Zomite Paunak leh Lakamte

Lapi:

        Zomi ngeina la a phuah dan a tuamtuam a na  om mah bangin a sak dan zong a tuamtuam in kilamdang hi. Khangluite in " Thu in La hi a, La in Thu hi " a na cih bangmah in, amau khan sunga a thuaknate: a nopna, a dahna, a gual zawhna, a gual lelhna, thu tuamtuamte Lapi-in na phuak hi. Lapi phuahdan zong atuamtuam a omna sung pan in la kammal 15 apha lapi kizang penpen hi.

La kammal 15 sang in taWmzaw thei lo aa, tamzaw thei bek hi. La kammal 15 lian tawh athu deih no khat aphuah theih leh laphuah siam kici hi. Tuhun Khazih mite ii labu tawi deudau a, la kisa bang hi lo-in la phuangpa in laamvuina ah khatvei nihvei phuang leh la sa dingte' ciapteh theih, san theih pah dinga la phuak theite la phuah siam kici hi. La kammal tam-in sau deudau leh ciapteh hak, san hak kisa hi. A kitamzat pen la kammal 15 lapi hih bang ahi hi:-

   

Tun ang mimbang na pian in e,

        heh khua nong nem ding sang e.

    Gil lo vang e sawn zozaam aw,

        tuang lam tam tawn man lo e.

La kammal 15 val lapi-

    Melmak lai a khang ciang khua ah,

        pesiik guikhau tong taisak e, sawn tha kiak malbang ko e.

    Taangbang dam tuang nu nong siat, tuanglam tun sau pheiphung nong suan nuam naam aw e.

  

     Lapi nei/lapi phuakte a tamzaw in a khiatna/akhupna dawng nih dawng thum bang na neiciat uh a, a lapi phuak khempeuh ii thu teng hih a khupna sungah kihelsak kim hi. A sak dan a lapite tawh kibang lo-in ki-awi deda hi. Tua bang lapi khiatna khat:-

    Ciin le ka tuai gam kim a thaaibang ka khen ka kawl ciang aw e, phung nih thum aw, znag ni suah luan khi ka luan lawh thong hi e.

    Thu saupi khat la kammal 15/19 tawh a phuak theite la phuahsiam ahihbang mahin lapi tomno tawh akhan sung thuteng aphuak theite laphuah siam na kici leuleu hi. Zomi ngeina-la peuhmah a teng (a bul) leh a dawn thu kizom vive hi a, a teng thu tuam a dawn thu tuam cih om lo hi. Hihbang a la a na phuah uh i pu i pate ciimna lamdang ka sakna kong pulak naum hi. Bang hiam cih leh BC 2000 ma pek a Itazila mite laphuah dan tawh na kibang hi. Mikang pau-in comparison a hih kei leh simile na ci uh hi. Lapi phuahna bek ah lo-in ladang zong ah hih bangin gentehna vive tawh la na phuak uh hi.

Gentehna:

   

Kap kap lo aw ciin lia nu aw,

    zinleng hawm tel zo hang e.

    Zinleng hawm tel zo hang e,

    tumbang guai lawh zo hang e.

Zola ( Latung ):

   

        Zola a ci lah om in Lagual-nuam a ci zong om hi. La kammal a tawmpen mal 17 pha a, tua sangin zong tamzaw thei hi. Lapi sak dan tawh kibang lo hi. Khuang tum dan zong kibang lo hi. Zola pen lapi banga kisa khial thei mahmah hi. Laphuak dan pen gentehna: simile, parallel=thu kihual cih bang vive mahin kiphuak hi. Zola pen gualnopna tungtawn in ahizong, ki-it kingaihna tungtawn in ahizong kiphuak pak kisa pak a kimangngilh pak thei hi. Lapi pen phuak-pak sa-pak a, mangngilh cih om lo hi. Zola la=gualnuam amang thei lo pawl khat om a, tua sungpan dawng nih phuang dih ni:-

    1. Lunglai khaubang ka hualhual ciang, tangbang dam ding sialbang lianpen e,

    Tangban dam ding sialbang lian pen e, heisabang paal dingin sam lai e.

    2. Do lai palbang ka nan nading ka banzaal aw, giabang hawm thawng e,

Ka banzaal aw giabang hawmthawng e, luntui phual ngote lah muang lang e.

    (Japan gal lel-a tai mikangte a kiphuah la ahihi.)

    Sihna dahna ah Zola/La-gualnuam kisa lo hi. Khuang tumpa in a dawnlam mal thum zui-in akhuang thumvei nawh hi. Gentehna:- Heisabang paal dingin sam lai e pen sam lai e aw tawh kituakin a khuang thumvei pingpingping ci-in nawh hi. Hih bang kinawh kei leh lapi sak tawh kibangsak thei kha hi.

La-awi (Zawlla-Laphei):

   

    La-awi kici Zawlla pen ki-it kingaihna la kiphuak hia, la-awi cihtak bang in kiawi diikdiak ahihman in khuang kitum thei lo hi. A deuhdeuh in la kammal atawmpen 21 kizang pen a, tua sangin  zong tamzaw thei hi. Lalui tampi a om bangmah in deih thuthu-in kiphuak tawmtawm thei hi. Sihvui han pan misite inn tun kik ciangin zupeng luai in ahi zongin, nopna dahna omna peuh a mi li leh nga tu khawm liliai in la om sate phuang kik ahi zongin, athak phuakin ahizong in kisa thei hi. Lang khat leh lang khat kidemin zong kiphuang thei hi. Nungak khat leh tangval khat zawltuah in la kipaih/kiden sak-a a nungak tangvalte la a siam kei leh a pawlpihte'n phuahsak/phuangsak thei hi (Phuang cih pen la omsate sa kik cihna hi-in, phuak cih ciangin a om nailo la thak phuak cihna hi). Hih bangin kizawltuak la kipaihin a kiteng takpi zong na om uh hi. I Pu i pate hun lai lawm laikhak cihte na om lo-a nopna dahna a om ciangin Zola, La-awi kipaih/kiden in akingaihna na pulak uh hi. La-awi hoih pente lakpan dawng guk phuang dih ni.

1. Ngaih ngi-ngei aw lung tuu ding na hi naam, kei ngaih bang gual lungtuak aw, Nong ngai naam aw:

    Kei ngaih bang gual lung tuak aw nong ngaih a leh, seino tang gual anglai ah, na zaal lo aw.

2. Ngai ing ci-a tumtaai-bang vul ing nong cih, ngaih loh damtui na hong leh luanna hi e;

    Ngaihloh damtui na hong leh luanna hi, niing nek sul tongdam nong zawikaihna hi e.

3. Tuanglam tunga heisa kaai ningniang no aw, kong lo diam aw lawh lahin na vul diam aw.

    Siinglawh lahin lel ah mangbang kai in, tang kei banzaal lai lawh in, tual niam ve aw.

4. Ngai ngi ngei aw na tong kaitui luangbang, lung ah gulhleng maa ka zaam lah ding bang e;

    Lungah gulh ing zaal lai kang thei lo ing, hem a nong biak sinlai tangbang lel lang e.

5. I kha vang lah gual in tuibang gawm ven, i tak a lah tuah ding ci'n thuciam lo e;

    Tak a zaang siik bang gawm loh vangngaih lung cingh, lau kha khang sumbang tuah in sinlai lun

6. Ngaih aw ei cin thubang leh tuah ding bang, siing tong zangva-bang puain, khen aw ci e;

    I khen zaw diam phual mei-bang i tuah zaw diam, ngaih aw nang cin thu hon hil, dih lai ve aw.

7. Ngaih aw i tuun pau in e i zuapau in, len a kokta a paal leh, tuah aw ci e;

    Len a kokta cik kum a paal loding aw, lai kikuai maan, ngaih aw khen ta nial niing e.

Khua-ngaih La:

    A lamal, a sak a awi dan Zawlla tawh kibang hi. Khua-ngaih la cih bangmah in khua ngaihna a tuamtuam thu kiphuak ahihi. Dawng thum phuang dih ni:

1. Nuun khum ka luai nop lai in tuun mel mang e, ngaih mel ka theih luankhi tam, nuul na hi e;

    Thuumthuum lo maumau lo aw tuai momno aw, ei sial lui tuibang a tuuk, sem in hoih e.

2. Thualguah aw luangluang lo aw ka sial tam ven, kiak lo ta paam a paih saan, dawn suang thei e:

    Kiak lo ta paam a paih saan dawn suang thei, kei zuapa leh nah neu in, dawn suang mawh e.

3. Heh lua nem dang om lo e kah lua nem dang, zaang len buuktui kung cin in, heh lua nem e;

    Kuung cin teng pa neu bel aw gam thel nah aw, lakmai luankhi a luang lai, khaam ngam aw e.

Biakna La:

   

        Biakna La cih pen Laipian La leh Awn Hong La hi deuhin Laphuak dan pen Lapi pawl sungah kihel hi. Laipian La a tamzaw pen Lai Siangtho sunga Late (Psalms) tawh a kibatna tampi om hi. Awn Hong La pen Itazilate le Thuumna (complaint) tawh kibang citciat hi. Dawng khat tek phuang le hang:-

Laipian La:-

   

   Thangvan a zaal Sian Za Mang aw, tongdam khaak hem in za'ng e,

    Pupa pat loh khuavaan-nuai ah, Sian awi a sinthu hi e.

Awn Hong La:-

   

    Zin aw lawhciang-bang nongsak buang in, ka len ding khuangbang hong khoh lo aw,

    Simlei tuan cil vaak nong ci hiam aw, sunni tumna mel ka maa hi e.

    Lapi, Zola, La-awi cihte thum pen la phuahdan la sakdan nam thum hi-a a kiphuahna thu leh la tung tawnin lamal a tom a sau, sakdan a awihdan a tuamtuam in omsak lai hi. Capt. Zel Khai ii Zo ngeina Laibu sungah La atuamtuam hih bangin gelh hi. Aak La, Bang Takawn la, Ciah la, Ciang Tuang la, Dan Sian la, Haitupi la, Hanlap la, Hantang la, Hang Thawl la, Hauh Bawl la, Haunung Galhang la, Holawh la, Innsung la, Innkhang ciangla, Inn tam la, Khangtak la, Khawcin la, Khuangaih la, Khuathang la, Khuavak la, Khuatualpi la, Khuai la, La leh lawi, La-gualnuam, La seksol, Lahtawl la, Laibung la, Lamkawi la, Lam Pau pi la, laam vui la, Lawm ngaih la, Lengtong hoih la, Lia hel la , Lohon la, Mualbawl la, Mualsuah la, Munzang la, Nauhui la, Ngaihno la, Gal la, Galphawn la, Gamza la, Gualngaih la, Peesiik la, Sangah la, Sau-inn la, Salen la, Sawng la, Sial la, Silei la, Sumsit la, Sungtum la, Suutnuai la, Taangsuah la, Tawn la, Thang Ho la, Thawl Puak la, Thu la, Ton lapi, Tuainau la, Tuakkhial la, Tualom la kaihna, Tualom la tawina Tuibung la, Tuilak la, Vaphual la, Vontawi la, Zangta la, Zawl Cing la, Zawl la, Zinthaak la, Zo la. ( Lanam khat dawng khat ta i laibu sungah i hel zongin i thului hon sau lua ding a hihman in La nam min tawh khawl bawl in).

Laam:

   

    Zo ngeina ah Laam leh Tawn cih na omsak hi. Numei pasal kikawi ngeingai-in khe khat pai laam, khe nih pai laam, Ton khuangpi siiklaam, han laam, siampite laampi cih bang bek i nei hi. Khat guak laam en Tawn kici a man thu-in a khut a khe, a pumpi tunga a taang thei khempeuh taangsak hi. Numei lawn daidai kaamsiat huai kisa a kideih lo hi. Lumsui, lumkan a tawn zo tangvalte nungakte in mitsuan pah uh a, papi sa a hih leh nupi dangte in cilphul lawh uh hi. I pu i pate hun lai in zu ne sa ne lo-in na laam lo na tawn lo hi. Tu ciangin Pasian thu sungah nuamsa in, tawn neuneu uh a, Davuih Kumpipa bangin puanpano silhloh ding bek kisam hi. Minam pawl khat in mihing laam sangin ganhing laam peuh thupi sa zaw hi. Et lawm nawn kei, Tedimte tawh lah uitawm tawn tawh kibang hong cihsak taleh i pi i pate lungnuama a na laam, a na tawnna i mangngilh loh na'ng ZOLUS i ngiimna kong pulak hi.

Col. H. Kam Pum (Retd.)

No.3 , 1998 ZOLUS pan kong laak kik hi.

Source: tghangdal.weebly.com