KAPTEEL KHUA AH NUN NUAM ~Dr Dongno.

 KAPTEEL KHUA AH NUN NUAM   Dr Dongno.

Gam pua ka pai khiat zawh kum 20 khit, 2009 kum December kha in Kawl gam ah ka ciah kik pak hi. December 31 ni-in Kawlpi panin Tedim ka pai to aa, ih gam sung ah sing tampi na bei ta hi. Kum 20 sung bekin hizahin singte bei leh, mailam kum 20 ciangin bang suak ding cih bekbek ka lungsim sung ah om hi.

 2010 January ni 3 ni ciangin Kaptel Hausapa, Pu Do Za Tuang leh upa thumin akhua uah ong sam uh aa ka vapai hi. Gungal khuate nangawn singteng bei khin ka mun ciangin ka lungsim gim semsem hi. Na khat pepeuh bawl loh phamawh ta hi ci-in ka khentat hi.

Tua hun laitakin, Kaptel khua ah micro-hydro neu, veng nga ah om khin hi. Ahih hangin, tuate tawh mei taang bek kingah aa, an kihuan thei lo ahih ciangin, sing om sunsun kitomin, sing bei semsem ahih manin singzung nangawn kito ta hi.

Hausa pa kiang ah “ Tui kicing ding a om leh Hydro lian khat kong vaihawm sak ding hi” ci-in sum om lo pi-in kamciam ka pia hi.

2010 March kha ciangin, Electrical Engineer, Pu Mang Piang in anen-asi aa atuatna lai ong khak hi. Tua ciangin, taangpite kiang pan huhna ngetna lai khat ka bawl aa Australia gam, US, Canada, UK, Hong Kong leh Taiwan gam teng ah ka zi leh kei sang kahpih siahuante kiang leh meltheih lawm leh gualte kiang pan in huhna ka ngen kawikawi uh aa, asawt lo-in $ AD 16,000 val ka ngah uh hi. Tua ciangin nasep ka kipan sak pah uh hi.

 

Thanuam mahmah, tha hat mahmah uh in, hanciam takin nasep kipanpah uh aa keen dang suang tumpi lak ah tui lam tai lang val asau khat leh tui kholna, Tuibem, bualpi khat kum nih maa-in ong zo pah tingteng uh hi. Huhna sum kingahzahin zawh siang dong a ki sam lai ding sum vekpi ii seh li suah seh khat ong cin zo bek ahih manin, a kisam lai azah thum teng, ken lah nasem nawn lo ka hih ciangin, ka zi Dr. Maisie Dong in ong piak sak tawh aki zo siang ahi hi.

Hih Hydro Project aa bei zah atung aa kong gente sung ah  khua mite hanciamna, thaman ki hel lo hi; sumtangin kituat hileh sang ( lakh, teng ) aza aasim pha lai ding hi.

2012 kum December kha 27 ni-in hon pawi nasiatakin ki bawl aa, Chin State vuanzi ahi, Pu Cin Lian Pau, Minister for Electricity & Energy, Pu Nang Za Mung, Minister for Planning & Revenue leh Pu U Ba Maung, Minister for Social Welfare, vuanzi thumte tawh ka va hong uh hi.

Tu-in Kapteel khua ah, Hydro tha tawh, buh kihuan, vaimin ki-uii, meh lim ki bawl, niangtui kisuang in, set tawh puan kisawp, puan ki taih, sa leh singgah antehte fridge sung ah kikem, heater khualum ki awi, lettama na kisem ta aa, nungakte’n sam nangawn kiil sak ta lailai uh hi. Hih te khempeuh gam khangtosate mah bangin switch mek ziau bek tawh ahih uh hi ta hi. Bangzahin nuntak nuam hiam!!

Alungdam huai thu khat lai ah, sing tawh an huan nawnlo uh ahih ciangin, kuamah singtom, singpua in pai  nawn lo ding aa, tha maangin nuntak nakpi takin ol khin ta hi. A sawt lo-in agam sung uh ah sing ong niim diildial kik tading aa, khuahun ong maan kik  ding hi.

Hih pen ih Khamtung gam, Chin State, sung bek genloh, Kawlgam sung ah ih khuapi lianpente ahi Yangon, Mandalay nangawn ah, ani-anai ciangtanin electricity ki ngah bek hi napi aki lamen ngei lo, sun leh zan, nisimin electricity akizat masakpenna khua ahih manin huhna ongpia leitung mun tuamtuam pan ong deihsak mite tung ah lungdamna kong ko uh hi. 

Khuakiim khuapaam in va-veel,  va-ettehin  hanciam ciat nading deihna bulpi ahi hi. Tua hi leh asawt lo-in ih Khamtung gam sung ah anop nuntakna ong tung thei ding hi.