Minam Kikhenna leh Kigawmna

Kei mimal muhlehtuah-tawh kituak-in, I' minam sung-ah kikhenna, ki-elna

leh kilangbawlna cihte-pen denominational cultic spirit akici (ama' panna pawlneu bekbek thupi sakding, adangte-tawh social interaction or Sahkhualam Kithuahkhopna bawlding nangawn zehtan bang-a tanding thumaan-a sehkipna) ziak hipipen-hi cih keima' muhlehtuah ngiat ahihi.

Hih lungsim-pen taangpi mi khat-in ama' thu-a aneihtawm hilo-in, upa makaaite-in muammuam-a tua thuzawhkhumna zil-a hongpiang ahihi cihzong keima' muhlehtuah ngiat-mah ahihi. Gentehna lahhi, thumaan-zong ahi; tuma kum 2 laai-in kei hong-it mahmah, alungsim, amittang pan-a ka' theih sinsen khat-in tu-in hong hopih ding nangawn ak guulmu bang gualgual-in hong pelhpelh-hi. Ama' sup nading lawh ngeilo ing-a, ama' heh nading seemlo bawllo hinapi aziak ka' etkiik ciang-in amah athuzawhkhum mite' ziak ahihlam ka-telsiang sitset-hi. Amah athuzawh mite-pen ngia hi-a, amah-pen ama' mittang leh lungtang amuang zolo vabak ahihi. Minam sung-ah hihbang mi tam mahmah-a, thu omzia khempeuh va-hilhcian-a kava kisuut tangtangding hun ka-pia zokei-hi. Sawmzong ka-sawm kei-hi.

Zomite hong khenthaang denkeei thusia phuulna kha-pen Pawlneu haipihcipna Kha(denominational cultic spirit) atampen hiding-hi. Tua denominational leaders te' haipih leh nuntaakpih kha (spirit)-pen ama' pawlpi asuak mite ukcip-in daaikhan ding, asumpi leh azahtaakna khempeuh-uh amah bek-in ngahding cihthu self-centred ideology mah honghi ahihman-in Pasian-zong tello milmel kawmsa-in apawlpi makaaite thupi sa ngiat-a apumpan, apumgup, zahtaak cihtak-a zahtaak, leitung-a apilpen leh anasiapen-a amu/asaang mi, agensia khialkha omleh athat giapngam phialding mi Zomi sung-ah tampi omhi. Hihpen Denominational Cultic Brainwashing mah hizeel-hi.

Zomi ataangpi Catholic (Fundamentalist), Baptist (Protestant) leh AG (Pentecostalist) hi-a, amau pawlpi upna bulpi atheilo vive kimlaai apawlpi sihpih ngam cihlam kidembawl mawkmawkna-in minam susia-in Pasian' Min daisak-hi. Pawlpi haipih liang-a ahigawpte upate-in pumphatphat-in, pahtaak gen-uh ahihman-in atua lungsim anei ding-in adangte-zong azolzol, tha apiapia, hawklam atoto cihna hi-a, guah azuk naakleh hawk hongluang takpiding theihsa ahihi. Hihbang-in pawlpi mite' khuak akinim nungsang minam sung-ah kitukalhna, ki-keelkiitna, ki-elna leh kilangbawlna apian mahding ahihi.

Minam-vaai kalsuanna leh Khalamsang kalsuanna (National movement & Spiritual movement) Zomi sung-ah acidam nading-in:

- Pasian' naseem akici khempeuh-in Pasian' Na-mah hongseem henla,

- Pasian' Kammal-zong hong tel mahmah mai henla,

- Pasian Kihta-a, thumaan citak, muanhuai leh gamtat-kampau etteh taakcing temah-in pawlpi makaai upa hongseem henla,

- Pawlpi mite' Pasian Phaza bang-a taanglaai kumpite bang-a a-om beubau-uh hong khiam henla,

- Pawlpi mite' sumpi leh neihlehlamte mahni khut pan-a zeekding bekbek lunggulhnate hong khiam henla,

- Pasian' thu leh minam-pen phim leh khau bang-a akizopzia, khuang leh zaam bang-a akikopzia, tem leh paai bang-a akithuahzia hong theician henla,

- Pawlpi mite-in makaaite' cihbangbang amanding leh sumpi maanmaan-a piakding tepawl bulphuh niloh sang-in pawlpi mimal kimciat-in Pasian Kihta-a athu azuih nading, Amaan Khazihmi Khuasakzia (True Christian-life) aneih kim theih nading thubulphuh-in hong nei-thei tahen!

- Thumaan muanhuai citak mi bekmah, sum leh min deihna akhaamzo bekmah-in Pasian' Naseem min hongpua henla (tuabang mi Zomi sung-ah a-omkei lehzong pawlpi ki-mawk phuhphuh keipah henla), Khazih' limpha-tawh pawlpi mite makaihleh Pasian' Naseem takpi hidinghi.

Tua mahbang-in minam makaai akici phauphau muntuamtuam-a minam minsel kipawlna-a makaai upate-in:

- Makaai upa asepna kipawlna-pen ama' mualsuang ding-a aphuh mawkmawk kipawlna hikei limlim henla,

- Minam makaai upa cihteh tua minam mipite' sila ahihlam thei-a, atua ding-a akizo ngiat mite bekmah-in makaai upa hongseem henla (atuabang mi a-omkei lehzong kipawlna omkei vet zaw-mai henla),

- Minam phattuam nading lunggulhpen mah-in hong neithei henla, ama' angsung meet nading leh minngah nading ciang-tawh kipan vetkei zaw henla,

- Mipi-in aphatphat dingciang leh mipi-in Pasian Phaza bang-a amuak huhu, apahtawi hut-hut dingpeuh lunggulh-in hongnei heemhaam hetkei henla,
Khang tuihual leh gam kiukna thuluan atheizekte mah-in minam kipawlna makaai upa hongseem henla, (mi' lak khawng-a azii-in mit-heek apiakbek khawng-tawh meeting a-cancel giap tepawl, mi' lak khawng-ah azii-in ahap giap, ako giap, aphunsan ngiap cih tepawl-in biakna hileh minam hileh makaai upa hong lunggulh hetkei zaw-mai henla, meeting kah kimlaai azii-in phone ahopihleh meeting a-cancel giap cihtepawl hehehehehee, hong sukkhaakleh kipuahpha pahni-ei),

- Kamnam leh muiciai kawm-a meeting kah-thei mi peuhmah-in meeting pelhzaw henla (tuabang mite-in upa makaai tutphah lunggulh kei-mai henla),

- Zuaugen-pen mawkna-a asehlo mi-in makaai upa hong seem-nuam sedahlel henla, thumaan thutak, haangsan-a agen ngam, akawk ngam, asungpa nangawn akhialhleh akhialhna alak ngam mite bekmah-in makaai upa hongseem henla,

- Ama' khuapih, beh, boung peuh ahumtuam kulkul mite-in ama' khua kipawlna, beh kipawlna ciangbek mah-ah makaai upa nana-seem zaw-pahmai henla,

- Makaai upa asepna-uh kipawlna min leh ahuamna, tuplehngiimte atheician sinsente bekmah-in makaai upa hongseemleh, kipawlna kalsuanna akisam akigenteh "Ken thei kha-keng" cih hongtawm zawdeuh dinghi.

- Kei ka-khialh ciang-inzong hong humding cih lunggulhna-ah seppih akhial khat-peuh akhialhna gen ngamlo-a a-omthei mi-in amah akhialh ciang-inzong apulaak omleh langbawl pahding theihsa ahihman-in kipawlna cidam ngeilo ding ahihteh tuabang mite-in makaai upa hongseem keizaw henla,

- Supding, baaiding, zatding, thuakding a-omleh asumh abaai, azaáng, athuak ngamding mite mah-in makaai upa hongseem henla,

Hihbangmi Zomi buppi sung-ah a-om keileh kipawlna kiphut keizaw henla, pupa' ngeina zuui-in lungtuahpih teng-tawh ahun zil-in Khuado liailiai, Pawlzu-Sialsawm bawlkhawm liailiai lellehang minam hihna-heuh piicing-in namtui zawtham zawsop ding-a, veenglehpaam namdangte-inheuh hongthei zawsop laaidinghi.

Atung-a upa makaai lungpuakte khiahsiam-in kizatsiamleh minamsung kikhen zeelzuulna, kitukalhna leh kithulimlahna, aituam mualsuang phuhna, asung zonna-a mipi zatna, Penglam Gaalkaap training piakna leh Panglam Gaalkaap luutna cihte khempeuh azungpi kilongkhia ding-a, damdam-in meimate ama hong kihial thei-in, hong cidam theilaai dinghi. Tua nangawn apawn (scar) abeisiang nading khang nih/thum-mah kingaak tolaai dinghi.

Zomi Pasian' Thupha!

Zokhai