TAPA MAW NA DEIH, TANU?
-Peter Gin Khan Do, BMin
Tapa hiam tanu hiam, ei deih bangbang neih theih hileh maw, cih mi tampite lunggulh hi ngel dingin ka ngaihsun hi. Hih lunggulhna pen a taktakin a tung thei mawhlo ding hi. A nuai a thute kikum lehang.
Mihingte a bawlpa in, Adam te nupa kiangah pung unla leitung dim un, ci in thu apia hi. Tu laitakin a tangtung khat a suak hi. Leitung mihing tam luatna pen a kibuaipih khat hong suak ta hi. Tua ahih ciangin gam khempeuh ah innkuan tawmsak (family planning) ding cih a thupi khatin kigen hi. Kumpiten sum tampipi bei-in gamsung mi tamlua dal nadingin nasem hi.
Tua bang kawmkalah nupa pawlkhatte’n, tanu bekbek neinei ahih manin tapa hong pian khak leh ci-in, ta deih zah sang a tamzaw a neikha bang ki-om hi. Tua mah bangin, tapa bekbek aneite’n zong, tanu nei ding kilametna hangin ta deihzah sangin a tamzaw a nei kha bang zong ki om leuleu hi.
Tanu hiam? Tapa hiam? Deihzah sang a tamzaw neih khak ding launa hangin, mi tampite in, pian ma a nu sunga naungeek ompen bang ahi hiam? Cih thei nuam uh hi. Tua theih nopna aliat luat mahmah ciangin leitung mipilte in vanzat tuamtuam zangin, tua bang theihtheihna (sex determiner) ding bawlkhia uh hi. Hih vanzatte tawh nu sunga om, naungeek pen pa hiam? Nu hiam? Ci in theithei ta uh hi. A hih hangin hih theihtheihna in hoihna sangin, siatna tun zawtham hi, cih kimu hi. India gam mun khatkhat ah tua banga etkhiatna (theih kholhna) peuhmah neihloh dingin kikhaam bikbek hi.
Tua theihkholhna, bang siatna om hiam? I cikha thei ding hi. Ei zomite sangin mivom (kala) vaite lakah tapa deihna lian zaw hi. Tanu bek a neite hamsia tuak bangin kingaihsun uh hi. A deihloh zawk pen, naubu sungah om hi, ci-in nupate in atheihkholh uh ciangin hihsiat dingin ngaihsun in nau bawlsiatna (abortion) zong bawl takpi uh hi. Hih pen naupaainu adingin a lauhuai mahmah ahi hi. Mivomte pawlkhat bang in a deihloh zawk pen uh a nu tawh thah khawm dingin a ngaihsun zah dongin om thei uh hi. Nu sunga om nau hihsiat cih pen Pasian thu um mite hih ding a hoihlo, khialhna (mawhna) in , kingaihsun, ei Zomite in I up thu khat na hi hi. Deihloh zawk, pen a hong pian zel sangin, hih siat tuak lah bangzel. Deih bangbanga paisak theih hile maw, tu a I buaina teng veng pah ding hiven maw.
Zato siavuante leh zatui lam a siamte’ gelh dingin a kilawm hi a ahih hangin a gelh omlo ahiam, I simkha ngei kei hi. Tua hi a gelhkhiat ding hoih kasa hi. Khat panin, ka ngaihsut ciangin zumhuai kasa hi. Tanu bekbek nei a tapa a deih mahmah mi bangzah hiamte kiangah hih thu ka hilh ta hi. Tapa hong nei taktak ciat uh hi. Keima pumpi tungah zong ka sinsa keima experience ah zong maan hi, cih ka theih manin leh tulai naukhakna (family planning) te a taangtun theih nading kisam mahmah hi, cih katheih manin iim loin gelhkhiat ding hoih ka sak manin zumlo leh kisuanglo takin ka hong gelh ahi hi. Tapa hiam, tanu hiam ngakna a deihzah val tanei hong kiam nading leh neihsa ngen neihneih man a nupa kitawng, kisia, kithat cihte leh naungek suksiat cihte khawng a hong kiam, bei nadingin; kumpi David in, lamdangpi leh lauhuaipi a bawl ka hi, a na ci hi. I taksa pumpi setpi a bawlpa’n lamdangpi leh lauhuaipi a a na bawl na hi takpi hi. Suan leh khak kineito zel a, leitung dim dinga a bawl ahi cih I gen khin hi. Tua ahih leh naungeek piang khempeuh pasal ahi hiam? Ahih kei leh numei ngen ahi hiam? Pasal bekbek piang ahi zongin , numei bekbek piang hi mawk leh suan leh khak a paito thei ding hiam? A paito thei ngei kei ding hi. Tua ahih ciangin suan leh khak aneito thei zel dingin a bawlpa’n, pasal, leh numei pian nading daan zong bawl khawm ahi hi, cih thu nial nading omlo thuman ahi hi. Tu’n tomkha gen lehang:
Pasalte’n suan leh khak a neih theih nadingun amau sungah cii khat sperm kici om a numei sungah cii dangkhat ovum kici a hong kisuktuah khak ciangin mihing ding ahong kipan ahi hi, cih laisim mite a tam zaw in theihsa ahi hi. Tua pasal sunga cii om pen, a koisan mun takah om a hiam? Cih leh a telkan mite’n hong hilhna bangin, ciltang (testicle) sung mahmah a om ahi hi, cih I thei hi. Ciltang I cih pen a thupi mahmah hi a, ahi zongin hih munah sau gen lua nawn loin, ciltang nihte’n a nasep hun uh kibanglo ahi cih I theih ding a kisam pha pen khat ahi hi.
Numeite lam enkik lehang, numeite’n zong pasalte’n ciltang nih a neih uh mah bangin a sung uah cii (ovum) omna ovary kici a sung lam a pang langkhat tuak uah om a, tuate lawng khat ( tube) fallopian tube kici in naubu (womb) tawh kizom hi. Tua a kipan nau neihna vang (vagina) tawh kizom hi. Ciltang nihte’ nasep hun a kibat loh mah bangin, numeite’ pang tuak a om ovary te a nasep hun zong a kibang kei hi. Numei cidamte in kha khatin niin(mense) khatvei ta nei uh hi. A hi zongin thakhat thu in veilam ovary leh taklam ovary panin pai khawm lo hi. Kha khat a taklam pang pan a hong pai leh kha kik ciangin veilam pang panin hong pai zel hi. Cih nopna in, veilam leh taklam kha khat halin (alternate month) pai zel, cihna ahi hi. A kigawmin kha simin khat veita apai zel ahi hi. Numeite’n angeina uh niin (mense) kha simin a neih uh ciangin ovary panin mihing hong piang thei ding cii (ovum) zong veilam hiam , taklam hiam khat panin a hong pai ahi hi, cihna hi.
Pasalte ciltang nasep daan ahih leh kha khat hal (alternate month) hiam, ni khat hal (alternate day) cih bang hi loin zite tawh omkhop hun tengin (coitus) a veilam ciltang hiam, taklam ciltang hiam kizang (active) hi a, utna lam peuhpeuh kizang (active) sak thei ahi hi. Veilam leh taklam a om ciltang leh ovary te nasep dan tawh kizui in numei ding leh pasal ding a hong piang ahi hi.
Numei hiam, pasal hiam a hong pian nadingin, hih theih I nei hiam? (Ei regulate theih ahi hiam?) Numeite niin neih (mense) pen taklam hiam veilam hiam, ahong pai nadingin hih theih I nei kei hi.
Ahih hangin pasal a pen, taklam ciltang in nasem hiam? Veilam ciltang in nasem hiam? Cih pasalte in I theithei hi. A utna lamlamin na sem (active) dingin a ut danin a khek thei hi. Taklam ciltang in nasem hiam, veilam ciltang in nasem hiam? Khel kawikawi theih ahi hi. Hih thu pen I kideihsak pen thu ahi hi. Hih thu I theih theih nadingin gentehna khat gen lehang: Na naakvang (nostril) a van’ dan kibang den lo ding hi. Tua in koilam ciltang in nasem hiam? Cih a zon baihlamna ahi hi (index). Na zi tawh na omkhop ciangin (coitus)na naakvang taklam a van hauhau leh na taklam ciltangin nasem ahi cihna ahi hi. Na naakvang na utna lamlam a vang zaw dingin na bawl thei hi. Na taklam vang zaw hen na cih leh na veilam delhphahin siiklup lecin a tungnung lam ahi na taklam naak hong vang pah hauhau ding hi. Tuaci bang mahin na taklam delhphahin siiklup lecin a tungnung lam ahi na veilam naak hong vang pah hauhau ding hi. Tua bang mah in taklam leh veilam ciltangte na uk (control) thei hi. Na veilam pang delhphah a na lup ciangin ciltang leh zunthakna kizopna gui (tube) Vas deferens kici pen, anuainung lam na bing zaw a na taklam, atungnung lam na vang zaw hi. Tua bangin cii ( nau khaicii) hong pai ding ciangin zong, taklam panga kipanin hong pai ding hi. Tua a omdan pen taklam ciltang in nasem (active) I cih ahi hi.
Tua ahih leh bang acih ciangin, a kipaai naungeek pen pasal hong hi a, bang acih ciangin numei hong hi hiam? Cih thu I gencian ta ding hi.
Nau neih theih nading cii (ovum)numei a panin a hong pai pen numei taklam pang panin (ovary) ahih a, pasal cii (sperm) zong ciltang taklam pang panin a hong pai ahih leh, tua tegel (taklam a tuak ) akigawm khawm khak ciangin nu sunga hong piang ding naungeek pen pasal hong hiding hi. Tua bang mahin, pasal a leh numei a a veilam tuak a kigawm khawm khak ciangin nu sunga hong piang ding naungeek pen numei hong hi ding hi. Veilam leh taklam a pan, a hong pai cii akigawm khawm khak hangin mihingin piang lo hikha thei ding hi. (ciapteh ding: Pasal a leh numei a taklam tuaktuak a kigawm khawm ciangin, pasal hi. Veilam tuaktuak a kigawm khawm ciangin numei hi. Veilam leh taklam a kibang ahih leh nau piang lo hi).
Tanu kia bek nei a, tapa a deih mahmah nupate in , hih bang daanin pasal in hih le uh:
Na zi na veilam pangah lumsak inla, na zi na kawi ding ciangin na veilam pang delhphahin siiklupin na taklam pang tungnung sak lecin, na taklam naak vang hong vang hauhau ding hi. Na taklam ciltang in zong nasem dingin kihong sa in a om hipah hi. Tua bangin na zi zuutin na kawi ciangin kipawlnopna lungsim hong picing dinga, tua hun ciangin om khawm le uh cin, na taklam ciltang pain cii(sperm) hong pai hi ding hi. Numei cii (ovum) zong taklam pang panin a hong paikhia) tawh a kituah khak leh naungeek pen pasal hong hi ding hi. Numei a (cii) pen koilam pang in nasem (active) hiam cih I theih loh banah utna lamlam panin paisak theilo (active sak theilo) I hih manin tu a I gen bangin lup ding, kikawi, kizuut ding ngeina neih ding ahi hi.
Tua hi a, Pasian in hong deihsak ahih nak leh numei taklam pang panin a hong pai cii tawh hong kigawm khawm kha ding a, pasal hong piang ding hi. Tapa kia bekbek nei a tanu a deih mahmah te in zong tu a I gen daan tawh kileh bulhin lup ding, a kizuut ding, akikawi ding uh ahi hi. Pasalte in a ut hunhun un, bang hun bang hun hi tase leh ana ciltang a lang leh alang a kheel thei ahih manin, ta numei ding leh ta pasal ding pen Pasalte’ na (van) tungah kinga ahi hi, cih mangngilh loh dingin hoih ding hi.
Mi pawlkhat in um lo kha dingin ka um hi. Ahih hangin mi bangzah hiam khatte tungah aman, adik leh ke’n zong maan hi, ci a ka theih manin, lamdangpi leh lauhuai takin a hong bawlpa’n, tua bangin suan leh khak nei a kikhangto zel dingin ngeina (dan) kip koih hi dingin ka um hi. Keima neek ding zonna lampi hilo, mi dang professioner field a va sehphi (encroach) hi a, hong ngaihsun kha a om leh a hong maisak nangun ka thum hi.
A tawpna ah tanu tapa ahih leh a hong bawl Pa’ thupha hi, cih I pai thei tuan kei hi.
Ref: Siamsin Pawl Annual Magazine 1994, Vol, 31, Pages 20-22 sungah Ginvum Ngaihte’gelh (Paite pau) pen Peter Gin Khan Do in Tedim pau-in Zolai Zunna, Khol 17, Hawm 69-September & October 2006, pp.11-14, sunga kisuak sak pen kila sawn hi.
Behlapna
Zolai Zunna sungah a kisuah sak khit Nupa kop tampi in phattuam pih cih kimu ahih manin , a simkha nai lo ta dingin suahsak sawn dingin kon gpuak ahi hi.
Peter Gin Khan Do, Yangon.
No comments:
Write comments