Laibu etkikna: "Leel Simthu" by Pu L.T. Ngaihte

Laibu etkikna: "Leel Simthu" by Pu L.T. Ngaihte   Laibu min: LEEL SIMTHU Laigelh: Pu L. T. Ngaihte Bawl kum: 2008 A hawmkhia: Mrs. Alice C. Ngaihte, B-95, Kendriya Vihar, Sector 51, Noida, UP 201203, INDIA.     Thuumna: Hih ka gelh pat laitak in draft ka 'save' sawm leh 'send' mek kha ing. A kicinglo a hong suak masa a omleh hong maisak un, ka khak khial hi. I am sorry.   Gamdang tung peuhmah lungzuang diak uh ahi tam? Foreign Service officer peuhmah laigelh siam diak uh ahi tam? Gamdang a tung Zomi uliante in Zomi leh Zogam a nung-et kik uh ciang a tunna gamte tawh a teh in 'puah kisam lua' sa uh ahi tam? Gamdang a tun uh ciang pilna tampi in khanga a kipatna gam vuah a teenglaite in a theih ding thu tampi va mu uh, tuate genlo, pulaklo, mite theisaklo a om theilo uh ahi tam?   Pu Jampu ci a kisam, hong nusia zo Sia Rev. T. Jam Kho Thang in USA a tun ciang lungzuang takin (Leel Simthu, p.113):    "Na vang ngai a sing gam ka hei mun ah, Ngaih aw Zolei tangbang dam ing, Sansiam ngaihno tangbang na dam maw? Na tong luai naubang sang nuam ing e"    ciin Sawlkha tang singseng nuai ah amah bek na khuadak dak mai hi ding dan hi. Zomi lak pan US sik masa pawl hi dinga, lungzuang a khuadak ngeungau hun om tham dingin uphuai takpi hi.   Ama zawh a gamdang tung Zo suan sungpan Zikpuii Pa a kici, Mizogam pan Pu K.C. Lalvunga, Indian Foreign Service (IFS) zong laigelhsiam minthang hi a, a zinna, a muh, a tuah, a theihte lai tawh gelh in mipi sim theih dingin a bu in na bawl zel hi. Amah bangin Lamka khua pan Pu L. Keivom zong IFS hi a, a khualzinna gam thu, a muh leh a tuak thu a gelhte in mi lungsim zo mahmah a, a laibu mite in simnop sa mahmah uh hi.   Tu in Lamka khua mah pan (ama kammal la leeng bel Lawibual khua pan) Pu L.T. Ngaihte, IFS mah in ama zinna gam, ama muh leh ama tuah thute a gelhgelh, a ciamteh detdet, mipite simdinga thuhoih leh pilna tampi a gelhte laibu in hong bawl a, LEEL SIMTHU ciin a min vawh a, laimai 241 pha in, thu leh la, tangthu leh gam itna thu, lungzuan thu leh ki itna thu, taihilhna leh ki-etkikna ding thu tampi hong tuun khawm a, sim nuam in, zaknop a, ki lumletlet nuam hi. Tangthu Bu bang mai a khatvei simsuak a "hoih peuhmah ei" cih ziau ding laibu hilo a, hapi tawh limtak haizan a, a guhngek nangawn hup khia a cip dikdek a neek ding laibu ahi hi. Zolai leh Manglai om a, Zomi lungsim mah liansak zaw in Zolai tamzaw pek hi. Pu LT, you are great!   Pu LT mah banga laigelh siam, Lamka khua mah pan hi, foreign service mah ah sem, laibu hong bawlta diam ci a ka gal etet khat omlai, Zolai maw Manglai thei keng, anih in siam tuaksa ing, laigelh zong thudik ahih nak leh hangsan taka gelh ngampa hi.... amin pulak nai kei ni.   Tua hi a, gamdang a tung, foreign service ah a sem peuhmah laigelh a siam sese uh, a laigelh uh a sim a nop deuh sese pen bang hang hi ding hiam.... a dawnna kei zong thei pak keng!   Awle, i thulu ah lut kik leng.   Amah, Pu LT ci a kitheizaw pen a minpi Thawnkhokam hi (Leel Simthu, p.30). March 1, 1959 in Lawibual khua, Manipur, India ah piang a, October 11, 1986 in Nu Chongroukhawl tawh kitengin, tapa nih - Khamsuanmung leh Luaisanglun nei uh hi. India kumpi nasem in Italy, Maldives, Hong Kong leh Jordan gamte ah om ngei a, tu laitak in Delhi, India ah om hi. Ama thu a kicingzaw in a laibu ah MIMAL HINKHUA ciin koih hi.   A laibu kawm (cover) i et leh Zogam leh Zomi gim hong nam veuveu pah hi. Lungzuan huai in lenmui kaai ciciai a, Lengtong Pauno lungzuan late i lungsim ah hong dawk zangzang hi.   A kawm i phen suk leh a naupang lai limlim pan thu leh la uk mi, thukan a thuciamteh mi hi cih laimal kigelh masa te pan kitheipah hi. A sangkah pan a kumpi nasep dong, zi leh ta a neih dong, a zinsuk a zintohna ah a tuah thute leh Zomi te in muhpih leng, theihpih leng ci a a iplahte a gelhgelh, a mawkbei ding a deihlo mi kuhkal leh; khatveivei ciang lah mi lungzuang theipi, lawm leh gual leh khuapih tuipihte a ngai mahmah mi hi cih kimu thei hi.   Tua banga a kaih khopkhop, a kepkep, a gelhgelhte a BU in bawllo in kithehthaang leh a sawtna ciang khopkik baihlo ding ciin tu hun lian a i sim theih dingin a hoih mahmah laibu in hong bawl a, Zomite hampha hang!   A laibu pumpi khenpi 9 in khen a, maan 6 koih in, pahtawina kammal 7 back cover ah tuang hi. Khenpi 9 te thulu:   1. Mimal Hinkhua 2. Na min theibang lou veng 3. Gamchiam Tulmawh 4. Khawtang Lunglen 5. Khawtang Lungkuai 6. Pathian Lungzai 7. Sappau Dihni 8. Sii-suk 9. Lavui   A huampi a et pak in naupang dang mah banga sangkahna ollo pan hanciam a sangpi a tunna thu, gamdang a tun ciang nuntakzia a kilamdan thu, tunai a gal kido leitungbup in a mitsuan mahmah Israel gam zin a baih hetloh dan leh, ei, amipih, a sapihte hatzaw sema tai ding, khangto dinga hong deihna 'deihsakna kammalte' leh 'hicih zaw leeng....' a cih nguutnguut thute a banban in suut toh sawm ni.....   (zoplai ding)     Hau Za Cin Phuitong Liim