Nang koi pen hoih na sa a.

Leitung paiziate kikhelkhel in van le nate a thakthak om toto hi. Pilna a thak siamna athak, nisim nuntakzia nangawn athakthak in kikhelkhel hi. Nidang I nuntak ngei dan in kiom thei pha nawn lo hi. Hih bang khua hun sungah mihingte thu pomzia, thungaihsutziate zong kikhel toto hi. Thu ngaihsutziale thupomzia tuamtuam te ( philosophy ) gentelna nam tampi om dinga hih lai ah ahuampi in khenpi 3 in a khen mipilte thupomzia pawlkhat I kikum ding hi.

 Tua thupomzia nam te in

 

1)  Formal Logic ( Siingkuang le Aikuang thupomzia )

2) Dialectics        ( Lengtong Hoih thupomzia  )

3) Trialectics       ( Suangthu Thum thupomzia )
cih bangin nam thum in na kisuut hi.

 

( 1 ) Formal logic  ( Siingkuang le ai-kuang thupomzia )

 

Neino tangthu sungah Lusuangte in Neino a deihgawh uh ciangin Nantal in pia nuam hetlo hi. Neino in zong Nantal mah tel zaw hi. Tua ciangin Neino in Nantal le Lusuangte nek dingin an bawlsak a, khat pen singkuang hi in a khat pen aikuang ahi hi. Nantal mai ah singkuang koih sak a, Lusuangte mai ah aikuang koih sak hi. Ahi zongin Nantal in Ai-kuang ne kha veve ahih manin sih lawh hi.
Tua ahih manin hih thupomzia pen “ Siingkuang le ai-kuang thupomzia” (Formal Logic ) ci in min I pai hi. Thu nam nih bek om a, khat pen nuntakna ci in a khat pen sihna hi cih thupomzia ahi hi.

 

( a ) Thu bulletzia

 

Hih thupomzia abulphuhte in na khempeuh ama mimal muhna ama theihna bek tawh tehkak hi.  Khat vei atheih ngei amuh ngei thupiang khat  pen apiang tawntung dingin la pah hi. Khuahun paizia le thupiang tuamtuamte zui zolo hi. Na khempeuh kikhel mengmeng loin kip tawntung zaw hi ci in sang hi. Na khempeuh a kizom dimdiam in mu loin, ama ut khat peuh bul let mahmah hi.

Nate thu ( sciences ) pilna lam ah zong hih thu thubulletzia pen tuma kum 2500 val Socrates te hun pan kipan Isaac Newton hun dong  akizang thuppomzia ahi hi.

 

( b ) A lim le mel

 

Hih thubulletzia aneite in na khempeuh a hi linlian in mu uh hi. Avom ahih keileh a kang.  Kapawl na hih keileh ka lang. Ahoih keileh a sia. Piangthak maw piangthaklo. Ong it maw ong mudah. Ci lianlian hi. Tua banah Gtn;  Guta hi ci in  atheih ngei khat pen a khantawnin a guta ding mah in ngaihsun hi. Party khat peuhah member ahi ngei khat pen a khantawnin member ahi dingin ngaihsun hi.  Apa lasiam ahihleh atate zong la uk le lasiam dingin um pah hi. Khua le tui, beh le phung siksan in thugen nuam diak hi.

 

Na pil nopleh, na hauh nopleh, na siam nopleh, khantohding I ut leh, kipumkhat ding I ut leh cih bangin na khempeuh gen lianlian lel hi. Ama muhna ah na nam nih ta bek om sak hi.

 

Na khat peuhpeuh a et ciangin na dangdangte tawh a kizom dimdiam in en loin a malmal in en zaw hi. Suangtum pen akhiatna gen beh kul loin kitel ciat hi.  Ahi zongin tu hun ciangin na tampi a kigawm ciangin na khat a piang pan tampi om ta hi. Gtn; Mawtaw, mawtaw khat a pianna dingin apei, a set, a body…, nam tampi a kigawm ahi hi.  Hih dan ciangin buaihuai sa mahmah hi.
Tua tawh kizomin a theihbatloh le a zak ngeiloh thute ahih leh amah tawh a kisailo dan in ngaihsun in kitheihmawh bawl ziau lel hi.

 

Alung kham huai mahmah thu ah, hih thupomzia a lente in thu hamsa khat peuh a tuahkhak ciangin paulap zonga midang khat peuh mawhmat nuam hamtang hi. Abeisa a guallelhna khasiatna thangpaihnate phonglo kikkik a, mi pawlkhatte mawhna khialhna suaksak kik uh hi. Hih gamtatzia pen tu laitaka mi ngongtat  IS te gamtatziate hi pah hi. Hih dan thupomzia a nei pen mun khempeuh ah om kawikawi hi.

 

( 2 ) Dialectics ( Lengtong Hoih )

 

Lengtong Hoih tangthu I et ciangin Lengtong Hoih te unau pen a ki it mahmah bek hi loin, pilna siamna hatna zong nei mahmah uh hi.  Amau utna deihna le kisapna khempeuh a kicingin nei zo uh a, van laizanga om “ Aksi nel-kai” nangawn a la zo uh na hi hi. Na khat peuhpeuh a sep uh ciangun zong a hi sinsen, a hi linlian bek deih uh a, a inn kongkhat nangawn kamsel bek tawh a kihong thei pan ahi hi. “Hanciam peuh leng na khempeuh piang thei hi. Van a aksinel kai nangawn kila thei hi.” ci in na khempeuh maingap mahmah uh hi.

 

Kawl mangpa in lui gei ah Lengtong Hoih sam a zialzial leh theipum cia pha ahih manin  “ Asam zong sua, a mi zong hoih in teh” ci  in ngaihsun a, a nasemte zongsak pah hi. A ngah dongin hanciam hi.

 

Lengtong Hoih in a sanggam pa tawh nuamtakin  a nuntakkhop theihna ding lunggulhna tawh  anau Munei Thangdal ahi vahui pen ciampeek tawh satlum giap ngam hi. Ni sagih khit ciangin  tangval melhoih mahmah khat in thokik sak kik a, kawlmangpa innsungah a unau un nuamtakin om uh hi.

Tua ahih manin  khantohna, hoihna, gualzawhna,nopna le lawhcinna te mihsuan gige in pilna siamna hatna tawh hanciam takin mainawtna le kalsuanna pen Lengtong Hoih thupomzia (Dialectics) ci in min I vawh hi.

 

Hih kammal pen Greek lai in Dialego cih kammal pan piangkhia hi a, Kam kinial, kisel tantan cihna ahi hi. Thukhat peuhpeuh kikum in kisel ngeingai leng adik aman thute ong kilangkhia hi cih thupomzia ahi hi. Hih thupomzia pen Aristotle te Socrates te in amau hun lai in na lim zat mahmah khin uh hi.

 

Thu bulletzia

 

Hih thupomzia a lente thubulletzia pen a tuam hi leuleu hi. Na khempeuh kikhelkhel hi ( Everything change ) ci uh hi. Thuhaksa tampi le buai na tampite I kantanzawh ciang bekin Kikhelna khantohna picinnate kimu thei bek ding hi ci in ngaihsun uh hi.  Na khempeuh kidemna vive hi a, mun khempeuhah a gualzo le a guallel om tawntung hi ci uh hi. Apil asiam ahanciam zo te adingin na khempeuh piangthei hi ci in ngaihsun hi. Thu khat peuhpeuh ah ei deihna thupi mahmah ahih mah bangin mi dangte muhna zong theih huai hi ci in ngaihsun hi. Hih thupomzia a zangte in dinmun le thukiplet khat siksan gige in thungaihsun tawntung uh hi. 

 

Lim le mel

 

Siingkuang le aikuang (Formal Logic) te in na khempeuh namnih in akhen ziau hangin Lengtong Hoih (Dialectics) thungaihsutzia a zangte in tua Thu nam nihte a kido,  akidem, a kigawi gawp hi ci uh a, atawpna ah a manzaw ahoihzaw te gualzo tawntung hi ci in ngaihsun hi.

Hih thungaihsutzia tungtawnin mipilte in leitung tangthute a kizom diudeu in sut kik thei uh hi. Tu ni dong mah hih thu pomziate siksan in gamvai minamvai a kigel a hi hi.

 

Thupiang khat peuhpeuh a om ciangin tua bang a pian theih nading a hang nam khat ta om sak lianlian hi.  Gtn; Kawlgam suahtakna I ngahna pen Bo Aung San hanciamna hi ci ziau lel hi. A lawhcing mi khat om leh thudang kan nawn se loin “ A hi ding mah hi. A nu thupha a sang hi. A pa thupha a sang hi.” cih danin mu ziau hi. Tua mah bangin a tuahsia a tasam khat om leh “ A thuak ding mah hi. A vawh bang a at ai ve” cih san thei hi. Nupa kitawng khat a om ciangin a man le a khial om sak hamtang hi.

 Lengtong Hoih thupomzia pen anuai a Suangthu thum thupomzia sungah a kicianzaw in gen lai ni.

3. Trialectics ( Suangthu thum thupomzia)

 

Leitung Pilna le nuntakziate nakpi takin ong khantoh ciangin a om sa thupomziate tawh a kitukalh bek hi loin a kileh bulh nangawn mun tampi ah om kawikawi hi. Gtn: Ka pawl maw  ka gal cih namnih  tawh a kibuai mahmah hangin pawl lah ahi lo gal lah ahi lo bek thamlo ei ong theikha lo zong mi tam cihtakin tam hi. Tua mah bangin Democracy ngah leng khangto ding cih lametna a liat mahmah laitakin Democracy kician mahmah na pi a khangto mahmah lo gam tampi a om mah bangin Democracy hi lo napi a khangto mahmah gam tampi zong om kawikawi hi. Numei hihna le pasal hihna nangawn deih bangin a kikhel thei khuahun hi ta hi.

 

Pilna khantohna hangin kikhelna manlang mahmah a leitung pen khuano khat bangin a kigen mah bangin apiang thei dingin a kingaihsun vetlo thu tampi piangpiang mai hi.  Hih bang thute hangin mailam thupiang ding nangawn bangmah a kigelkhol thei hetlo khuahun sungah kiom ahih manin thupomzia zong a thak a kizong leuleu hi ta hi.

 

Sanginn sunga I sin tangtang Geometry ( Tincha 2  )laibu pen tuma kum 2500 hun lai a kibawl hi a, behlapna le puahphatna om loin tu ni dong ciang akizang suaksuak pilna thubu ahi hi.  Tua pilna tawh Nate khempeuh kilemtuah in kikantel hi.  Inn lamna ah hih pilna kizang hi. Lampi bawlna, lei bawlna, mawtaw bawln, vanleng bawlna, ni kha le aksite thu thukantelna nangawnah hih pilna kizang hi. Hih zaha thupi  Geometry kici pilna thu pen ahuampi in gen ding hi leng, thubul nam thum ( a dung  x  a vai  x  a sanna ) siksan in Nate thu kantelna cih theih ahi hi. Hih theory pen ei kamin “Suangthu thum” thupomzia  (Trialectics ) ci in min ka na pia a, tuni dong ciang munkhempeuhah a kizang ahi hi.

 

A.Thuhualpi

 

Hih thupomzia a zangte in leitungah a kip a kho bangmah om lo hi. Na khempeuh a kikhelkhel hi lel hi. Singkum lopa suangtum .., cih te zong tu le tu dinmun bek hi a, a tuamtuam in a kikhel toto hi lel hi. Gtn: Singluang pen mei tawh kimu leh meikuang pianga, meikhu, mei am le vut in kikhel hiau hi. Akl, singluang pen muatsuak in leivui piang hi. Akl, Singluang pen lei in vuk cip in suangmeihol piang hi. Hih kikhelna pen mihingte bawl tawm theih hi lo a, a mah le a mah in a piang hi ci hi.
Lengtong Hoih thupomzia in na khat peuhpeuh a hoih zaw ding in kikhel toto hi ci hi. Thupiang khat peuhpeuh in manawh khat nei ciat a, tua mun a tun matengin a paipai ahi hi ci hi. Hih thupiang le kikhelna a om theihna dingin mihingte in tawsawn thei hi ci in pom hi. Ahi zongin Suangthu thum (Trialectics) thupomzia in Nate khempeuh a kikhelkhel hi a, kikhelna pen a ma pianzia taktak hi zaw hi ci in pom zaw hi. Kikhelna pen a hoihlam zong hi thei in, a sia lam zong hi thei hi ci in pom hi.

 

B. A kibanglo nam nih.

 

Na khempeuh a kibanglo vive a kigawm nianua hi a, khat le khat kibang vetlo hi. Tua a kibanglo nate khat veivei kigawm a, khat veivei ciangin kidemin kinawk kipalgawp hi ci in Lengtong Hoih (Dialectics )te in ngaihsun hi. Kidemna pen a om tawntung thu in ngaihsun in kipawlna le kigawmna pen tawmvei sung thu hi ci in pom hi.

 

Ahi zongin Suangthuthumte leuleu in tua nate khempeuh a huampi in sang khawm miemei hi.
Gtn; Nupa khop pen kibang hetlo hi. Khat numei hi in khat pasal ahi hi. Lengtong Hoih thupomzia a zangte in numei le pasal a kibang hetlo nihte a kigawm a kizom hi ci in mu hi.  Suangthuthum te leuleu in numei le pasal a hih manin a kigawm a kizom mah hi lel hi ci hi. Nupa kikal kitot kiselna kam kinialna a om ciangin Lengtong Hoih te in a man a khial om sak uh hi. Ahi zongin Suangthuthum thupomzia a zangte in nupa cih pen a kitawng thei mah hi lel hi ci in ngaihsun ziau hi.

( Aban ah Lengtong Hoih thupomzia pen LHT le Suangthuthum thupomzia pen STT ci in ngelh ni. )

 

C. Buai na

 

Mun khempeuh ah kidemna le buaina om tawntung hi ci in LHT  te in pom hi. Kidemna le buaina pen nampi nih in khen a, sunglam buaina le pualam buaina ci hi. Sunglam buaina le kinawkna a hat mahmah ciangin kikhelna lianpite piang zo hi ci in pom hi. Ahi zongin  STT te in buaina le kidemna pen a piangthei thu le a kisam thu khat in ngaihsun hi. Buaina tuamtuamte a malmal in khen loin hih dan zong om thei zelzel mah hi ci in a huampi in sang hi.

 

Nisim nuntakna sungah zong LHT in buaina khat peuh a om ciangin pawl le gal ci in khennih suah lian a, STT te leuleu in pawl lah a hi lo, gal lah a hi lo pawl om sak lai hi. Gtn; Gam vai ah  LHT te in Kumpi le langlam party ci in khen ziau a, STT te in kumpi lam le langlam party ban ah kipawlna( civil society ) tuamtuam zong om sak  lai uh hi.

 

LHT te in gualzawh ding thupi sa uh hi.  Kidemna ah gualzo khawm ngeingai ding cih bangdan hi sa theilo hi.  “Thankik aw kei hasia le nang ha pha kikhek ni” ( Win – Lose Theory ) cih dan hi mai hi. STT te in buaina le kidemna, gualzawhna guallelhna cih te a om den thute hi a, khat le khat kisangsiam peuhleng a hoih hi lel hi ci in pom zaw hi. Democry thubullet zong hih thu mah hi bulpi pen hi. Ei hihna ciat tawh suakta takin om dimdiam theih ding hanciamna hi lel hi.

 

D. Gel kholhsa hiam

 

Mipilte in a buaipih tawntung thu namnih om a ( a ) Leitung le piansak nate pen a ma tawm in a piang khia hiam ( b ) Ngaihsutna le ngimna khat tawh apiang ahi hiam cih a hi hi. Hih dotna pen a nih tuakun (LHT le STT ) ( b ) na sang khawm bilbel uh hi. 
Ahi zongin a sanzia uh kibang lo hi. LHT te in ama upmawh thu bulpi khat siksan in hih thu pen a hi takpi hi ci in kipsak mahmah hi.  STT te leuleu in thubulkip khat bek hi loin, tampi om dinga, I theih khak loh thute ban ah I theihzawh loh thu zong om lai ding hi ci in pom hi.

Mihingte in ahang I tel zawhloh thupiang tuamtuam a om ciangin “lamdang tak ei, kampha tak ei, hampha tak ei, kamsia tak ei” ci in i gen ziauziau thute pen STT te in mihingin a muhna le a theihna ciangciang tawh thu a gengen uh hi bek hi ci in pom hi.

 

E. Nusiatna

 

LHT te in thu khat peuhpeuh ah a kidempihte le  a langte taisan in nusia uh hi. Tua bang ciang bekin khantohna, ahoihzaw picinna le kikhelnate piang thei pan hi ci in pom hi. STT te in akinusia le a kitaisan cih dan in ngaihsun loin a kilom khawm toto, a kilam khawm toto hi ci in pom zaw hi.

Gtn; Nupa khat in a tate inn a tuan sak ciangin a kikhen le a kitaisan uh hi lo hi. Tua bangin a banban in khang tampi inn kituan toto a, mun tuamtuam ah zong kilal kawikawi hi. Tua khit ciangin minam tuamtuam le pau tuamtuam ong piang to ahi hi. Hih pen a kinusia le a kitaisan hi loin a kilam toto ahi hi.

 

F. Kizopna

 

Tu laitak I muh van le nate pen tawl khat sung a om pak van le nate hi a, mihingte in min tuamtuam a piak hi lel hi. Tua Nate kip tawntung lo hi. Ama hihnate a kip hun tonno sung bek ahi hi. Ama hihnate a kip theihna dingin ama sunga Kizopnate a om ngei bangin a om sung bek hi pak hi. Tua Nate kizopna kikhel leh Nate a dang khat in piang to pah hi. Gtn;  Gua tawn khat pen tu laitak guatawn ahih hangin khutsiam khat in tutphah in bawl leh guatawn panin tutpah suak lel hi. Tua tutpha pen ama sunga om Kizopnate a ngei bangin a om sungteng tutphah hi a, kizopnate a kikhel ciangin sing, nin, ciangkang …, cih danin kikhel leuleu hi.

 Tua Guatawn pen hun khat sung guatawn hi a, a tawntung in guatawn hi lo hi. Amasung kizopna a kipsung teng hi pak hi. Thu dangdangte ah zong tua dan vive mah hi pah hi. Tonno sung a om pak Kizopna te pen a kipsemsem zong om a, a kiplo semsem zong om hi.  Tua kizopna te a kikhelkhel hangin khat le khat a kitaisan le a kinusia cih bang hi tuan lo hi. Ama pianzia khat hi lel hi. Gtn:Haitang ( a lui ) si a, haikungno ( a thak ) piang hi ci in LHT in pom hi. Haitang le haikung thu bek ngaihsunpi in nei hi. STT in haitang le haikungno banah tua tegel kizopna zong thupi sa hi.  Haitang le haino kizopna a thakhauh ciang bekin haikung ong po zo pan hi. A zenzen in tua kizopna thakhauh kei leh haitang si in muat thei lai hi.  Tua ahih manin Haitang panin haino po ding cih thu om thei tuan lo hi. Haino po thei hi. Po lo thei hi. 

 

G. Picinna

 

LHT le STT thupomzia kilamdanna pen amaute thubul pomziate ( Dimensions ) hang ahi hi. Mihingte in sem nuam peuhleh Leitungah a piang theilo bangmah om lo hi.  Leitung, ni, kha le aksite in bei hun nei loin a tawngtung in a om den ahi hi ci in LHT in ngaihsun uh hi. Tua ahih manin amaute in ngimna le gelna kician nei diudeu in thaneih zah in hanciam uh hi. 

Ahi zongin STT in Mihingte hih theihna pen ahi ciang khat bek om hi. Leitung, ni, kha le aksite zong a kip tawntung hi loin, hun ciangtan khat nei ciat uh hi ci in ngiahsun hi. Tua ahih manin thu le la khat peuhpeuh a gel uh ciangin “Thu paizia dungzui in a lem theihleh” ( Pasian in ong thukim pih leh ) cih dan in pai zaw uh hi.

 LHT  in Gam le minam khantohna dingin kidemna buai na hanciamna tampi kisam hi ci hi. Hih thubulpite siksan in innkuan sung, pawlpi sung, khua le tui sung leh gam le lei vai khempeuhte ah na ong kisep ciangin a gualzo le a guallel ci in pawl nam nih ta ong piang den hi. Agualzote in gal nei suak uh a, a guallelte in zong maban a nei mah suak in kidemna bei theilo a, nopna daihna om thei nawnlo hi.

 

STT leuleu in “ Singkung lopa tawm semsem in khuahunte lum semsem a, leitung in siatlam manawh ta hi ( khuahun sia ).  Tua bek tham loin mihingte bawl a thakhauh mahmah galvan tuamtuamte hangin leitung pen thakhat thu in a maimang thei dinmuh hi ta hi( leitung vut le vai suak thei ) ci hi. Tua hi a mihingte in leitungbup huamin thu le la vaihawmin kalsuanloh phamawh ta hi. Leitung le a kim le pam a omte hoih takin I kep loh phamawh ta hi. Thu le la khat peuhpeuh vaihawmna a om ciangin  mikhempeuh in  Thukhualna le a picing mahmah lungsim neihloh phamawh ci in STT in pom hi.

 

Thukhupna

 

Hih lai ah mihingte lungsim puakzia le thupomzia a huampi in Nam thum in I gen ciangin, hihzah bek om hi cihna hi lo hi. Hih tawh a kibanglo zong tampi om lai kha ding hi. Mai lamah zong om toto lai kha ding hi.

 

Hih thupomziate I et ciangin ei mah tektek dinmun I kitelna ding bek a thupi pen in ka lamen hi. Mi khat in thupomzia khatta bek kinei hi tuam lo a, mun khat ah Siingkuang le aikuang thupomzia tawh i gamtat hangin thudang khat ah Suangthuthum thupomzia zangin thun kikhensat veve lel hi.

Tua ahih manin hih thupomziate pen Midangte tungah thukhenna ding hi lo a, I zat siam nakleh eima nuntakna bek tham loin i innkuan sung, vengsung, pawlpi sungah khua le tui sungah noptuamna om taktak ding hi ci in ka lamen hi.

 ( Zingsol, Megazine ah a kicingzaw in ong suak lai ding hi.)

Ref-
-Trialectics ( U Kyaw Win )
-Dimensions ( Ko Thar )
-Zolai simbu