Tutung ZNC thuzeekpi Pu Gin Kam Lian in Zomi sunga thukikupna alun pen pen khat ahi Zonet ah ZNC maban ding tawh kisai kawi ci kalsuan ding cih, mipi kiangah thu hong lui khia ahih manin amasa in ZNC tungah lungdam kipahna gen nuam masa ing.
Thu hong hon tawh kiton in athulu " Mailam kalsuan daan ding" tawh kisai ahih manin , tua maban tawh kisai muh daan ZNC leh net memberte banah mipi kiangah , anuai a bangin ken zong kong lui khia hi.
1. Zomi National Congress in 2010 kiteelna boycott ding cih khensatna April 3 ni party meeting ah khensat ta hi. ZNC pen mipi teel ahih banah Zogam partyte sunga active lai omsun ahih manin ZNC thu khensatna pen mipi khensatna hi pah hi. Tua haih manin Zomi mipi in zong 2010 election boycott cihna hi pah hi.
2. ZNC in 2010 election boycott ahih manin, tu le tu a panlak pah ding pen bang a hiam i cih leh "Government Bawl " ding ahihi. Bang hang hiam cih leh Party registration pen May kha 7 a bei ding ahih manin tua zawh ciang Kawlgam politic atuam pi khat a hong kihei ta ding ahih man ahihi.1990 kun a mipi te'n galkap kumpi deih nawnlo a mipi teel kumpi bawl dinga vote tawh asawl uh ahih manin tua mawhpuak pen ki theih mawh bawl theih hilo hi.
3. ZNC in Government bang ci bawl ding hiam cih leh ZNC pan UNA tua pan NLD tawh pang khawm a CRPP pen Kumpi a puang khiat ding ahihi.
4.NLD le UNA in 2010 boycott na pen ZNC le Zomite in advance a boycott ding thu cialpi aneihna le thu pulakna hang zong tampi kihel ahihi. Tua maban nawt suak in NLD in kum 20 val vingveng meiam lawng abat kuaukuau niloh, asawk ngam loh " Kumpi" bawl ding pen tu'n hunta maqhmah hita mah le zong, bawl cih tha dah , agenngam zong om nailo uh hi. Tua pen alumlai mah in ZNC in initiative la in UNA le NLD te nawhtak a convince mengmeng ding kisam sa ing.
5. CRPP kumpi puangkhiat ding pen ahih huai penpen khat ahihi. 1986 kumin Philipine ah Akino party in azawh ciang Galkap kumpi in pomlo hi, ahizongin Akino te'n Kumpi puangkhia uh hi, mipi le leitung in zong pompah uh hi. Maban ah bang tuak ding cih sang, "mipi in vote tawh bang sem dinga hong sawl hiam" cih thu meilet in na la zaw uh hi.
6. Government Form pen SPDC facist te'n zadah le alau penpen uh ahih man in , hong dawm hetlo ding ahihi. Kimat , kibawlsiat gen loh , luang tampi in zong sawng ding ahihi. Ahizongin SPDC Facist Roadmap bel lampial (derailed) sak zo ding tua bek om ahihi. SPDC tawh gamsung sumpiangteng gukhawm nuam a hong kipan ta ahi leitung democracy gam khenkhat zong akhut uh mei am tawh bik hong bang zo pan ding ahihi.
7. Kiniam khiat le kidawhtak a NLD le UNA in kum 20 val vingveng SPDC vasano ann ngak banga akam dawh dawh hang, bang mah phattuamna omloh banah mat le hen, bawlsiat le thah khiam tuanlo ahih manin "Kumpi Form" le uh cin zong abeisa val a thuak ding om tuan nawnlo ta ahihi. Amau Kawlte paunak ah " Tagaung htet Nya Manet" cih hilel ta ahihi.
Hih atunga pen gamsung gampua kipawlna le mipi tuamtuam sung pan akigen zawh sawtta hi, ahi zongin kua mah in raise khia ngam ngei taktak lo ahihi. Media khong ah ahem a gelh kiaukiau le meeting khongah gen kiaukiau cih loh agenngam taktak tamlo hi.
Official a ZNC thuzekpi Pu Gin Kam Lian in advice le suggestion hong khonkhia ahih tawh kitonin, Zomite mah in Burma Dilemma ( Kawlgam Lungmangna) khensat sak zel leng hoihlo ding hiam, cihna tawh hong kuppih kik ka hihi.
Muh daan kikupna ahihi.
Zahtakna tawh,
Khup
Src: Zo Khup
Comments
Post a Comment