1994 Oct 24-24 sung ZCLS hanciamna tawh Leipi Tuiphum Biakinn ah Zolai Seminar om a, thu tampi kikupnawi khit ciangin Siapi Kam Khaw Thang in,"Eite pen a thei zaw a siam zaw om lo-in, a kibang gual vive i hih manin gamdang mi linguistic expert khat peuh in 'hi cih gelh un' hong cih lohin thukip om theilo ding hi," ci-a tua mah tu ni dong thungakna ahi hi. Siapa cih takin Zolai tan 4 tek i hi tek mah hi. Ahi zongin tu in ZCLS' hanciamna mah tawh tu kum sungin tan 5 leh 6 sin theih ding Zolai Bu kibawl a, kizo dek ta hi cih a kizak manin i lungdam mahmah hi. I ci ta zongin Zolai pen Zomite mah in i zuun kei leh mite'n hong zuunsak ding hi lo a, Zolai i zuun loh manin Zokam pau thei khempeuh in Zolai thei lo zel hi. Tua hi a, Zolai mal khenzia ding tawh kisai-in nunga maban tawm ka hong pulaak kik nuam hi. Hih pen kei ngaihsutna hi lel a, nang muhna tawh a kilamdan khak leh advice, comment-te hong welcome mahmah ing.
1) Zopau pen kop nih ta aa, a leng pau nam hi. Gtn : Mangpu koi-ah paiding nahia? tua bang danin i gelh kha pah hi. Lakamte ah kitel zaw lai ding hi. Cingkok navang mubang kong ngaihna sialbang lianlua. A taktak-in cileng i gelh ciangin tuaci koplen-in gelh ding hi lo zel hi. Mangpu koi-ah pai ding na hia? cih ding hi a, Cingkok na vang mu bang kong ngaihna sial bang lian lua, ci-a khen aa gelh sinsen ding hi. Bang hang hiam cih leh tehpih kammalte pen i khen hamtang ding hi. Ahi zongin lakam pawlkhatte pen khen loh ding hi zel hi. Gentehna : tang= sawmtang, sawmsial, tui= Sautui, Dimtui, Geeltui cih ding na hi leuleu hi.
2) Min i gelh ciangin laimal gam puah huai ka sa hi. Na sim lecin a khiatna hong kilamdang mahmah ding hi.
2.1 Cin leh Ciin pen i khentel thei khin zo hi.
2.2 Do leh Dou ; Do cih pen hong do tam, hong lampang tam cihna hi. A hi zongin Dou cih pen zinleleng a dou, a vak tam cihna hi zel hi. Tua hi a, tangthu sunga Lian Do a i gelh pen Lian Dou dingin kilawm zawtham hi. Tua bang dan kammal honkhat a aw sang, a awniam i nei hi. Pawlkhat en dih ni;
2.2.1 sou = A galpa lampi ah sou a dawh hi.
2.2.2 pou = Lo ah vaimin a pou hi.
2.2.3 zou = Mual dawn gam hoihnate zou kici hi.
2.2.4 tou = Gal Ngam in Hang Sai a tou hi.
2.2.5 hou = Dolhou (baaldol) leh saphel huan leng a lim hi.
2.2.6 kou = Mihaupa in mizawngpa a kou hi.
Hih bang danin Cope Topa in zong tuu leh tu, inn le in cihte hong bawlsak khinzo aa, adang pawlkhatte eite' sep dingin hong nusiat ahi hi. Tua hi a, Z = Zoumite hanlung ciam khangto diam! a cih huai kei zaw tam ka ci hi. A AW kikhel zui-in i puahtheih ding om ding a, vowel tawh i puah theih ding om ding hi. ST Hau Go in zong hih bang dan na mukhol ahih manin a Khristian Labu sunga, awsang, awniam, awlai a kitheih nadingin sign, signal na zang hi.Sente bang in 'Ng' bek nangawn zong aw suakin sim thei hi. Puah huaite puah leng, siatzawkna kai sam ding ahiam? Kham, Kim, Lam, Lang, Mang, Niang, Tual, Vung, Vum, Khen cih kammalte pen a kiatna tuamtuam nei ahih manin ngaihsut huai ding hi.
3. Munlak kammalte(Preposition) tawh kisai-in; A beisa-in i zatzia hi bang hi. Tedimah khua a dam hi. Hih pen Tedim leh ah cih pen kimatsak ding hilo zaw a, a munlak kammal 'ah' pen tangdin leh hoih ka sa hi. A hi zongin munlak kammal nihta kigawm Zokam ah tam mahmah hi. Tuate pen kigawm leh dik ka sa zaw hi; sungah, pua-ah, tungah, nawlah cih bang danin ngaihsut huai hi.
4. Neihsa (Posessive) a lak kammalte i gelh ciangin; Hih laibu kei aa hi (kei' aa ci-a a postrophe kisam lo), Hih laibu kei ading hi( ' kisam lo), Hih laibu kei' laibu hi( ' kisam zel hi), Hih laibu keima aa hi( ' kisam lo).
Zomi a bei kei buang leh Zopau beilo dinga Zokam a kipau lai ten Zolai i zat kul ding hi. Zolai pen a om bangbang aa koi ding sangin puakzek zuunzek ding mah kilawm zaw ding hi. Cope Topa in zong a gelhcilte leh a nunung lam-a a gelhte kilamdang toto-in puah to kawmkawm a hihna i mu hi. Zolai pen eite tel ding bekin ngaihsun lo a, midangte' sin theih dingin ngaihsun leng i puah nopna lungsim hong lian ding hi. Zolai a kin a munmun ah ki-om keukeu ahih manin i Zolai a khangto ding ahi hi. Laibu khat bawl leng Zolai a khangto hi pahpah hi. Zolai man takin at theih ding hih thusuahpa in a lunggulh den hi. I Lai le i pau in simlei zel ta hen!
Suang Khen Pau
No comments:
Write comments