Thailand Ah, KawlGam Minih Sihdaan kipiak Na

Thailand Ah, KawlGam Minih Sihdaan kipiak Na

Myanmar News   4:27:00 AM

Date/28/12/2015 ni in, Thailand Prime minister prayut Chan-o-Cha in, Thukhen sakhat pen, ah mawh aa, ahmawh kei zong in, kikhel kiklo ding hi cih thu ah kizaak ciang in-

Sihdan piak ahthuak kawlgam minih te, Win Zaw thun i Nu, Daw MeTaan in, Ka pasal ah hih leh, Kata pa ah ngaihsut na hang aa Sihlawh ta, Kata pa ka ngaih sutna in, Anne zokeng, ihmu theikeng, ka lunggim lua mhmh-

Tua Leh zum aa teKhat i ThuDot Na-
Nang hih mun ah, Na tapa hang in, Suntawh Zantawh kapkap in, na om mawk, Nang yangon ciah kik ding maw..?
Hih ah omsuak sawm maw..?

Dawnna-
Hihmun ah khabei dong omning, Zingciang in ah, Ah tapa omna mun, thung innsung ah paining, Kha ongbei ciang Yangon ka ciah kik ning, aa Kata pa ngailua phawk lua mhmh ing- Bangci gen di kahiam zong theinawn keng, kei leh kei zong sinuam tamai ing-

Dotna-
Tua leh, thukhen ni, sihdaan kipia ding aa um maw? Suakta ding aa Um?

Dawnna-
Hihzah ciang aa Thusia suaksak ding in umzo keng, olno, baihno tak aa suakta ding in um ing, leitung mikhem peuh inzong, ah theihsa hi a, Thukhen ni in, ka ta ahsuak ta ding aa ka up hi ven..

Dotna-
Tua leh nang Khabei ciang ciahding cileng, inn ah kua ngen om aa, Ta bangzah nei aa..?

Dawnna-
Ken Tanih nei ing, Kapasal ai leh, Katapa uhhang aa, lungsim nalua aaa, ong nusia ongsih santa, Hiteng kongpai ding aa, Katapa vala ning kacih hiven, kei ciahleng..katapa....( kapkawm mittui luang ziahziah kawm sa aa gen)

Dotna-
Tuun e leh, nitaak khawng na ihmut khawng ahnuam hia le..?

Dawnna-
Keibel nong et uh ciang, kamel kasa ahngei bang mah inteh, aihang kalungsim nuamkei, ka lungsim sung na lua mhmh, kalungsim ah katapa bekbek ngaih sunsun ing, kakhua uhzong ah, katapa hang in, khuapih te zong mittui luang in om in, ong dah pih mahmah, Hihteng ah omleng, katapa mai kamuh ciang, kalung nuam in kalung kim mahmah, khua ah omleng, ka tapa thu bangmah zakeng- (kahkawm in gen)

Dotna-
Na tapa aa ding in, Makai thunei kumpi telam ah bangteng gennuam na hia?

Dawnna-
KaTapa in mawhna neilo hi, ong huh ongpan pih ngeingai un cih ong thuum ongngen nuam ing, thumaan tawh thu ongkhen pih un maw, ka taa aa ding aizong, mawhna aa ding aizong, ah vek in, thumaan tawh kisep na ding ong kanpih vaihawm pih un maw, Leitung bup inzong ong huh un maw, ahmau thah ah hizong in, ken phi thei lel dinghing, bang mah hi kei, Ah thatte ciang bangmah cihlo, ah thatlopi mawhna neilo pi, sihdaan pia, ong huh un maw, ongpan pih un, Thunei gamtuamtuam tetung ah ong gensak kawikawi un maw..(kahkawm in gen)

(Thukhun kikhel kik lo )

Nu aw... Ken mithat ngamlo hing,
Ken mithat lohing, ong Um in maw KaNu-

Nu aw-
KaNu tawh kigam la, Inn tawh kigam la ding aa, Tuipi kaan aa migam milei kapai na hang in, Nuamsa paaktat, Nu/pa ongngai lo aa, Gualnuam ding aa paihi lo cih, KaNu thei niteh maw-

Nu aw-
Keihang aa namittui luang te, ken ongnul sakthei lo, tua mahmah nasa luang Nu aw...

Nu aw..
Kaneu tungpan aa nongthu hilh nate, ongzui mah ing aa, nongthu hilh bang in gamta mah ing, tuate zong taangtung mah hiven, aizong Nu aw, hihmun santak ah, nong thu hilh nate tawh, kileh bulh lua Nu aw..

Kawlnew pan in, ah tom in kong at kik hi-
Thu ngetna phawk kimciat ni-

A gelh:ZomiKhai Hi Ing ei

Malaysia Zomite' Dinmun !

Malaysia Zomite' Dinmun !

Kipawlna   4:02:00 AM

Tulaitak Malaysia gam ah Zomi akici setset tul 25 val bang om lai hi. Biakna pawlpi 40 dektak bang phata hi.

Zomi khangno atamzaw biakna lam ah lawp mahmah uh aa Zogam khawng sang in zong khanlawhna omzaw tham hi.

Aginalo vanglak bel na zong sem nuamlo in khutdawh ngen peuh in om hi. Zomi lasa aminnei mawhlo khangno lai khat bang pen kiteii sak lualiang in Malay mi kineih in Zomite' van khawng a sut nangawn khat bang om hi.

Zomi mintawh kipawlna atuamtuam a om hang in Zomi Association of Malaysia (ZAM) mah agolpen hi aa tuni ciang member 29,930 phata hi. Tua ahih man in Malaysia gam aa om kawlgam mite' kipawlna lak ah alianpen ahihi. Community tawh kisai meeting khat peuh a om ciang in ZAM akihel mankei ding leh a meeting kikhiin zo zahdong in UN dong ah mite' thulak tak kipawlna khat hong suakta hi. Hunbit nasem staff mi 8 om ngiat uh hi. Tua ahih man in tulaitak leitung bup ah Zomi min tawh kipawlna (biakna lam ahilo) a om khempeuh lak ah khasum pia aa hunbit nasem mi 5 val aneizo pen ZRO leh ZAM bek mah ahi hi.

Genvai tawh kisai in Zomi sung ah kipawlna atuamtuam aom hang Zomi Genvai Kipawlna mah alianpen ahi hi. Tukum pawllut mi 8,811 pha hi. Pawllutman kum khat ai RM 20 hi aa deihloh pen in sihna neih khak leh sihvuina aa beii teng pawlpi in sikh hi. Atawmpen RM 6,000/- bang beii ci hi. 2015 kum sung in Zomi luang 39 vui uh hi.

Malaysia tawn in gamthumna apaikhin Zomi mi tul 5 pan tul 7 kikal phading in ki ummawh hi. ZAM ciaptehna ah tulaitak UN card angah nailo Zomi 13,456 bang om hi. Innkuan pihte lutpih ding aa angak mi 577 pha hi. Gamdang tungsate' sapna hang tawh gam thumna apaikha zong tampi mah omta hi.

Tulaitak UN card tawi lian pen Zomi tul 5 pan tul 7 kikal phading in kilam en hi. US kumpi in 2010 kum August kha 17 ni masiah aa teng bek lanung acih uh ciang in Zomi tampi mah innlam ki ciahciah ta hi. Tulaitak innlam aciah kik Zomi pen ni khat atawm penpen mi 5 pha hi. Vanleng ngahhak lua ahih man in mi tampi in vanleng ngaklai uh hi.

Ahi zong in 2015 kum November kha 13 ni aa France (Piancit gam) Paris khuapi aa thupiang hang in America leh Europe gamte ah Muslim muhdahna nakpi in khang hi. Bek thamlo in Malaysia kumpi in Syria leh Kawlgam pan aa gambel Muslim te Malay gam ah omsuak theihna (PR) piaksawm hi. PR angah khat pen refugee in kiciamteh thei nawnlo ding hi. Tua hileh amau' satanh kuan ngah ding cihkhat lunglut huai sim hi. Tua ban ah tulaitak leitung ah galtai taktak pen atamzaw Muslim te vive hizaw hi. American te'n Muslim refugee hong langam nawn kei le uh koi pan asawk uh tam cih zong ngaihsut huai hi. Amau zong nasem ding mi kisamh mahmah uh ahih man in mun khat teiiteii pan bel asawk uh kul peelmawh ding hi.

Thukhupna

Tulaitak Malaysia aa Zomi akici setset teng pen Tonzang township bup tawh kikim ahih man in Zomite' mailam saupi akhual sawm te'n ngaihsut huai mahmah ding hi.

Kei' mimal ngaihsutna ah mi' gam mi' lei ah tawm om lua le hang amangthang minam ih suah khak ding patauh huai kasa hi. Ahi zong in Pasian' kam ngaih dahlo in tu aa tungsa teng ih ginat nak leh mangthang nawn samkei ni ci'n upna kanei hi.

Tua ahih man in UN in mithak hong lakbeh nawn dah mai uh henla tu laitak aa Malaysia tungsa apaisawm teng apai theih nading un lampi khat hong kihon nading in deihsakna lianpen thu himun pan in ka pulak hi.

Zomite' Maban Pasian in hong honsak ngiat ta hen.

Lungdam
Mung Laan Thang/ Pu Thang
Tawmvei Kuala Lumpur, Malaysia

GZA PAN HOPIHNA

GZA PAN HOPIHNA

Kipawlna   9:28:00 PM

Miim bang pianna Zogam lei leh sim leitungbup sim le mal aa kikhen Zosuantate khempeuh tungah i biak Pasian min tawh na khut uh hong len-in kong hopih masa hi. Leitung mi khempeuh mawhna sihna pan a tankhia dingin Pasian kimlai mi bang aa hong piang i Topa Jesuh hong suah lungdamna note khempeuh tungah athakin hong tungin, tua lungdamna leh daihna tawh hong tung ding Kum Thak 2016 cidam lungnuam takin na na dawnkim zawh nading-un thupha kong paih masa hi.



GZA min tawh tu le tu-in kong hopih nop hangin kei mahmah pumpi ginat lohna leh damlohna hangin kong hopih mengmeng zo kei-a, ka kisuang mahmah hi. Tu Nipi sungin i minam sungah dahna lianpi khat hong tunga tua pen i muan i suan leh mailam-ah i lam-et ahi Dr. Cing Pum Neam (Dr. Cingkok) hong nusiatna hang ahi hi. Zomite adingin mailam-a a taang i aksi khat pulhkhia ahih manin supna leh dahna lianpi i nei hi. Ei’ deih bang hilo, i biak Pasian’ vaihawmna ahih manin Pasian mah ap-in anusiat anu leh a sanggamte khempeuh adingin thungetsak ciat ni.



GZA pen Zomi khempeuh mapang khawm-a, i vaihawm khopna kipawlna ahi hi. I phuat khiat zawh 2010 kum panin makai honpi kikhopna (2) vei i nei khin hi. A masa pen 2011 kumin Kalaymyo khua-ah nei-in a nihveina 2014 kumin Tedim khuapi ah i nei hi. I minam it tek i hih manin, amasa anunung-in mi (300) sang a tamzaw i kikhawm-a, Zomite’ mailam ding tampi i geel khawm hi. Tu-in zong a Thumveina Kikhoppi neih kik ding hun hong tungta ahih manin anuai-a banga neih dingin kigeel-a, leitungbup aa om Zomi khempeuh in kigingkhol-in i paikim ciat nading hong hanthawn-in kong samkhol nuam hi.

               Amun: Yangon khuapi

               Ani:       2016 kum, November kha (24-27)



Hih Khawmpi dinga geelnate ahunhun-in hong kizasak toto ding hi. Yangon Local Committee-te’ geelna ah ahi thei bangbangin tunna ding leh anneek tuidawn tavuan lak dingin khensat uh hi. Gamdang aa om hong pai thei dingte a hang tuamtuam tawh mihon tawh tunkhawm ding haksatna a omleh, no’ sum bei-in hotel zong kitung thei dinga, Local Committee panin reservation hong bawlsak thei ding uh hi. Local Committee-te’ lam-etna ah mi (400) ciang peuhmah hong kihel thei dingin lam-en uh hi. Mihon vaihawmna suak ahih manin a hong pai thei ding peuhmah in 2016 September kha pawl bangin Local Committee-te tungah theikholsak zo le uh cin cih amau lunggulhna hi-a, theihkholhsak nading address zong hong hawmkhia kik ding uh hi.

I minam bup hong huai khawm leh mai hong nawtsak khawm kipawlna GZA ahih manin a kua mapeuh in hih thu na zak phet mah-un kihel ding lunggulh-in nong hanciam ding uh kong hanthawn phapha hi. Pai nading lamsap sumbei (Travel Expense) bel i minam i itna leh i khualna tawh eimah tekmah kisik himai ding hi.



Tung Pasian in Zosuan tate khempeuh thupha hong piakim henla, kum 2015 nuamtak khum-in 2016 hong mualsuahpih tek hen, ci-in thungetsak-in na khut uh kong len hi.



Note hong it,



Sd/-

Rev. S. Pau Khan En

Makaipi

GZA

Political Science ngah Lungdampihna

Political Science ngah Lungdampihna

Zonews   1:47:00 PM

Zomi minam vai ah mimuan huai gige khat ahi Pu Tual Khan Suan Tongciin khuami in a teenna Tennessee ah Political Science tawh Middle Tennessee State University pan hong Graduated a hih manin lungdampihna kong tangko hi.

Pu Tual Khan Suan (Suanpi) pen Tennessee Zomi sungah makai hong semsem zel aa, tu laitak Zomi Innkuan USA gam sungah Vice President a sem laitak ahih ban-ah Zomi Innkuan Tennessee ah Secretary a sep laitak zong ahihi. Kawlgam ah B.A zo khin hiam khat in ka thei aa(a hih keileh ngaidam), Lailam ki va mahmah khat leh mi ci taktak mahmah ahihna a sang kahpih Rev.Ciin Sian Khai Th.D in USA ah hong pai lai-in hong gen ngei hi.

Galkap ki-ukna pan suahtakna dingin:

(i) All Burma Students' Democratic Front (ABSDF) kipawlna leh,

(ii) Network for Democracy and Development (NDD) sungah kipum piak in Kawlgam a ding na sem tinten hi.

Political lam ah Zomite thahat semsem in Zogam Zomi hong khangcing sak ding Pasian in a tate Tha hong dim kikta hen. A lungdampih...

Thawn Tuang
Nashville TN USA
Dec 27,2015

KHITUI GOSPEL SILVER JUBILEE Pawipi Nuamtak in kizo thei

KHITUI GOSPEL SILVER JUBILEE Pawipi Nuamtak in kizo thei

Zonews   7:11:00 AM

Pasian phatna a kineih khit ciangin Rev. Thang Go Khup in hun apna thungen hi. Amah pen Sia Do Khup Tedim gam sung a vak theih nadingin PHALNA LAI a piapa ahi hi.

Rev. Hau Go Kham in Silver Jubilee KONGPI honna nei a, mutpuak leng khahkhiatna zong nei hi. Mutpuak lengte a mu kha penpenin Jubilee thupha a san theih nadingin sum bangzah hiam ciat tawh kilengsak hi.

“Dawn un Jesu min vangliatna” cih la a kisak kawmkawmin Evan. Langh Do Khup in a pianthak tunglai, a zawn mahmah laitak a, Singgial khua khung a, a phuh uh Singlamteh Sesing gil pua hi. Evan. Thang Khan Khen in Khitui Gospel Dialkhaipi tawi a, Singlamteh tawh a kikimin pai masa uh hi.

A nungthuapin Khitui Gospel pan mahin Evan. Lian Min Thang leh Evan. Cin Khaw Lian in Jubilee ZAM zawng uh hi.


A nungah Church Pastor Rev. Hau Go Kham leh Pastor 25 (Tuiphum, ZBCM, AG, RC leh pawlpi tuamtuam pan) in zui uh a, Pastorte nungah Khitui Gospel Innkuante, mipite in zui uh hi.

Singlamteh leh Dialkhaipi pulpit langkhat tuak ah kiphut a, pulpit mai ah ZAM puate ding uh hi. Pastor 25te in ZAM khatvei ciat tum uh hi. Tualaitakin pulpit mai a, meivak 25 a banban kitangsak diamdiam hi.

Pasian’ mizat ahi dingin Topa in Khitui Gospel tungtawnin sathau a nilh Evan. Nang Do Kap (Sia Naa Kap hong nusia khin) Evan. Tuan Kim Thang, Evan. Thang Khan Thawn, Rev. Langh Za Kapte sung panin Rev. Langh Za Kap leh Evan. Thang Khan Thawn in Khitui Gospelte Pasian in a zatna thu gen uh hi.

“Tuan a sinthu sut leng maw” cih la a kisak laitakin Khanlawhna lianpi khat tung ahih manin Evan. Langh Do Khup kapin leilakah bok hi. Pastorte pawlkhat zong pulpit kah to uh a, Khitui Gospelte thupha pia-in Singlamteh pua uh hi. Mi tampi kapin Topa tungah lungdam ko ciat uh hi.

Evan. Langh Do Khupte nupa kiten zawh kum 30 cinna hun tomno khat lungkim huai takin kizang hi.

Topa tungah lungdam kohna Bawng 5 leh Vok 5 kigo a, pawisim mipi 1000 valin ankuang um thei hi. Pastor teng Ngalsa tawh kituam vak ngiat hi.

Khitui Gospel Media

Dr. Cing Pum Nem (a) Siamah Cingkok

Dr. Cing Pum Nem (a) Siamah Cingkok

Zonews   2:15:00 PM

Kum 50

1. Nu le pa' min: H. Suan Kam & Nu Thian Huai

2. Suah ni : Nov 15, 1965, Tedim Khuapi 

3. Pilsinna:
# 1986 Mandalay University 
# 1994 B.Th, Eastern Theological College, India
# 1997 B.D, Eastern Theological College, India
# 2001 M.Th, Kolkata
# 2010 Ph.D in Development Education, Central Luzon State University, Philippines

4. LbBC ah Christian Social Service Department 2010 pan 2014 dong makaih. 

5. 2014 pan STBA Women Department le CE Christian Education ah makai sem.

6. Tuni dong STBA , WD, CE ah director sem

7. TTBYU ah secretary sem ngei
8. TTWF ah mapang
9. Tedim Local GZA ah secretary sep laitak

10. Pianpih sanggamte:
1) Rev. Nang Khen Khup
2) Ning Khan Vung
3) Cingh Khan Niang
4) Sian Zuan Cing
5) Lian Khan Pau
6) Dr. Cing Pum Nem
7) Nang Gin Hau
8) Sian Dim
Src:TedimPost

Zomi leh Zomism Khaicii

Zomi leh Zomism Khaicii

Politics   8:52:00 PM

Sanggam Ngaih Ngaungaute,


"Zomi" kammal-pen 2006 kumbei-a kipan naakpi-in minam sung-ah honglaang-in hong kipaksak (popular) mahmah-a, internet maaitang hongluah thei-in, minam kikheelna tuihual hong kipan ahihi. Tua tuihual-in sung-ah Zomi huamna singkhuah suangtum honpi khat-zong naakpi-in hong kinuai hong kizuuk khawm-a, aliam-lawh abaai-lawh honpi khat-zong om-hi.


Minam Kikheelna Tuihual hong thahaat sakding Pasian-in 2014 Kawlgam Census (Misimna) hong piangsak-a, "Chin nuai-a code malsim neu khat-tawh luut zawzeen kei-ni, Zomi nampi-a akipat-khiat nading athak-in 914-ah gelh-ni" ci-in tuihual hong thahaat tektek-a, akilawm khom ciangkhat lawhcinna kimu-hi. 914 tuihual inzong singkhuah suangtum honkhat-mah taai ahihman-in aliam-lawh abaai-lawh khenkhat om leuleu-hi.


Minam Kikheelna Tuihual hong thahaat zomto-a, hong tawsawn ding-in Pasian-in Kawl Gamukte zangh-in 2015 Kiteelna hongbawl leuleu-hi. Hih kiteelna akipat nading Election Commission te-in "Zomi omkei" acih huhau-in Zomism khaicii akituh khinsa Australia Zomite, Malaysia Zomite leh Japan Zomite-in "Asia-Pacific Zomi Committee" min-tawh amau' omna ciat-a Kawlgam Palaai Phualpi teng-ah mimal kuan-in otna, deih ngetna leh laiphah puakluutna kibawl-a, asawtlo-in, "Zomi ommah, atheikhial-kha hi-ung" cihthu kiza-in Zomi movement khat alawhcing suak-hi.


2015 Kiteelna takciang-in minam kikheelna tuihual-pen ahual hi nawnlo-in ahaa bekbek phuul vanvan-a, naakpi-in so ziahziah-a, singkhuah suangtum hi nawnlo-in nahthel leh niin bulomte tui-in peii ziahziah-hi.Tuiso hongdaih ciang-in Zomism' sang-in mimal leh akhua, akual, abeh, pau awsuah peuh bulphuh-a tuihual tawn-a laamna dianna hong kilangh-hi, banghanghiam cihleh Zomism-tawh kisai defining and identifying (akhiatna khiatzia leh sehtuahna) lamsang-ah -ism thuguipi -logo-logy khaicii hoihtak kituh manlo-in apuatham sosat heet-huutna ziak hikha dinghi.


Minam Kikheelna Tuihual-pen kizom laai-hi, ahizong-in tuihual luanzia adik keileh guunpiau-a leihoihteng taai-keengmang khading-a, aguh tengbek thaam-in atakteng Tui Kaangpi tawn-in Irrawady Guun tungsuk mang khading lauhuai-hi. Zomism Leicial/Leilet/Zaanglei bawl kipan keilehang leihoihteng beimang khading-hi. Lei kaaiding bawngtal lawital neita hang-a, tua I' bawngtal I' lawital teng-in lei hoihtak hongkaih kei ngeingeileh ankung peuhmah hongdawng loding, khang loding, paak loding, tatah-in huut mang ding-a, tak neilo dinghi.


Leilet akaaiding bawltalte leh lawitalte amansa-in omhi. Tuilam tawh loh-in leicial kikaai zolo dinghi. Leicial-ah tui ahi ideology, theory, practical strategy kicing tak-in aluanleh lei kalhnuam ding-a, lei hoihtak kikalleh khacii po-in dawng hilhhelh ding-a, gah tampi honggah dinghi. Khaicii ahihleh uutna peuh-ah kikhia-thei, kivawh-thei, kituh-thei mahhi, ahizong-in leihoih, hoihtak-a akikal dikdek leitang, tui cihte lo-in kia mawkmawk lel-a, zusa vasa-in aneekmang keileh muat lelding ahihi. Tua ahihman-in leikal/leikaai ding-a akiging khinsa bawngtalte leh lawitalte hoihtak an pia-in, thahaatsak lehang Zomism Leitang hoihtak kikal ding-a, khaicii hoihtak po-in pung thei dinghi.


Zomism Khaicii tuhding kimlaai mah-sah-lah khaicii-te, taanglaai sila kikhawi hunlaai-a tote' kalsuanzia uplehsaanna khaicii-te, "tungsiah maaivil nuaisiah simmawh" uplehsaanna khaicii-te, "leiiba leh sakha nuainung" khaicii-te, "nopawl kopawl" khaicii-te, "no' pau, ko' pau" khaicii-te akipan minam leh nang leh kei kikaal-a gii hong khungthei khaicii-tepeuh I' vawhkhaak hetlohding lunggulhna-tawh,


Zomi Pasian' Thupha!


Zokhai

ZRA N.Thawn Kho Gin in hong nusia

ZRA N.Thawn Kho Gin in hong nusia

Zonews   4:25:00 AM

ZRA first batch lak a dam lai om sun N.Thawnkhogin @ SirJudson in hong nusiatsan ta.

Dec.18, 2015: Zomi Revolutionary Army (ZRA) Chief of Army Staff len ngei, N.Thawnkhogin @ Judson, Pearsonmun khua a om in hun bang tan hiam kalna a thuak khit nung in tu ni in RIIMS zato inn, Imphal ah hong sihsan ta hi. ZRO/ZRA a kiphuatkhiat nung adingin training masa pente lakah tukum tan in N.Thawnkhogin bek dam lai hi ki ci a, Mizoram leh Burma gamgi a om Tuisa dung ah 1993 in ZRA dingin first batch ten training nei uh hi ci'n ZRA Town commander in PhualvaTimes kiang ah tuni takin gen hi.

ZRA adingin a Senior pen Judson in pawlpi adingin a sep sungin hun haksa tampi palsuak hi ci'n kigen a, kikaptuahna ah a bil thautang in kapkha in, a liamma pawn zong muh theih in om lai hi kici hi.

Tu kum sungin ZRA makai poimawh mi 3 kiim in dam lohna hangin hong sihsan ta uh hi. RIMS Hospital a kipanin Sir Judson' luang puakkhiak in om a, a zi-le-tate tawh a tenna Pearsonmun ah kipuak hi. Tu nitak in mipi ten siluang zan hah pih ding uh a, zing ciang in Pearsonmun Hanmual ah kivui ding hi.

Apaisa June 16, 2015 in Thang Len Piang @ Siapiang s/o Cin Za Khup & Ngai Khan Mang of Tonzang, Chin State, Burma in hong nusiatsan a, aman ZRO Ministry of Information & Public Relation ah Director za len a, Shija Hospital ah sinna in si hi. Tua khit a sawt lo June 23, 2015 in ZRO Ministry of Information & Public Relation a Director len Ko Danny Mang Khan Khup (s/o Luah Thawng & Cing Za Lian, Tedim) in hong nusiatsan kik leuleu hi. Tu ni in ZRA first batch lak ah tuni dong pawlpi adinga sem om sun Judson in hong nusiatsak kik hi. 

Topa Pasian in a kha na tawldamsak ta hen la, hehnem siam Kha Siangtho in i dahna leh i kahnate hong hehnem tek ta hen!

Thang Khan Lian

Kum 20-28 te Simding leh Zuihding Thu

Kum 20-28 te Simding leh Zuihding Thu

Thului   9:33:00 PM

HIh lai pen na luat ngah dong phial in sim in .
Kum 20 a pha khin gual lian pen lei tung nuntakna ah a hoih pen hun a hi hi. Ih pumpi a ki khel mah bang in nuleh pa te zong a pi cing in ong mu ta uh hi. Hih gual ih phak lian lai tak in sum zon hun ding zong ki pat thei ta hi a, mai lam ah gual zawh na ding in zong ki pat theih hun a hi hi.

 Pawl khat te’ in hih gual ih phak lai tak in nasep lian pi ki pat ding pen nau pang lai lua hi hang ci in , a hi zong in hih pen a hun hoih pen gual zawhna ngahna ding ki pat ding hun hoih pen a hi hi. Kum 20 gual na hih leh hih teng ciam teh in zing ciang mah mah in ki pan pah lian in.

1. PILNA SIN LAI IN
Na pilna sin man ta hi ci in khawl kha kei in. Na sin beh lai ding ki sam hi. Pilna sin beh in cih tak ciang in nasep tawp inla MBA vala in cih hi lo hi. Na sin theih khem peuh sin ding cih na hi. Bang mah mel lo na tawh hun bei sak lo in , man piak kul lo pilna sin na tam pi om in tua tak ah na pai man kei leh zong online pan in sin in zong in.

2. KHIALH DING LAU LUA KEI IN 
A man lang lua in ih sep nop ciang ki khial thei hi. Khialh ding lau lua in sem kei leng ki zo lo zel ding hi. Nasep khat peuh laih ding nop sak loh na hoih sak loh na te’ laih ding khawng ki kih ta thei hi. Mun thak ah gual zawhna ih ngah ding lam sang in kih ta in lung hi mawh in ki om thei hi. Na ciap teh ding khat in bang zah vei khial khin cih sang in bang zah vei gual zo khin cih ding thu pi hi.


3. SUMZAT DAN , KHOL DAN SIAM IN
Hih pen na tel loh a pha mawh hi. Na sum zat tawh ki sai bang ci bang in zat siam ding cih thu pi hi. A sayin bang in bawl ding hi leng kum 25 na phak a ki pan kha khat 20000 khol ding. A hih kei leh sum zian bawl ding ci leng , kum khat in a met 5% hi leh kum 65 na phak ciang in a vek in ( 300 millions) val bang nei zo ding hi teh.


4. LAI GELH IN 
Ngiim na nei in lai ah gelh in. Ciam teh inla lai bu khat sung ah na sum lawh na tawh ki sai , na ngiimna , nasep nop n ate lim tak in ngaih sun in gelh khia in. Tua dan gelh na tawh ngaih sut huai thak ngah in a hoih zaw lam pi ngaih sutna ki beh lap ding hi.



5. EXERCISES BAWL IN , THU NGEN IN
Pumpi ci damna ding in ki mawl in , lung sim ci damna ding in ki mawl in thu ngen in.

6. KUA MAH TAWH KI TEH KAK LO IN NA NGIIMNA TE’ KHAH SUAH KEN
Na lawm na gual te’n bang nasep nei, sum bang zah lut cih te en in lung kia ken. Na ngiimna na tup na a tang tun na ding hun pia in han ciam in.

7. PIAK KHIANA HAN CIAM IN
Ngah kikna ding lam en lo in piak khiat na ah na hih zawh zah in han ciamin. Sum leh paai neih leh lam bek ki pia khia thei cih hi tuan lo in na pilna , na siamna khat peuh tawh mi te’ a ding na huh zawh na ding in han ciam in.

Kum 20 gual in na hoih na lian pi sep na ding ki pat na ding a hoih pen hun hi ci in han ciam in tha la ni.
Credit Gentleman Magazine
ZNJ

Guankipsa Ngaihsutzia leh Ngaihsutzia Akhanna

Guankipsa Ngaihsutzia leh Ngaihsutzia Akhanna

Politics   6:57:00 AM

Fixed Mindset & Growth Mindset
(Guankipsa Ngaihsutzia leh Ngaihsutzia Akhanna)

"Mindset" akici laibu-pen leitung-a kansuutna (research) bawlna lamsang-ah azaipen leh amuibunhpen makaai khat-a akiseh Carol S. Dweck, Ph.D. -in agelhkhiat laibu hi-a, Stanford University-ah Lewis & Virginia Eaton Professor of Psychology aseem khat ahihi.

Hih laibu-pen Health Science course khempeuh-ah kisin-in, Psychology thusinna khempeuh-ah akisin khat hi-a, khangno English siam khempeuh-in athuukpi-in ahikei zong-in "Change your mindset" laiguui bangpen simding leh theihding akisam mahmah ahihi. Zomite diakdiak-in naakpi-a akisap thuguipite kihel sitset-a, khantohna' ading thuguipite ahihi.

Zomite ataangpi 1948 kum-a kipan tuciang Mah-Sah-Lah Khuaknimna (Brainwashing) ziak-in "Fixed mindset ~ akiguangcip, akisehkip, agawcip ngaihsutzia" vive-tawh akikalsuan ahihna ciantak-a I-theih takciang-in "Changing mindset ~ ngaihsutzia kheelna" piang theipan ding-a, tua takciang-in acidam lungsim leh ngaihsutna lam-ah kihei theipan dinghi.

Na' ngaihsutzia akip bikbek tepawl ahihiam ahihkeileh khanlam manawh ngaihsutzia-lam ahihiam cih naki ze-et nopleh anuai-a link-ah nangma' ngaihsutzia lungsiang tak-in nana ki- ze-et lecin "maan lian-hi" cihpanna ahihloh hang-in "ice-berg" akici akitheilo akimulo abupi' pan-a among dawk ciuciau khat na-mu theiding-hi.

Leitung a-uk mite' pilna leh siamna akici khempeuh ataangpi amau' ngaihsutzia akheelthei mite (those who can change their mindset) vive hi uh-a, ama' ngaihsutzia update (thaksuah) den, khang tuihual-tawh atonkhawm thei ding-a haanciam-den, ama' zaaksa, saanna, theihsa thute "maan-hiam., sepsintheih-hiam (right, practicable)" cih sittel theiden ahihman-in akisepsin theilo nate asaankipna-uh phel thei-in, aki sepsinthei kalsuanzia lam-ah kheel thei uhhi.

Kawlgam khanzil-a Khuaknimna (Zokhai, T. 2015) laibu sung-ah akigelh mahbang-in gentehna khat-ah: Zomi ataangpi' sung-ah hongki guangkip bikbek khat:

"Tungsiah maaivil, nuaisiah ukcip., agualzote maaivil, aguallelte paampaih" hih bekbek en lehang, mindset akici ngaihsutzia hualpi-pen khantohlam manawh hetlo-in Fixed Mindset ~ akikheencip siiktukkilh bang-in kip bikbek laai ahihlam kimu thei-hi. Hih mindset-pen taanglaai BC kum 3000 leh AD 1000 kikaal-a mi athatzo teng lubawk, mi alelteng sila-a kizat Hun Hualpi sung-a kalsuanzia hi-a, tuhun' ading-in khasiat-huai luadeuh-hi.

Ahizong-in ahizong-in ahizong-in, asiate sia toto-in, ahoihte hoih toto tahen, ZEISU Hongpai Dektak Ta-hi! Maranatha!!!

Zokhai

Ph.D icih in!

Ph.D icih in!

Education   4:20:00 AM

Ph.D full form in Doctor of Philosophy hi. A mang lai in Ph.D ci in ki gelh hi. A dang university te in Doctorate ci in zong zang thei uh hi. D.Sc ( Doctrate of Science) ci in a zang zong om hi. A pian zia in First Degree a ki ci M.A or M.Sc ih kah masak kul hi. Sang khat leh khat ki bang lo in kum 1 or 2 a sin om hi. Thesis a ki ci lai a bawl khit tak ciang un lu khu nel kaai sang kha pan uh hi.

A ngei na bang hi leh Master kah lo in Ph.D ki kah thei lo hi. Ph.D a ding in scholarship a ngah vua leh zong M.A kah sak kik uh in Ph.D zom sak uh hi. 

University aki bat kei leh Master a kah lai vua a lai bawl Thesis lah kul hi. Ph.D a ding a ki sam lai ( Dissertation) Proposal gelh masak kul hi. Tua proposal leh a supervisor a om ciang in Ph.D ki zom thei pan hi. Sang kah hun ki bang lo in a thu pi pen in a lai bawl uh tawh ki sai , ngaih sut dan ding , tam pi ki sin sak masa hi.

Dissertation a zawh tak ciang un a mi hi lo in , a lai bawl tung tawn in pia uh hi. A tawm pen kum 3 pan in kum 5 sawt thei hi. Tat san lo in sep kul leh bawl kul hi in , theory thak khat a hih kei leh ngaih sutna thak a bawl uh kul hi. Creative leh product tung tawn in pah tawina a pia uh hi. Hih pen in Ph.D ngeina hi a, Japan gam bang ah Ph.D a piak khit uh teh lai bawl sak phot in a lung kim uh tak ciang in Doctorate pia pan uh hi. A lai bawl sung un Supervisor a en cik khat leh Advisor a ki ci Professor a neih kul hi. 

Tua bek tham lo in a lai bawl a man tak ciang in Defense tut kul in tua mun ah Professor ten thu dong hi. Ph.D ngah na ah lai tam pi thu tam pi sin kul in Defense sung ah a khialh leh zong arnaa lo tak in ki bawl sakkik thei hi. Defense a zawh tak ciang in a vek pi in a zo ta hi in lu khu neel kaai Ph.D ngah a hi hi.ZNJ

Zingsang tung ki silhna hangin hamphatna nam 6

Zingsang tung ki silhna hangin hamphatna nam 6

Thului   9:06:00 PM

1. Zing sang tuung ki silna in si san pai dan hoih sak in, tui vot tawh na ki sil sang in tui lum tawh ki sil le cin hoih zaw lai hi. Tua ban ah na tak sa ciip sak in, tui lum tawh ki sil na in ci damna ding tam pi ong beh lap hi.

2. Ong tang zang sak in, ih thawh tak ciang in ih hih ngiai nguai na teng bei sak hi.


3. Lungsim van gik teng ongbei sak tuam hi.


4. Zing sang tuung lam siauhna / gym ki mawl khit in ki silna in sagap sak hi.

5. California Universtiy pan in mi pil te in a sin na vuah ni kal khat in khat vei ta zing sang tung tui vot tawh ki sil na in pasal te’ sperm hat sak in khang sak hi ci hi.

6. Tui lum pian a hih kei leh tui vot tawh lusil le hang sam pulh tawm tuam in ih sam hoih sak hi. Sam te’ sak in sam hoih na ding in zing sang tuung in ki sil ni.
Ref - venusbuzz

Pu Thang Lian Pau itna leh zahtakna

Pu Thang Lian Pau itna leh zahtakna

Zonews   2:57:00 PM

Zomi Innkuan USA kipawlna in, Zogam leh Zomi-te a’ding a nasem Zogam Galkapte makaih a Zomi-te tui bang kigawmkik zawhna ding hanciam in mapang, gam leh minam itna tawh kipumpiak Minam Makaipi Pu Thang Lian Pau pen itna lak in zahtakna pia ding, a Pawlpi leh a Maban thapiakna thu a sut dingin, Zogam lasiam minthang B. Muan Ngaihte Palai in kicial hi. 

Dec. 2, 2015 ni in Pawlpi phualpi Songtal ah Palai B. Muan Ngaihte vahawh thei a, Pu Thang Lian Pau leh Makaite tawh cidam lungnuam takin itna ankuang va-umkhawm thei uhhi. 

Palai B. Muan Ngaihte in Zomi Innkuan USA kipawlna tang’in zahtakna piakna leh holimna picing takin hong neihsak thei hi. Palai B. Muan Ngaihte tung ah nakpi takin kilungdam hi. 

Pu Thang Lian Pau zong cidam thahat takin gam leh minam mabante picing takin mapang zo cih thu kizakik a kilungdam mahmah hi.
EC/ZIUSA

Bawlungsiam Ronaldinho thu tawmcik

Bawlungsiam Ronaldinho thu tawmcik

History   10:21:00 AM

Bawlungsiam Ronaldinho thu tawmcik!

1. Ka mintak pen Ronaldinho hi lo hi. Bawlung ka suih tung laiin neulai lua ka hihman in mipi te'n Ronaldinho cih min hong pia uh hi. Kumcingsa te suihna ah ka kihel ciangin Ronaldo dang khat na om sawnsawn ahihman in ka min dingin Ronaldinho a ngah suak ka hihi. Ronaldhinho pen Ronaldo Neuzaw cihna hi. Ka mintak pen Ronaldo de Assis Moreira hizaw hi.

2. Amah pen sia in pha leh nuihmai den ahihman in mipi in deih mahmah uh hi. "Bawlung pen kei a dingin ka lawmhoih pen leh ka bangkim ahihi. Bawlung om kei leh a nungta zo lo ding pa ka hihi. Ka melsia mah leh ka maitaina tawh mi tampi lungsim sungah mun ka ngah hi" ci hi.

3. "2007 kum, Barcelona Team ah bawlung ka suih laiin ka Coach pa tanu kum 20 a cing pan liailiai Lindsay a kici tawh kingai kha in, ka kilim thuah mahmah uh hi" ci hi. Tua hangin amah leh Coach pa kikaal ah kitelkhialhna om a, minphatna a ngah ding zah zong ngah loh lawh pah ek hi.

4. "Jersy Numbat 10 pen ka Numbat deih penpen ahihi. Barcelona pan ka taikhiat ciangin ka lutna AC Milan Team ah Numbat 10 a silh om khin ahihman in ken ka silh dingin mi silh tawh akibang lo Numbat 80 ka teel hi" ci hi. Amah pen Bawlung siam minthang khat ahihna tawh Jersy Numbat a deih teel khuan ngah hi.

5. "John Terry leh Paolo Maldini mah bawlung suihna ah ka mi phut khak lakah hamsa sa peng ingh" ci hi. (Tuazah cifot tawng ei!!)

Lam Thang

Khepi cin tumlohna dingin

Khepi cin tumlohna dingin

Thului   6:57:00 AM

Khe cin a tum na lak ah khepi cin tum pen a tam pen hi din ghi. Khecin tum in san, bawk in na gawp hi.

 Cin ih tan lai tak in a cian teng in ih khe me ki kal ah tum suk in ih khe mong te' on gbawk sak hi. Khat vei vei nai suak in na mah mah hi. Hih teng a pianna a hang in cin ih tan tak ciang in lim tak in tan siang lo , khedap a ki gak lua bulh, kheme teng a gak cip khe dap bulh na te hang in piang thei hi.

A zen zen in gulut a hih kei leh na khe mekbawk in , zun khum natna , sivui neu natna na neih leh siavuan lak ham tang in.

Khecin gu lut in a bawk leh a nuai a teng a hun lap in hih le cin na natna dal thei ding hi the.

Na khe cin a tum theih na lam pen tuilum sung ah ci si keu 2 / 3 tawh hel in tuilum a hoih bek lian tawh diah in khat vei na diah sim in 10mins ta sawt sak in la ni khat in nih vei ta diah in. A bawk ding a ki patna mun ah plasta belh in.

Khe dap bek bulh in. Na khecin a tum a nat a dam mateng khe cin tan ken. Cin san za zut, a hih kei leh cin san za a bei sak za te’ bawl kei in.

KOI CI KI KEP DING !!
A hoih pen ki dop na in na khe lim takin kep siam in. Nisim in na khe sil in, na khe na sil khit ciang in lim tak in keu sak in. Khe me a ki gawm sak khe dap te’ bulh ken. Na khe muk a ki hong lam te bulh in la mawza na bulh leh zong laih pah pah in. Na khe cin na tan ciang in na khe cin a nip na ding in tui lum sung ah 10 mins bang diah masa in. A hiam mel lo cin tan na, zang kei in. Na cin na tan khit tak ciang in lim tak in zut in. Na khe cin a tum ngiat nam ahih leh tui sung ah diah masa ham tang in la bang mah tawh sun suk se kei in. ZNJ

UN Khawmpite akah ding Tangmi/Palai Sapna

UN Khawmpite akah ding Tangmi/Palai Sapna  

Kipawlna   10:19:00 AM

Zomi Innkuan USA

Executive Committee

=====================================

THUPULAKNA



UN Khawmpite akah ding Tangmi/Palai Sapna



Zomi Innkuan USA kipawlna in United Nations Economic and Social Council (UN ECOSOC) nuai ah Civil Society khat hihna tawh Consultative Status dinmun kingah ahih manin UN Zumpite ah kumsim in akibawl Khawmpi tuamtuamte akah dingin Tangmi/Palai kipuak thei hi.



A sawtlo in, United States gam, New York khuapi a United Nations Zumpi ah akibawl ding anuai a Khawmpite ahzong Zomi Innkuan USA kipawlna tang’in Zomi Tangmite/Palaite kipuak sawm hi.



1.      Leitungbup Khangno Khawmpi

Youth Forum (ECOSOC YOUTH2016)

01 - 02 February, 2016



2.      Khua leh Tui Khantohna tawh kisai Khawmpi

54th Session of the Commission for Social Development (CSocD54)

03 - 12 February, 2016



3.      Leitungbup Numei Khawmpi

60th Session of the Commission on the Status of Women (CSW60)

14 - 24 March, 2016



Hih Khawmpite akah nuam, a nuai a dinmunte tawh a kituak Zomi khatpeuh in December 27, 2015 ni lap-in thu leh la kicing tawh Tangmi/Palai dingin kingen thei hi.



Ahuampi in akisam dinmun:

1.      Zomi hi ding hi.

2.      US gam sung ahilo, gam dang pan ahihleh, Passport anei hiding hi.

3.      Pilna laitan kician anei, English pau atelthei khat hiding hi.

4.      Zomi Innkuan USA kipawlna, a Mabante leh Zomi Movement a thukim/tha apia khat hiding hi.

5.      Khawmpi kah dingin kuanna ciahna lamsap a kipan, zintunna ding leh annek tuidawn ding khempeuh amah leh amah a kisikzo khat hiding hi.





UN Khawmpite akah ding Tangmi/Palai Sapna (azom)



Khangno Khawmpi ading akisam dinmun:

1.      UN kipawlna in aciangtan khangno hihna kum (35) nuaisiah, kum (18) a cingkhin hiding hi.

2.      Zomi khangno kipawlna khatpeuh ah Makai panmun alenngei khat, ahihkei leh, Zomi Movement maban khatpeuh ah ma apang (Volunteer) ngei khat hiding hi.



Numei Khawmpi ading akisam dinmun:

1.      Zomi numei hiding hi.

2.      Zomi kipawlna (numei kipawlna) khatpeuh ah Makai panmun alenngei khat, ahihkei leh, Zomi Movement maban khatpeuh ah ma apang (Volunteer) ngei khat hiding hi.



Zomi Innkuan USA kipawlna tang’in Khawmpi akah dingin a kiteel peuhmah in Zomi Innkuan USA kipawlna tawh thukimna laipi khat kibawlsak ding hi.



ZIUSA Tangmi/Palai dingin UN Khawmpi akah nuam khatpeuh in, ahihkei leh, thu leh la a kim in a theihbeh nuam peuhmah in anuai a Makaite tung kiko thei hi.



Executive Committee

Zomi Innkuan USA



Tulsa, Oklahoma, USA.

December 8, 2015

======================================



Contact:



Pa Go Sawm Khup

General Secretary

GSKhup@ZomiInnkuanUSA.org



Dr. Do Khan Khup

President

Zomi Innkuan USA

dkkhup@gmail.com

Zo Sunni leh B Muan Ngaihte Holimna

Zo Sunni leh B Muan Ngaihte Holimna

Biography   1:04:00 PM

Manlahna tampi kawmkal ah Zo Sunni Media tawh holimna ding hun ong pia B Muan Ngaihte tungah lungdam hi. Amah pen Lamka a om khangthak Zomi te lakah a etteh huai khat hi in, Zomi ading a siamna leh a hihtheihna khempeuh a piakhia mi thupi mahmah khat ahihi.

Zo Sunni: Lawm aw nang thu tawm khat nong gen masa thei diam?

B Muan Ngaihte: Gen thei mah ning ei. Kei ka minpi pen B Thanglungmuan Ngaihte hi. Ngaihte Beh sungpan Biangtung suan ka hihman un ka min patna ah ‘B’ a zangh ka hihi. Ko unau pen pasal 4 leh numei khat hi in, kei a upen hi ingh. Ka neupen uh numei hi. Pianna nulehpa in hong dampih lai uh hi.


Zo Sunni: Sangkahna lam eleh, bang ciang tung?

B Muan Ngaihte: Reyburn College pan taan 12 ka zawh khit ciangin Churachandpur Government College ah B.A na zo ingh. Tuta dih in tua ciangin hi phot.


Zo Sunni: La leh Music lam tawh na kinahvawh dan hong gen dihve?

B Muan Ngaihte: 2009 kum panin la bawl na kipaningh. Keima aituamin Album khat 'Pianna Zogam (Zogam Government)' ka na bawl a, Pu Thang Lian Pau in hong Release sak hi. Tua banah Nangcy Bialun in a bawl 'Muikhuazing' Album sungah keima phuah zawlla 'Khuam bang kip ni' cih pen amah tawh ka sa khawm uh a, tualo dawng khat kei mimal in zong na sa ingh. Pasian phatna la leuleu ciangin dawng 10 bang ka sa khin a, tua teng lakah Dr. Suan Za Khup ina phuah 'Nong hehpihna manpah' Tawldam hiuhiau' cihte mipi tampi in hong theihpih uh hi. La pen dawng 30 val na sa khin ingh. Video akizaih nai lo la honkhat nei lai ingh. Tua banah ko unau sungah kei banga lasak uk khat om lai hi. Amah pen kei nuai a hi in, Lamka pan Global Zomi Idol kiteelna ah Top 6 sungah kihel zo hi.


Zo Sunni: Zomi lasak leh laphuah siamte sungah kua na paakta pen a, khangthak zomi te a dingin kua etteh huai na sa hiam?

B Muan Ngaihte: Mi dangte a paakta lo hi keng, ahihang Pu Lengtong Pauno leh Thawnkham tegel pen Laphuah leh lasak lam ah paakta phadiak ingh. Bang hangin amau tegel min genkhia tuam ka hiam cileh  Zogam la a phuahte uh tudong mah ka nuntaakpihte ahihi. ‘Zomi ka hihi’ cih leh ‘Zogam aw’cih bang pen hoihsa pha diak ingh. Amau mah bangin la ih phuah ciangin lakam ih tam zat lehang hoih ding hi. Tua ahikei leh asawt lo in ih lakam hoihte hong mangthang ding hi. Gospel lamah Sya TSKhai zong paakta mahmah ingh. Steven Mang bang pen Zomi khangnote adingin etteh huaisa ingh.


India Zomi te lakah Sya Paukhansiam bang thupisa mahmah ingh. Zogam a veina la a phuahte bang pen tuni dongin tul thei nai lo a, thaksuah denden laai hi. Gospel lamah Sya Pumkhawthang Tonsing thupi ka sa penpen hi. A late in tuni dongin tha hong pia den lai hi. Zomi lakah laphuak siam tampi om a, a vekpi un zahtaakna pia ingh. La ih phuah ciangin khualak a ih zat kammalte sangin lakam mah zangh ngiatngiat zo lehang hoih mahmah in um ingh. Pu Lengtong Pauno in Facebook sungah lakam tampi hong gelh pen a veina thupisa mahmah ingh.


Khangthak Zomi lasak siamte lakah India panin Jenny Zenthiansiang siam ka sa hi. Kawlgam Zomi sung panin Zambawi leh Saannuam cihte siamsa ingh.


Zo Sunni: Minam vai ah bang hun akipan khanlawhna ngah a, bangci ciangin minam makaite tawh kithuahna nein a hiam?

B Muan Ngaihte: 1980 kiim in ZNC sungah ka pu leh ka pa te luangkham in na kipia khia uh hi. Ka neulai pek a kipan minam itna thu kikupna te zaza ka hihmanin ka lungsim sungah minam itna hong om pah hi. Tua banah 1997 kuma Zomi-Kuki kibuai ciangin minam gaalkapte kipiakkhiatna thute ka zakzak ciangin ka lungsim sungah minam itna leh veina hong khang liansak  semsem hi. Siang gen lehang minam ka veina bulpi pen ih minam makai luite leh tulaitak a ih minam makaite hang hipi pen hi.



Zo Sunni: Muntuam gamtuam a kikhenthaang Zomi te lungsim bangci bangin gawm khawm kik thei ding? Nang ngaihsutna ah bang lampi tawn lehang hoihsa pen na hia?

B Muan Ngaihte: Zomi te a kikhen lo ding pipi a kikhen ih hihmanin mituam satuam kisakna lungsim hong om a poi mahmah ka sa hi. Ahizongin tuapen a puahpha dingin minam veina tawh kipawlna tuamtuam na om hi. Adiak in ZRA/ZRO mapanna nungthuap huai ka sa hi. Mipi in makaite ih telkhialh hun om kha ding hi hi. Himahleh ih makaite thu nial lo in zui peuh lehang Zomi bup adingin hoihpen in um ingh. Amaupen Minam kipumkhatna ding lungsim nei vive uh ahihman in amau tawh tonkhawm in thungetsak lehang hoih pen ding hi.


Zo Sunni: Minam vaiin Kawlgam a Zomi te omna Zogam bangzahvei hong pha khin na hia?

B Muan Ngaihte: Minam vaiin Zogam thumvei hong pha khin ingh. A kahtveina Tuithang dong na pai ingh. A neihveina pen GZA Khawmpi in Tedim nap ha ingh. A thumveina pen Mangkam hilh dingin Tedim mah nap ha leuleu ingh.


Zo Sunni: Nang pen minam it mahmah khat na hihmanin ZNC/ZCD tawh kizopna nei ing hong um ingh. Bang ciang kizopna nein a hia, nong gen thei dia?

B Muan Ngaihte: ZCD tawh Personal in kizopna nei liang keng. Ahihang minam Party ahihna tawh kei aituam bangin ngaihsun in na kinei sak mahmah ingh. ZCD ih neih pen angtang mahmah ingh. ZCD gualzawhna lungdampihna zong kei mimal in lai na khak ingh. Tedim ka pai tungin Pu Cin Sian Thang leh Pu Gin Kam Lian tawh niangtui dawn khawm in ZCD zumpi na pha ingh. Tuni ciang dong Pu Pau Lun leh Pu Gin Kam Lian tawh Viber panin na kithuza den ungh.


Zo Sunni: Zomi Innkuan USA in ZIUSA min tawh Pu Thang Lian Pau khiangah Zahtaakna leh Pahtawina pia dingin palai hong semsak cih thu na za ingh. Na palai sepna na lawh cing hiam?

B Muan Ngaihte: ZIUSA te’n Minam ading a mapanna te uh thupisa mahmah ingh. Pu Go Sawm Khup tawh FB leh Viber pan in na kiho zel ungh. Tutung Pu Thang Lian Pau khiangah palai dinga kei sese hong seh uh pen ka lungdam mahmah hi. Palai sepna tawh kisai bel lawhcing mahmah cih ding hi. Pu Thang Lian Pau tawh minam vai tampi tak na kikum thei ungh. Amah zong lungdam lua ahihman in ak hong gawh a, amah tawh ankuang na um khawm thei ungh.


Zo Sunni: ‘Singtanggam’ leh ‘Zogam’ cih tawh kisai nang ngaihsutna nong gen thei diam?

B Muan Ngaihte: Singtangmi cih ciangin Mualtungmi or Indigenous People cihan hilel hi. Hih pen minam a dingin zat theih hi lo a, Political view tawh zong kituak lo hi. Zomi ih hihmanin ih tenna gam pen Zogam dingin na pom in na kipsak ingh.


Zo Sunni: Zomi it mahmah napi Zomi Party a deih lote nang bangci muh?

B Muan Ngaihte: Ih minam Party khat lawmlawm thapia lo cihpen haivai kisa mah hi. Ahizongin ZCD ngiim leh tup, ZCD a thupitna hong telpih loh man uh hizaw dingin um mawh ingh. Zomi vive mah ahihman un tuambawl lo in ZCD vai a tel theih ding un genpih ding thupisa ingh. Tulaitak Zomi hinapi ZCD hong deihlote pen amit uh hong keuh theihna dingin itna tawh zawn in thunget sak ding kisamsa ingh.


Zo Sunni: Mailam ah minam ading ngiimna sawmna bang teng nei na hia?

B Muan Ngaihte: Ka tupbulpi pen a hileh Myanmar-India leh leitungbup Zomite kigawmna dingin Pasian hong makaih bangin nasep sawm ingh.


Zo Sunni: Tuazah ciphot lo dia leh mete. Lungdam mahmah hi. Pasian in na ngiim na sawmna teng hong tangtung sak henla, kum tampi hong cidam sak hen.

B Muan Ngaihte: Amen. Kei zong lungdam ingh.


- Zo Sunni Media

ZCD Gualzawh Topa tung Zomi bup lungdamkohna Pawipi kibawl ding

ZCD Gualzawh Topa tung Zomi bup lungdamkohna Pawipi kibawl ding

Zonews   2:02:00 PM

ZCD gualzawh Topa tung Zomi bup in lungdamkohna Pawipi December 11,2015 ni Tedim Khuapi ah thupui tak in kibawl ding a, Zogam khua tuamtuam pan Pawisiim kipai zihziah ding ahihman in zin 1,500 pan atungsiah pha ding in kilam en hi.

Hih Zomi Bup lungdam kohna pawipi ah Thugenpi ding in USA gam pan Zosiam Pu Rev Pau Khan Khai ongleeng ciaiciai ding hi.

Hih Pawipi sung ah zatding in Anuai a Minam it ten piakkhiatna nei uhhi.

1.Rev Dr Do Suan Mung Ks/100,000
2.Rev Dr Nang Sian Mung Ks/40,000
3.Phaileeng ZCD Ks/25,000
4.Pu Gin Kam Lian Ks/500,000
5.Pu Thang Deih Khup Ks/500,000
6.Pu Thang Lian Lam Ks/40,000
7.Pu Hung Mang Sial khat
8.ZIUSA-$-?
9.ZIS-$-?
10.ZAM-$-?

Tualo Darkhai ah Bawng 5 kigoding ,

Talek, Tumui,Zampi khuate ah zong ani kibang lo in kibawl tek ding hi.

# ZCD in hibang gualzawhna ong ngah peen ataktak in Zomi khempeuh gualzawhna hi a ilungdam ding ahihi. Pawlkhat in NLD ten zong pawibawlllo pi ZCD in kidop huai peuhcin a awngawng ki om hi. NLD leh ZCD genteh cih limlim pan telsiam ziau ni. ZCD paakta mello te hi cihsan mai ni. NLD in nisim phial pawibawl cihkhawng azakha lo hilel ding hi#


Thang Khawm Pau Zomi

Facebook neihpa Tangthu Tombo

Facebook neihpa Tangthu Tombo

History   10:17:00 AM

Khangno a tamzaw in facebook zatnuamsa mahmah uh aa, a bawl khiapa Pu Mark Zuckerberg tangthu tomno gen dihni. Amah pen May 14,1984 ni-in Dobbs Ferry, New York, USA a mipil innkuan sungpan hong piang hi. Apa in inn tawh kopin ‘ha’ bawl in innkuan kivaak nading sum zongin anu in tanu tapa li aneih ciang dong lungsim lam tawh kisai siavuan sem hi.


Mark, kum 12 a phakin Zucknet kici message kipuak theihna programme hong bawl masa hi. Hih Zucknet zangin a pa nasepna inn dei sungte ah nuamtak a kizop theihna dingin hong zang hi. High School hong tun ciangin Pandora kici music software khat hong bawlin AOL le Microsoft te-a kipan company tampite in lei uhi. 2002 kum, Phillips Exeter Academy pan degree angah khit nungin Harvard University ah pilna hong sin to hi. 

A kum nihna kumin Ivy league kici kipawlna ah hong kihelin software lamah asiamin hong minthang mahmah hi. Tua laitakin Course Match kici programme a bawlsan laitak zong ahihi. Tua zomin Facemash kici programme hong bawl a asang vuah hong minthang mahmah ta hi. A sawt lo-in Harvard sangnaupangte kizopna network ahi Harvard connection hong phuankhia a sangnaupang khat le khat kizopna internet website khat hong suak hi. 2004 kumin Mark le alawmte (Dustin Moskovitz le Chris Hughes) in mimal khat ciat thulela leh lim (man)te kikhak theihna banah khat le khat kizop theihna facebook kici internet page khat Harvard sangnaupangte boarder sungpan hong phuankhia uhi. Mark in facebook ah a hunbitin semnuam ahih manin a sangkahna pan khawlin California State, Palo Alto ah hong kituah hi.

 2004 kum bei ciangin facebook azang mi Teng khat bang hong pha hi. 2005 kum May kha in Mark nasepna ah Accel Partners te sumbul US $12.7 million tawh hong kihel uhi. 2005 kum, December in hih website azangmi 5.5 million bang hong khangto hi. Mark le facebook website in khantoh lam manawh toto in 2010 kumin Time Magazine te etna ah 2010 kuma misiampen mun hong tung hi. Sum hauh cihtakin hau a million tampi tak mah cimawh gentheite huhna dingin piakhia ziahziah hi. Tu ni ciang dong mah khangno lakah a gualzo pen khat mahin om lai hi. A man, “Simply put: we don’t build services to make money: we make money to build better services” ( Sianggen mahmah le’ng, sum zon nading a hih nasep a phuankhia hi kei ungh. Ahoih zaw a na a kisep theih nading deihna tawh sum a zong hi zaw ungh), ci hi.

A zi ahi Dr.Priscilla Chan(Chinese-Vietnamese minam) tawh kum 2012 in ki teeng uh aa, Nov 2015 in Tanu Lia Max neih uhhi. Ta hong neihzawhteh Mark Zeuckerberg te nupa in $ 45 billion tawh mi cimawhte huhna in zangh ding cih gen hi. Kum 31 a phapan khakhat bek ka ki halpih ka khangualpihpa leitungah hong minthang mahmah hi. Pasian in mi gentheite a huhzo semsem dingin a pilna aneihna te hong phungvuhsak semsemta hen. Lungdam

Thawn Tuang
Nashville TN USA
Dec 2,2015

A (9) veina Siamsin Seminar & Siamsin Golden Jubilee (1965-2015) nuamtak kizo

A (9) veina Siamsin Seminar & Siamsin Golden Jubilee (1965-2015) nuamtak kizo

Zonews   9:02:00 PM

November 23~30, 2015 sungin Heilei khua ah Siamsin Seminar IX "Pluralism & Unity" thulu tawh Heilei khua ah kibawl hi. Kawlgam sung mun tuamtuam pan sangnaupang Siamsin mimal 107 kihel thei in, thusunna Dr. Sian Nun Siam (MBBS-Mdy) Siamsin Senior in "Pluralism and Unity" thulu tawh Seminar hongpia thei aa Census Result Data Workshop zong hong bawl pih hi. Sia Dal Siam Am (Freelance Trainer) in "Pluralistic Democracy" , "Natural, Human and Capital Resource Development"thulu tawh Seminar hongpia thei hi.

27 November,2015 in Zomi Siamsin Kum 50 cin Golden Jubilee mualsuang phuhna kinei aa Mualsuang honna hong neihsak ahi Pu Go Suan Khai (Administrative Director~Tedim Township) leh U Dongh Khan Nang (ျမိဳ့နယ္ဥိီးစီးမွဴး -စိုက္ပ်ိဳးေရး) ,U San Thang Vel (ၿမိဳ႕နယ္ဦးစီးမွဴး -ေျမစာရင္း) cih bangin Pu te hong kihel thei uh aa Siamsin Golden Jubilee Service nop takin ki gualzo thei hi.

23 nov. Zintun ni
24-26 nov. Seminar
27 nov. Jubilee
28 nov. Excursion to Len Nupa & Suang Innka
29 nov. Worship Service with HBC & Farewell and Concert
30 nov. Zinciah

Lungdam kohna;
1. Heilei Siamsin Innkuan tungah
2. Heilei khua Hausa Upa tungah
3. Mun leh mual hong kawm HBC tungah
4. Jubilee hong lawpsak 
* U Go Suan Khai tungah
* Rev. Pau Khan Khai tungah
* Pa Zam Thuam tungah
* Tg. Cin Suan Mung tungah
* Pa Langh Suan Mung tungah
* Pu Khup Za Hau le Pi Dim Sian Cing te innkuan tungah
5. Pawi hong piankhiat na dingin nasem Comittee tuamtuam te tungah
6. Heilei khua, khuanu khuapa akua mapeuh tungah
7. Thu hong vaihawm pih Siamsin Senior te leh agim atawl lawm leh gual teng tungah
8. Local tuamtuam aom ZSK tung hong tawn piakkhiatna khempeuh tungah
9. Kawlgambup Siamsin makai, Siamsin mimal tungah

Zomi Siamsin Myanmar min tawh
Lungdam thu ka hong pulak uh hi.

‪#‎Tukum‬ Siamsin Seminar IX & Siamsin Golden Jubilee haksatna tuamtuam te kantanin, lawhcing takin ki gualzo thei hi.

Photos Bosco Lian