US gamsunga ZIP Code kipiak dan thu tawm

Banghang ZIP Code pen numbat mal 5 in kibawl hiam?

July 1st 2015 (Wednesday) ni hi leh US gamah ZIP code a ki zatna kum 52nd a cinn
a kum hi ta hi. Zoning Improvement Plan (ZIP) hong suahkhiat na pen Leitung galpi nihna (WWII) lai tak a sumbawl te hong khantoh mah mah lai tak ahi hi. A hih hang in tua lai in bel ZIP code te pen malnih bek hi pan hi.

Mun ki khenna a kipat khiatna (initial) hun pen 1943 lai hi in, tua hun laitak in laipuak (postal employee) te’n a nasep uh khawl in gal (WWII) a kuan laitak uh hi. Gal a kuan uh ciang in a mau nasep za a luah ding om lo hi. A cil in bel US gam ah khua pi mah mah 124 tel khia in nambat malnih ki pia masa hi.A masa pen in a khuapi leh a nihna pen in a State min ading in ki ciamteh masa hi. Hih dan a bawlna uh a hang in pen Laipuak nasep a lut cil te ading in a mun leh a mual te a khen uh ciang in a awl nang in a ki zangh ahi hi.

ZIP code Mal khat ciat ih a khiatna te

Hih postal code mal nih a ki zat khit zawh kum 20 khong a phak ciang (1963 kim khong) in anung a malthum te pen a ki behlap pan ahi hi. Tua lai tak in lai khak zong tam mah mah ta a hih man hi.

• A nambat masa pen pen (First digit) in a mun leh a gam munpi khat huam hi. “0” in pen US gam nisuahna ih a saklam huam hi. Tua mah bang in, “9” in pen nitumna lam munte huam kha hi.
• A zom a “nambat ah nihna leh ah thumna” te in pen, munkhat ciat ih sataih zumpi (central post office) te’ a ki ciaptehna nambat hi.
• A tawpna nambat mal nih te in pen khua khat ciat a om sataih te ih code nambat te ahi hi.

Genteh na’n, ZIP code 10014 bang hi leh, “1” in pen Delaware, New York, Pennsylvania huam hi, “00” in pen New York state sung a sataih zumpi ih nambat hi’n, a tawpna “14” te in pen New York khuasung a om Manhattan khawk genna ahi hi.
1963 kum in ZIP code malnih pan malnga a khan sak khit zawh kha 6 sung in US gam bup ih mun khempeuh in ZIP code nambat mal 5 ta nei thei pah uh hi.

A nung a nambat val lai te’ vai

1983 kum a tun ciang in ZIP code pawlkhat te ih nung ah Hyphen ( – ) leh nambat mal li(four-digit) ki behlap thuah lai hi. Hih a behlap thuahna uh a hang in pen, tu’a a neihsa nambat malnga te pen munpawlkhat ah laipuak te ading a nawngkai pian a hih man ahi hi. Tua hang in ZIP code pawlkhat te in nambat 9 bang nei uh hi.

A “nambat gukna leh sagihna” te in pen vengkhat sung a munte, taih(building) sungkhat a office block neu neu te ading leh inn veng block tuam tuam te kiang ah laipuak ciang a manglang leh a kiciat zawk nang in a behlap uh ahi hi.

A tawpna nambat mal nih te in pen khawk khat a om taih(building) tuam tuam te leh, block khat sung a om inn tuam tuam te a khenna vuah azat uh ahi hi.

A beisa kum tawmno sung a technology khantoh na te hang in sataih(post office) pan laikhak pen hong tawm mahmah ta hi. A hih hang in, ZIP code te a ki zat theih na mun pen tam lai veve hi. ZIP code a ki zat theihna pawl te pen hi bang hi, Kum phazah, Sang lam tawh kisai, Numei leh Pasal phazah simna, minam(Race) bang zah pha simna cih pawlkhat te pen ZIP code mun khat sung pan ki-enkak thei ahi hi.

Jerome Khai