I gam hubit ni!!!!

I gam hubit ni!!!! 

A min lawhna i theih loh, i zakzak ngei thu khat leh, a theihhuai mahmah thu khat ahi, Inner Line Permit (ILP) pen Vaigam ah ana thupi lua zen khat hi-a, Kawlgam aa om ei Zomi te in i theih loh pelmawh thu khat in ka ngaihsun hi.

Inner Line Permit (ILP) pen Vaigam kumpi te in, Vaigam asunglam ah a om minamlian te, Vaigam nisuahnalam aa gamke te ah (gentehna in Lusei gam) a pai nop uh ciang in, a ken hamtang uh akul phalna laidal (travel document) khat ahi hi. Lamkhat in gen lehang, tua phalna laidal keng lo in, kuamah tua gamke te ah pai thei lo uh hi.
Hi phalna laidal ii a tangthu tawmvei lungngai ni.Bengal Eastern Frontier Regulations (1873) cih thukhun pan in hong paikhia ngaihsutna (idea) khat ahi hi. Mikang te in Vaigam a laak uh ciang in, "A kikemcing gam" (Protected Areas), cih gammun tuamtuam ciaptehna nei uh a, tua gammun teng ah phalna om lo in mi khempeuh, a ut-ut in pai thei lo uh hi. Ahang pen, tua A kikemcing gam sung ah sai, sathau, niangteh cih bang, leisungsumpiang leh ganhing tampitak om a, a kepcing nading in tua thukhun a bawl uh ahi hi. Tua thukhun pen hoihsa uh ahihman in, tuhun ciang in minamneu te minamlian te in a dep loh nading in, minamneu te' gam ah minamlian te ut-ut in a lut theih loh nading gelna tawh, a zomtoto uh ahi hi.

Tua hi-in, tua thukhun pen namtuamtuam khen in, phalna laidal nam tuamtuam pia pah uh hi. Gentehna in minamneu te' gamke ah minamlian te khat in, a sawt-mawh-lo sung na a sep nop leh, phalna laidal a tuam; Tourist te a pai nop leh, phalna a tuam, ci in khen sitset uh ahi.

Mizoram zong tua thukhun in hung hi. Gamke khat leh khat a kizopna gamgi teng ah gate kikoih in, Mizoram te ii gate na tun tak uh ciang in, Mizoram gam pai theih nading laidal hong kikal pah ding hi. Atamzaw ah, "Temporary ILP" cih, tawmvei sung pai theihna laidal bek pia hi. A ni ciangtan uh a, atamzaw ni 15 bek sawt hi. Vai thupi a om leh, khat vei ki renew thei a, ni 15 mah hibeh bek hi. "Regular ILP" cih laidal om leuleu a, tua laidal tawh ahih leh, kha 6 sung ki om thei hi.Azenzen in vanleng tawh a pai na hih leh, Lengpui vanlengtual ah kila thei hi.

Hiteng i gen diudeuna ahang pen, eimi te zong, Kawlgam ah minamneu i hihmah bang in, minamlian te - i gam ah hong paipai uh hileh, (gentehna Kawlpi), i ngeina bek hilo in, i sumbawltheihna anaak tuamtuam te, minamlian mihau te' khut sung ah hong tung ding a, asawtlo in i gam ah mi' nasem i suak thei kha ding hi.

"Pu Zo" kua hiam, cih tawh i buaibuai sa'ng in, i gamsung ah koicidan in khuasa thei ding i hi hiam, cih kikup huai a, minamlian te i gam ah hong kilalsak loh nading, koici in kihung ding ihi hiam, cih ngaihsut huai zaw ding hi.

Laigelh: Em El En

Etkakna: The Shillong Times Qouted from The Zomi Times