg leh Gunnar Vingren ahi uh hi. Amau pen Sweden pana peem ahi uh hi. Belem, Para, Brazil ah kum 1911 in “Missão de Fé Apostólica” phuan uh hi. Kum 1918 ciangin “Assembleia de Deus” ci-in amin kikhek hi. Assembly of God acihna ahi hi. Tua hun in Sao Paulo a Italian te lakah ah Pentecostal movement Italian-American missionary, Louis Francescon in pan khin hi. Aman kum 1910 in Christian Congregation of Brazil (CCB) phuan hi. A tungin Assembly of God Brazil pen Scandinavian Pentecostal pawl tawh kizawm uh hi. Kum 1932 General Convention panin “Brazilian Assembleia de Deus” amau in dingzo ta uh hi. Tuhun ciang General Convention of the Assemblies of God in Brazil (CGADB) pen Brazil AG te kipawlna lian pen hi. A munpi uh Rio de Janeiro ah om hi.  Pawlpi 198,000 leh Member 27.3 million nei uh hi.

Colombia gamah kum 1932 in America pan Edward Wagner leh azi Ada tung uh hi. Sogamoso ah ki busa in Sogamoso Evangelical Mission phuankhia uh hi. Kum 1932 April ni 1 in Pentecostal worship masa pen nei uh a tua pen Colombo gam AG piankhiat ni in kiciamteh hi. Kum 1958 ciangin Sogamoso, Cali leh Bogota ah pawlpi om hi. Colombo Assemblies of God Council masa pen kum 1958 June 17 in kinei hi. Missionary 18, pastor, nasemdang leh mipi bangzah hiam khat kihel thei hi. Kum 1960 in in Radion Programe phuankhia uh hi. Kum 1970 ciangin Bible School din uh hi. Kum 1975 January 13-20 sung Bagota ah XVIII National Assembly om hi. Tua panin Colombo AG district thum North, Central leh west ah khen uh hi. Kum 1980 ciangin “Invasion 80” kici pawipi khat bawl uh hi. Tua huhau in pawlpi khang tuam mah mah hi. Kum 1990 ciangin “The Decade of Harvest”  kici programe phuankhia kik uh hi. Tua zong lawhcing petmah hi. Tu in Colombia gamah  AG pawlpi 1,200 leh member 4,00,000 bang om hi.
Argentina ah zong AG a khanghat lua ahihloh hangin dam dam in khang veve hi. Pawlpi 1,154 leh pawlpi mi 934,000 om uh hi. Tu ma kum 25 laiin Pawlpi mi 700 a pha AG pawlpi khat zong om lo hi. Tunbel Buenos Aires khuapi ah Pawlpi mi 20,000 val a pha pawlpi thum bang om ta hi. Pawlpi in missionary mun 140 valah khah khia uh hi.

South America continent huam sung Bolivia, Chile, Ecuador, Guyana, Paraguay, Suriname, Uruguay, Venezuela leh adangte ah zong AG pawlpi om hi.

EUROPE:

Kum 1924 February kha in Manchester Pawlpi pastor Nelson Parr in mi 14 Aston, Birmingham ah thukikupna neih pih hi. Tua panin UK ah Assemblies of God pawlpi phuankhia uh hi.  Assemblies of God in Great Britain (AOG) pen United Kingdom gam Pentecostal thuzuite’ kipawlkhawmna ahi hi. Hampstead, London ah Bible School nei uh hi. Tua pen a building kum 1940 -41 kiim in kisia hi. Building dang tawlkhat sung kizang hi. Kum 1950 ciang tua school pen Kenley, Surrey ah kituah hi. Kum 1951 ciangin Bristol Bible College tawh kigawm khawm hi. Kum 1973 in Mattersey ah kituah hi. AOG office zong Lewis, London pan Luton ah kum 1953 in kituah hi. Tua pan Nottingham ah kum 1971 in kituah kik leu leu hi. Kum 2012 in Mattersey Hall pen AOG ten National Ministry Centre dingin zang uh hi. UK ah AG khangto sem sem hi. Kum 1927 in Pawlpi 140 bek pha pan hi. Kum 1929 ciang 200, kum 1933 ciang 250, kum 1939 ciang 350, kum 1946 ciang 403, kum 1957 ciang 506 pha hi. Tu in 600 val pha ta uh hi.

Greece ah kum 1964 in Full Gospel Church phuan nuam in mi pawlkhat kimukhawm uh hi. Tua khitciangin Assembly of God Pawlpi hong piang hi pah mai hi. Earl leh Angie Moore te founding member ahi uh hi. Kum 1965 January khaciang kikhopna masa pen nei thei uh hi. Tua kum August kha in biak inn mun acres 2.3 Kuhn Road ah lei uh hi. Kum 1968 May kha ciang Biak Inn lam kipan uh hi. Tua kum mah December khaciangin biak inn thakah kikhopna masa zang thei uh hi. Kikhop masak pen ah kikhawm mi 150 pha uh hi. Kum 1972 May khaciangin Rev. Carley Touchstone in pastor sem hi. Member pung zel uh ahihmanin kum 1976 ciang biak inn bawlpha uh hi. Kum 1977 may khaciang biak Inn thak luah thei uh hi. Kum 1981 April kha pan Sunday school zong om theita hi. Kum 1995 April khaciangin Patrick Medeiros Senior pastor ah kilamto hi. Aman youth pastor kum kua sem khin hi.

Switzerland ah kum zalom 20 kiim mah in US lam panin pentecostal upna tung hi. Swiss Pentecostal kimuhkhopna masa pen kum 1910 in om hi. Kum 1925 ciangin Swiss Pentecostal mission society hong piang hi. Tuakhit kum 1935 ciangin amin kilaih kik hi. Switzerland gama pentecostal thuzuite kipawlkhawmna pen ‘Swiss Pentecostal Mission(SPM)’ kici hi. Assemblies of God zong kipawlna ah member khat ahi hi. SPM member kum 2006 in 9,300 pha hi. Kum 2010 in pawlpi 80 pha hi. Pawlpi lian pen Christliches Zentrum Buchegg hi-in Zurich khuapi ah om hi.

Italy gam AG te kipawlkhawmna pen ‘Evangelical Christian Churches Assemblies of God’ kici hi. Kumn1948 in kiphuan khia pan phing hi. Kum 1988 in kipuahpha kik lai hi. Kum 1983 in “Rally of Pentecostal Ministers” om in tua pen kum 1997 ciangin a ban kizom to hi. Italy ah AG pen pentecostal pawlpi lian pen ahi hi. Kum 2012 in pawlpi 1,153 leh member 150,000 pha uh hi. Italy gam tawlam Campania, Apulia, Basilica, Calabria leh Sicily ah AG pawlpi tam diak hi.

Netherlands ah ‘United Pentecostal and Evangelical Churches’ pen Khristian Pentecostal thuum te kipawlna lian pen hi. Kum 2002 Februay 16 in kiphuan khia hi. ‘Brotherhood of Pentecostal Churches’ leh ‘Full Gospel Churches of the Netherlands’ kigawmkhawm pana hong piang ahi hi. Hih pen Assemblies of God, Dutch te ii’branch zong hipah hi. Kum 2008 in  pawlpi 160 om in member 22,000 pha hi.

Gemany ah Pentecostal upna kum 1906-1908 kiim in lut hi. Kum 1954 in kipawlkhawmna gina takin om pan hi. Kum 1982 ciangin kipawlna min ‘Federation of Pentecostal Churches ‘kici hi. Member 46,226 pha in kum 2011 in Germany gam pentecostal pawlpi lian pen ahi uh hi.

Poland gamah AG pen protestant pawlpi lakah a lian pen nihna ahi hi. A lian pen Evangelical –Augsburg Church ahi hi. Poland ah Pentecostal pawlpi lakah AG a lian pen hi. Pawlpi 211 leh mimal 23,00 bang pha uh hi.

Ireland gamah kum 2005 October 22 in Pentecostal thuzuite kipawl khawmna ‘Assemblies of God ireland’ kiphuan hi.

A tunga gamte banah Europe continent sunga AG pawlpi omnate; Albania, Armenia, Belarus, Bulgaria, Croatia, Denmark, Estonia, Finland, France, Georgia, Hungary, Kosovo, Luxembourg, Malta, Moldova, Norway, Portugal, Romania, Russia, Serbia, Slovakia, Slovenia, Spain, Ukraine etc.


AUSTRALIA & OCEANIA

Australia gam Queensland ah Kum 1929 in AG pawlpi kiphuan hi. Kum 1937 ciang Pentecostal Church of Australia leh Assemblies of God Queensland kigawm khawm in Australian Assemblies of God (Assembly of God Australia) ci-in kipawlna uh hi. Kum 1948 in Commonwealth Bible College phuankhia uh hi. Kum 1977 in Pastor Andrew Evan in Assembly of God Australia kipawlna ah General Superintendent hong ngah hi. Ama sep sung(1977-1997) in khantohna tampi om hi. Pawlpi leh mimal tampi kibehlap hi. Kum 2009 April in National Conference ah Pastor Wayne Alcorn, National President dingin teel uh hi. Tu in ACC nuaiah AG pawlpi 1,100 phial leh Pawlpi mi 250,000 bang om uh hi.

New Zealand ah Pentecostal movement a pan khia masa evangelist Smith Wingglesworth ahi hi. Kum 1922 kiim in Pentecostal church of New Zealand phuan hi. Tua khit kum 1927 ciang Assembly of God in Zealand piang  hi. Kum 2007 in pawlpi 230 leh mimal 30,000 val bang pha khin uh hi. North Island lamah tam pen uh hi. South Asia leh Oceania lamah missionary tampi sawlzo uh hi. Kum 1950 apiang Takapuna Assembly of God pen pawlpi lian pen ahi hi. Kum 1960 sungtengin New Zealand ah Assemblies of God khang peuhmah hi. Pentecostal biakna lian pen Aotearoa ah hong pianlawh hi. Kum 1975 a Associated Pentecostal Churches of New Zealand a phuankhia lakah AGNZ kihel hi. Tu in Pawlpi 700 val bang phata hi.

Samoa ah Assemblies of God pawlpi kum 1928 in ding hi. Kipawlna kician tak Sāmoan Assemblies of God Fellowship  nei uh hi. Tua nuaiah pawlpi 530 leh mimal 97,000 kiim bang om hi. Samoa gam AG pawlpi ten midang bangloin amau ngeina luite paikhia uh hi. Khasiangtho tawh ki tuiphumna leh kamtuam pauna thupisak mah mah uh hi. Kum 1976 pan in Pastor Max Haleck Jr in makaih hi. Kum 2006 pan Dr. Samani Pulepule in makaih to leu leu hi. Kum 2011 panin Pastor Onesemo Pulepule in makaih kik hi.

Hih a tunga te banah Fiji, Kiribati, Marshall Islands, Micronesia, Solomon Islands, Nauru, Papua New Guinea,Tonga, Tuvalu, Vanuatu khawngah zong AG pawlpi om hi.

AFRICA

Africa gamah AG pen kum zalom 20 hunlai mah in kipan hi. Azusa Street Revival khit kum nih ciangin Pentecostal missionary masa pen 14 May 1908 in Cape Town, South Africa tung hi. Kum 1925 ciang AG pawlpi kip takin ding ta hi. A tungin mikang missionary te’ kikhopna hizaw pian hi.Kum 1936 ciang AG pawlpi ah mivom te hong tamzaw ta hi.

Ghana gamah USA AG pan missionary Rev. Lloyd leh Margaret Shirer te kum 1931 in va tung uh hi. Nasem ding a lak masak pen uh Ms. Beulah Buchhwalter leh Guy Hickok tawh Yendi ah AG pawlpi phuan pah uh hi. A sawt loin Florence Blossom, Henry Garlock, Eric Johnson leh Thelma Godwin ten zong va pawl uh hi. Tua hunlai missionary te citak mah mah uh a haksatnaten lungkiasak zolo hi. Bushwalker leh Guy Hickock kum 1942 in missionary field ah si uh hi. Kum 1935 in Tamale leh Walewale ah pawlpi branch hong uh hi. Kum 1937 ciang Bawku ah pawlpi ding kik leu leu hi. Kum 1939 ciangin Mamprusi lak pan khristian a suak masa pen Bro. Bma Mahama khristian suak hi. Tualsung mi aki tuiphum masa pen Rev. Edward Adutwum ahi hi. Kum 1942 in kitui phum hi.  Aman a tungin Pharmacist sem in tua khitciang Pastor leh pawlpi General Secretary sem hi.

Missioanry te Ghana gam a tun ciangun a sep ding uh pen Pasian’ thu tangko hi. Mite genthei in natna tam banah lai a siamloh lam mukhia uh hi. Tua tak ciangin laihilh in nasepzia ding natawm sinsak uh hi. A cidam nangun damdawi (zatui+zatang) hawm uh hi. Kum 1948 in Ghana gama Assembly of God clinic masa pen Saboba ah missionary ten hong hi. Clinic a masa pen nihna zong kum 1950 in Nakpanduri ah kihong hi. A thumna clinic (Maternity Clinic) pen Walewale ah Vivian Smith in hong hi.

Ghana AG Bible School masa pen kum 1950 in Kumbungu ah Rev. Fur Thomas makaihna tawh kihong hi. Graduate sangnaupang masa; Rev. Bewini, Agbango, Elisha Akurugu, Alo Joshua Kabba leh Alhassan ten kum 1951 in pastoral training zo uh hi. Winifred Mullings bang hih mun pan sang a man ciang Missionary kuan hi. Tua khitciang Northern Ghana Bible Institute ah Dean sem lai hi. Hun bangtan hiam khitciangin Southern Ghana Bible Insitute zong Kumasi ah kihong hi. A nungciangin Saltpond ah kisuan hi. Kum 1988 ciangin Bible school a thumna dingin Mid Ghana Bible School Kumasi ah kihong hi. Rev. David Vespa Ghana ah missionary 1966 pan 2006 dong a seem pa pen Principal masa ahi hi.

Andersons in laikhetna Tamale ah zat dingin piakhia hi. Tua panin Assemblies of God Literature Centre (AGLC), Accra ah kiphuan hi. Rev. E.L Phillips in kum 1970 in Pasian’ kiangah aapna nei hi. Tua literature Centre panin kum 1973 in New Testament Dagomba version tawh khen uh hi. A tei(paulet) pen Rev. H.S Lehman te nupa leh tualsungmi Pastor Daniel Wumbee ahi uh hi. Vacation Bible school zong a lunglutte adingin kum 1959 in hong uh hi.

Kum 1980 in Ghana Literature Outlet (GLO), Accra ah din uh hi. A nung ciangin Assemblies Booksop Limited (AGBL) ci-in khek uh hi. Tun Koforidua, Kumasi leh Tamale ah branch nei hi. Kum 1959 in Ghana AG pawlpi ten “Ghana Evangel” thukizakna hawmkhia uh hi. Lai siangtho galsinna International Correspondence Institute (ICI) zong kum 1970 in phuan uh hi. Tun Global University ci-in a min khek uh hi. Radio ministry ‘Bible Time’ zong kum 1968 panin nei uh hi. Radio programe tungtawn in Pasian thu nasia takin tangko uh hi. Official General Council meeting masa pen kum 1964 in nei uh hi. Tua ma siah Northern leh Southern council kituam khen uh hi.

Malawi gamah July ni 4, 1947 bek in AG missionary te lut uh hi. Hih missionary te pen mikang hilo Tanzania leh South Africa mivomte ahi uh hi. Kum 1960 in  Annual Conference masa pen nei thei uh hi. Tua ah makai kiteel in missionary te mah in ngah lai hi. Kum 1962 ciangin amau Malawi mi Rev. Gideon Bomba General Superintendent dingin kiteel hi. Kum 1964, April 27 in official in pawlpi registered uh hi. Kum 28 sung(1966 -1980) Malawi AG  district thumah kikhen hi. Tuate Southern District, Central District leh Northern district ahi hi. District kivaipuakna zong District Superintendent te khutah om hi. Rev. Gideon Bomba in Malawi AG kum sawm leh sagih sung makaih hi. Kum 1979 ciangin Rev. Maxwell in makaihto hi. Tuakhit ciang Rev. Chapola in kum sawm sung General Superintendent sem hi. Kum 1989 pani Rev. Dr. Lazarus Chakwera in sem kik hi. Aman kum sawm nih leh khat sung bang sem ta hi. Malawi gamsung district khempeuh ah AG pawlpi om hi. Pastor bek bek zong 500 bang pha uh hi. Assemblies of God School of Theology (AGST) zong nei uh hi. Kum 2004 in kipawlna min “Assemblies of God in Malawi” pen “Malawi Assemblies of God” tawh laih uh hi. “General Superintendent” zong “President” ci-in kheel uh hi. Bang hang hiam cih leh “Superintendent” pen police rank ahihmanin ko police tawh kinial nuam kei ung ci uh hi.

Kenya ah kum 1912 in Pentecostal missionary masa pen Finland pan tung hi. Kum 1918 ciangin North American pan in Pentecostal Assemblies of Canada ten zong missionary puak uh hi. Pawlpi dingin tua pen kum 1965 akipan Pentecostal Assemblies of God kici hi. Independence khit kum 1963 ciang tualsungah pawlpi hong khang mah mah hi. Foreign missionary tampi hong tun beh lai uh hi. Kum 1967 ciangin American pentecostal Dale Brown in Kenya Assemblies of God phuan hi. Kum 1972 ciangin Assemblies of God, USA tawh kizom uh hi. Kenyan Pentecostal Assemblies of God (PAG) nuaiah tu in pawlpi 2,000 bang om hi. Nairobi khuapi bekah zong AG mi leh sa 15,000 bang om hi. Kum 1990 a survey kibawlna pan in Nairobi khua sungah Assemblies of God  pawlpi khang pen cih kimukhia hi. Kum khat in 38% in khang uh hi. Pan Africa Christian College (PACC) sang hoih mah mah nei uh hi. Tua nuaiah Christian Religious Awareness for Teachers (CREATE) kici programe kician takin om hi.

Mauritius gamah kum 1967 in AG biakna kipan hi. A pankhia pen Mr. Aime Cizeron te nupa ahi hi. Amau pen France gam pana Mauritius ah missionary a pai ahi uh hi. Meeting masa pen bang Beau Basin khua Municipal Hall ah nei uh a, mi tawmcik bek pai thei hi. Ahizongin Pasian in nalamdang semin cina te dam hi. A zing ciangin a paikhawm mi tam semsem hi. Kaal khatin nihvei khawng kimuh khopna nei zel uh hi. A sawtlo in a kikhopna uh ah tan awn lo uh hi. Mi tampi ten dam nuamin a pua lamah ngak uh hi. Tuaciang in Pasian in amau ading mun pia hi. Tua pen Rose Hill,Port Louis khua hi in Mauritius gamah a khuapi thumna hi. Tua ah crusade khawng a bawl ciangun khat veivei kikhawm 7,000 bang pha thei uh hi. Kum 1967 October leh kum 1972 may kikal in pawlpi sagih (7) ding man hi. Tu in Mauritius gambup ah AG pawlpi 120 om hi. Mauritius gam mipi za ah guk (6%) pen AG ahi uh hi.

Nigeria gamah Pentecostal thu-um mite kipawlna ‘General Council of the Assemblies of God, Nigeria’ pen leitunga pentecostal kipawlna lakah a lian pen pawl ahi hi. A headquarter uh Enugu, Enugu state ah om hi. Nigeria gamah Assembly of God pawlpi 14,300 leh mipi 2.6 million val pha uh hi.

Egypt gamah kum 1920 kiim in AG biakna kipan hi. Member 1,00,000 bang pha uh hi.

A tunga gamte banah Africa gamsunga AG pawlpi omnate; Angola, Benin, Botswana, Burkina Faso, Burundi, Cameroon, Cape Verde, Congo, Egypt, Equatorial Guinea, Ethiopia, Gabon, Ghana, Guinea, Kenya, Lesotho, Liberia, Madagascar, Morocco, Mozambique, Namibia, Rwanda, Senegal, Swaziland, Tanzania, Togo, Uganda, Zambia, Zimbabwe etc.


ASIA

Kum zalom 20 na kiim in American pan AG te Asia continent sung gam tuam tuam ah missionary hong kuan uh hi. South east Asia leh Far east khawng bek thamlo in middle east leh mundang  gam tuam tuamah AG pawlpi phut uh hi.

India gamah Pentecostal upna khaici hong tuh masa pen missionary George Burg ahi hi. Amah pen German suan ahi hi. Kum 1901 in India ah hong pai in Bangalore ah ki busa in South India ah nasem hi. Kum 1908 ciang United States ah ciah kik hi. United states ah a ciah sungin Azusa Street Mission ah kha baptized na leh kamtuam khawng va ngah hi. Tua kum mah in India gam Bangalore ah hong kileh kik hi. A seppih Anglo Indian evangelist Charles Cummins in zong Burg tungtawn in Pentecostal upna hong nei hi. Burg nasepna ah Cummins pen hong kizang thei mah mah hi. Amaute gel kizui in Bangalore leh Travancore khawngah gospel pai uh hi. United states ah a va ciah kik ciangin Robert F. Cook tawh va kimu kha uh hi. Tuapa pen kum 1908 Azusa Street Revival ah aki bual khinsa khat hi. Burg in Los Angeles a Camp meetingah India gamah evangelist kitangsam cih thu a gen ciangin Robert F. Cook lunglut pah lian hi. Kum 1913 ciangin azi Anna tawh India gamah “Faith missionary” min tawh hong kuan khia uh hi. A tanute nih Blossom leh Dorothy zong tawnpih uh hi. Bangalore ah om in Burg nasep huh uh hi. Kum 1919 in Cook Assemly of God ah kipia in kum sawm sung phial tua laiah nasem hi.

India gamah Assembly of God(AG) min tak tak tawh missionary hong kuan masa pen bel Mrs. Mary Chapman hi. Kum 1914 in tembaw tawh Chennai hong tung hi. Kum 1935 kiim a Cannonore Mission’ field a sem Ms. Constance Swinfen Eady zong India ah AG a dinkhiat nangin mi thupi khat hi. Cannonore ah meeting khawng neihpih in biak piak nang mun khawng a vaihawm khitciangin Bangalore ah kisuan hi. Kum 1935 mah in Bangalore ah First Assembly of God Church piang hi.  Revival meeting kum1947 in om hi. Pawlpi a din cil in English service hi a mi 35 pan 50 kikal khawng bek pha uh hi. Cecil M.Good pawlpi keem dingin zawn hi. Kum1947 -1951 sung  Rev Good leh azi in pawlpi a khan nangin nasem uh hi. India mi lak pan AG pawlpi ah a lut masa pen Bro. Shuddhappa te innkuan hi. Kum 1950 kiim pan in India gam mun tuam tuam ah AG hong ding hi. Chennai a New Life Assembly of God (NLAG) bang pawlpi lian mah mah khat hong suak hi. Member 40,000 bang pha uh hi. Senior Pastor Dr. David Mohan ahi hi. Secundarabad AG khat zong member 6,000 val pha hi.

Assembly of God of India kipawlna pen World Assemblies of God Fellowship ah member khat ahi hi. Assembly of God India nuaiah pawlpi 8,000 om hi. Bangalore ah Assembly of God College nei uh hi. Kum 2011 AG World Congress, AG makaite’ kimuhkhawpna zong AGI ten zindo uh hi. Dr. D.Mohan, Chennai khuapi a New Life Assembly of God Pastor pen Assemby of God India ah General Superintendent ahi hi. Assemblies of God India nuaiah Association  thum om hi tuate; South India Assemblies of God, Assemblies of God of North India, Assemblies of God of East India ahi hi.

Vietnam gam Cao Tan phat ah kum 1970 in Don Warren leh a zi in tagah kepna hong uh hi. Tua panin UA AG kiangah huhna ngen uh hi. Kum 1971 ciangin  USA pan AG missionary te Vietnamah kisawl hi. Kum 1972 in pawlpi masa pen Vungtau ah ding hi. Tua khua mahah kum 1973 ciangin Glen Stafford in Bible School hong hi. Tua kum july kha in South Vietnamese kumpi in recognized hi. A General Superintendent masa pen uh John Hurston ahi hi. Amah pen American missionay hi. Central office zong Saigon ah lam uh hi. Kum 1975 ciangin mimal 10,000 pan 15,000 ah khangto uh hi. Kum 1988 – 1998 sung Tran Paul Ali in General Secretary sem hi. General Council masa pen kum 1989 in nei uh hi. Kum 2009 october kha in pawlpi in kumpi’ theihpihna ngah hi. Tua khit kum 2010 october 20 in general council nei kik uh hi. Kipawlna Assemblies of God in Vietnam (AGVN) nei uh hi. Hih pen World Assemblies of God Fellowship ah zong affiliated member khat hi. Kum 2009 in pawlpi mi 40,000 bang pha khin uh hi.

Phillippines gamah AG biakna kum 1920 hunlai in lut khin hi. United States of America  gam Assemblies of God kipawlna panin Benjamin H. Caudle leh azi kum 1926 in Phillippines tung uh hi. Amau pen AG missionary Phillippines gamah aki sawl masa pen ahi uh hi. Convention masa pen kum 1941 in Nicolas, Villasis, Pangasinan  ah kinei hi. Kum 1941in Bethel Bible Institute Baguio khuapi ah hong uh hi. Northern Luzon a Mountain Province ah Missionary a sem Elva Vanderbout  makaihna tawh kum 1951 in Cebu khuapi ah Immanuel Bible Institute kihong kik hi. Kum 1953 ciangin Bethesda Children’s Home kihong leu leu hi. Kum 14 sung Assemblies of God USA ten a awp khitciangun amau leh amau ki uk uh hi. Rodrigo C. Esperanza pen PGCAG ah General Superintendent masa pen ahi hi. The Philippines General Council of the Assemblies of God (PGCAG) pen Phillippines gama AG te kipawlkhawmna hi. Kum 1953 in kiphuan hi in Pawlpi 3600 om hi.

Korea gamah kum 1953 in Korean AG pawlpi masa kiphut hi. Kum 1957 ciangin Huh Heong pen Korean chair person masa pen hong hito hi. Kum 1958 ciangin David Yonggi Cho in  tua  Yoido Full Gospel Church kici phuan hi. Kum 1988 in Yoido Full Gospel Church pen leitunga pawlpi lian pen in kiciamteh hi. South Korea a om hi a  tua hunin member 500,000 val pha uh hi. Kum 1980 ciangin Korea gamah AG pen protestant pawlpi khempeuh lakah a lian pen hong suak hi. David Yonggi Cho pawlpi Yoido Full Gospel Church pen khang sem sem in kum 2007 in member 10,00,000 pha ta uh hi.

Taiwan gamah kum 1920 kiim in American missionary Simpton in nasem hi. A sawt lo in Taipei, Taichung, Tainan leh Kaohsiung te ah pawlpi ding hi. Taichung bangah Bible School bawl uh hi. Tun Taipei ah zong correspondence a sintheihna AG school om hi. Radio ministries zong Swaggart in phuan hi. Kum 1952 in Assemblies of God Taiwan kipawlna ding hi. Taiwan gama om pentecostal upna neite kikhopna hi pen mai hi. Sen(chinese) pawlpi hi-in USA pan missionary te phuhkhiat ahi hi.

China gam nitumna lam leh Tibet ah kum 1920 kiim in US AG missionary Victor Plymire leh a lawm ten nasem uh hi. Kum 1933 in China gam mun 26 ah missionary 67 ten nasem uh hi. Missionary ten tualsung mite zong nasem dingin la uh hi. Chinese mi 155 nasem huh dingin la thei uh hi. Kum 1945 ciang missioanry ten pawlpi 145 bang phut dingin ngimna nei uh hi. Ahihhangin kum 1952 ciangin pawlpi phutzo an uh hi.

Japan gamah Assemblies of God, United States of America pana missionary a tung masa pen Juergensen ahi hi. Kum 1914 kiim in Japan va tung thei hi. Japan Assemblies of God pen kum 1949 in piang hi. A tungin member tawmcik bek pha uh hi.  World Assembly of God Fellowship ah member khat ahi uh hi. Pawlpi 211 lah  Pawlpi mi 10,766 pha uh hi. Japan Evangelllical Association ah zong member khat ahi hi.

Kuwait gamah kum 1974 in AG pawlpi ding pan hi. Amau pen South India Malayalam district Council AG te tawh kizom uh hi. Pastor masa pawlkhat Pr.M.P.Philip, Pr.Varghese Samuel, Pr. C.Y. Thankachan, Pr.Thomas Mathew, Pr. P C Daniel, Pr. P. K. Johnson leh executives masate Br.Babykutty Abraham, Br.P.M Mathew, Br.A.K Kurian, Br.V.C John, Br.Binoy Mathew hi uh hi.

Iran gama Assemblies of God Kipawlna pen Jama'at-e Rabbani kici hi. A munpi Tehran khuapiah om hi. Iran gama AG zaah sawmgiat(80%) bang pen Muslim pana khristian suak ahi uh hi. Biakna ah Persian leh Armenian pau zang uh hi.

A tunga gens ate banah Asia continent huam sunga AG pawlpi omna gamte; Bahrain, Bangladesh, Cambodia, HongKong, Indonesia, Iran, Israel, Kazakhstan, Kuwait, Malaysia, Myanmar (Burma), Pakistan, Russia, Singapore, Sri Lanka,Taiwan,Tajikistan,Thailand, United Arab Emirates, Vietnam etc.

Assemblies of God pawlpi a din cilin member 300 bek pha mahleh Pasian’ hehpihna tawh khangto semsem hi. Tu in Pentecostal pawlpi lian pen ahih banah leitunga pawlpi khangto pen ahi hi. Kum 2006 Assemblies of God World Missions Research Office report ah nisim in AG member 5,000 in kibehlap den ci hi. Leitung bupah AG pawlpi member pen 64 millions bang val ta hi. AG Pawlpi (church) zong leitung bup ah 3,12,048 bang val lai hi. Leitung gam 212 ah AG pawlpi om hi. Leitung gam tuamtuam lak pan Brazil ah AG tam pen hi. Assemblies of God pawlpi pen kum 1947 a World Pentecostal Conference ah kihel hi. Pentecostal Fellowship of North America 1948 kumin zong kihel in AG pawlpi mi J.R.Flower bang Constitution bawl dingin kiseh hi. Kum 1999 tak ciangin Assemblies of God pawlpi pen Pentecostal pawlpi lian pen hi ta hi. Kum 2009 in leitungbupah AG member 63 million leh pawlpi 346,108 om hi.

Kum 1988 in Assemblies of God pawlpi National Fellowship tuamtuam ten “World Pentecostal Assemblies of God Fellowship” phuan uh hi. Hih bang kipawlna hong piankhiat theihna dinga mapang pen Dr.J.Philip Hogan ahi hi. Amah pen United States Assemblies of God a ‘Division of Foreign Missions’ ah Executive director lui ahi hi. Hih Fellowship ah amah Dr.Hogan Chairman masa pen hipah hi. Kum 1992 ciangin Rev. David Yonggi Cho, Chairman dingin ki teelcing hi. Kum 1993 ciangin Fellowship min kikhek in World Assemblies of God Fellowship kici hi. World Assemblies of God Fellowship nuaiah fellowship 150 val om hi. World Assemblies of God Fellowship in a tum bulpi pen Pasian’ thupiakte zuih ding ahi hi. Hun tomno sungin khang mangthang tampi mat sawm uh hi. Gupkhiatna thu a za nailo ten a zaak theih nang vaihawm uh hi. Tuabang nasem dingin mite huh ding sawm uh hi. Kum 2000 ciangin Cho a khek dingin Thomas E.Trask ki teelcing hi. Kum 2008 in Lisbon, Portugal a World Congress zatna ah George O.Wood, Chairman dingin kiteel hi. Amah pen United States Assemblies of God ah General Superintendent ahi hi. Kum 2011 in World AG Congress, Chennai a zatna ah D.Mohan, Vice Chairman dingin kiteel hi. Amah pen All India Assemblies of God ah General Superintendent ahi hi. World Assemblies of God Fellowship (WAGF) pen leitunga Khristian te kipawlna lak pan a lian pen gukna(6) ahi hi. Nasem vekpi pen 3,00,000 bang pha sam hi. Kum 2005 in International Fellowship ten Bible School 859 nei uh hi. AG General Council in gamdangah missionary 2,691 khahkhia uh hi. 

References:
Barrett, David(2001) : “World Christian Encyclopedia” Oxford University Press: London, Table 1-5, pages 16–18

Blumhofer, Edith L. Restoring the Faith (1993): ”The Assemblies of God, Pentecostalism, and American Culture“ University of Illinois Press, Urbana.

Crowe, Terrence Robert (1993): “Pentecostal Unity: Recurring Frustration and Enduring Hopes” 282 pp.

Edith L. Blumhofer(1993) : “Restoring the Faith: The Assemblies of God, Pentecostalism, and American Culture” Urbana, IL: University of Illinois Press, 116.

E. N. Bell(1914) : “General Convention of Pentecostal Saints and Churches of God in Christ” Hot Springs, Arkansas

Jay Beaman(1989): “Pentecostal Pacifism: The Origin, Development, and Rejection of Pacific Belief Among the Pentecostals” (Hillsboro, KS: Mennonite Brethren Historical Society

McGee, Gary B(1997): “ People of the Spirit: The Assemblies of God” Spring-field, Mo.: Gospel Publishing House.

Melvin L. Hodges(1977) : “A Theology of the Church and its Mission: A Pentecostal Perspective” Springfield, MO: Gospel Publishing House, 132.

Poloma, Margaret M(1989): “The Assemblies of God at the Crossroads: Charisma and Institutional Dilemmas” 309 pp.


Source: http://thangpinaulak.blogspot.com/ Posted 6th March by Thangpi Naulak.