ZNC Founder Pu Pum Za Kap Tangthu

ZNC Founder Pu Pum Za Kap in zan ni (26 Jul 2009) in Zangkong pan in hong nusiata hi. Atangthu theihloh aphamawh om ahih manin tutadih akikaikhawm zo pak teng anuai aa bang hi.

Pu Pum Za Kap pen Thangsing, Ngaihte beh sungpan  India gam, Manipur State Suangdai Khua Hausapa tapa hi. Apu apa khanga kipan tuni dong mah Suangdai ah siahkai lai uhi. Zangkong Bahosi Building 41, Room 18 ah zi Nu Ciin (Naulak) tawh tanu 5 tawh om uhi. Tanu 3 na Lia Zamnu pen kawlgambup ah Lasiam Minthang khat hi'n Zomite in aki saktheih pih ahmah khat hi.

1. Pu Pum Za Kap pen gam le minam it mahmah hi-a a kam bek tawh genlo zaw in sepkhiatna  tawh  tangthu hoih tampi hong nusiat  hi.


2. 1988 Kum Kawlgambup buaina hong om ciangin Mipi makaih General Strike Committee pan Minam zui-in kihel ding hong gel uh ciang ei Zomite zong Chin National Unity cih min tawh kiding in amah zong makai n kihel hi. Bek thamlo in Siamsinte apiak Zopuan kop 30 (Numei pasal) zong hih lungphona ah kisilh hi.

3. SLORC kici Galkap Kumpi hong kah ciangin Party phuat ding lampi  hong ahimanin Zomite in zong Zomi National Congress ki phuan hi. Zangkong ah Zomi Innlelo nei, sumlepai nei, pilna siamna nei tampi a om hangin Makai ding leh Innlelo neihsa tawh mapang ding om zolo himanin Pu Pum Za Kap in Minam  itna tawh President maikaipi vaipuak la in York Road a inn sapna ah ZNC Head Quater dingin zang sak hi. ZNC Sign Board zong suangpah ahih man in a innnei te tawh buai uh hi.

4. Zomi te tangthu ah a om ngeinai lo gam itna la le zawlla  te ahi Lengtong series sponsor sem in a phuankhia masa pen hi. Zogam pan Zangkong ciahlekuan sumbei khem peuh sik in Zomi Khangno tampitak pantah zo hi. Tua akipan in Suan Mang, Gohau(anung lam ciang) te unau’ makaih Lengtong Band pan Lengtong Pauno, Cingsan, Lengtong Kamkhen  cih bang in Zomite Studio Music Tangthu hong ki pan khia hi. Hih Lengtong late hangin India gam a teng Zomite le Kawlgam a teng Zomi te kikal kizopna tampi hangto sak hi. 

Biakna lam ah zong Dorcus Team kici Cingsan te unau Pasian La khumna ding sponsor pia hi.  

Zongeina lapi zong Kam Gin Mang(Tamu), Kham Min Thang (Kawlpi) cihte makai in  studio ah khum ngiat uha Pu Kap in sponsor sem hi. Tuni dong Zomite sungah a kizang mahmah khat hi.

5. Sagaing, Zuathit Kyi Khua a om Nationalities Development University ah Zopuan kop(numei, pasal) 30,  1986 kum pawl in apiak khiat pen tuni dong mah aki zanglai suak hi. 
Zangkong Zomi Siamsin te a ding zong 1986 kum kim pawl in Zopuan kop (numei, pasal) 30 piakhia hi. 1988 gambuai khit ciangin a tunna ki thei nawn lo hi.
Cidam in Khual azin zawh lai'n Zangkong ah Siamsin te sum kisam peuh mah sum le pai tawh ahih theih zah in huh hi. 

6. Zomi sungah sumbawl sumnei tampi a om hangin Pu Pum Za Kap bangin gam le minam ading a sumngam, a piakhia ngam mi tam lo hi. Pu Pum Za Kap pen kum 60 val bek leitung ah anuntak hangin Zomi ta ding a mang ngeilo  tangthu tampi hong nusiat hi.  Zomi tading supna lian mahmah hi. A dam lai a zi, a tate ading thu ngetsak ciat ni.  

Zingciang sun nai 1 in kivui ding hi.

Pu Pum Za Kap’ thubul let kammal “Gam leh Minam a it theilo peuhmah master brain nei kici theilo hi”

Lungzuang khuangai kawm,

Sawlna ombang in,

Thangboi

Zangkong.

Pu Pum Za Kap hong nusiatna tungtaang ah Norway ZNC-LA pan Dahpihna thupuak

          Zomi te ii i deih mipi thuneihna leh suahtakna, mihingte ngah ding hamphatna, dikna leh thumaanna, mihing khat leh khat ki zahtakna , ki-itna ki lemna, nopna lungmuanna leh daihna, mipite khantohna ding vaihawmna i ngah theihna dinga Kawlgam sungah tuma kum 20 paisa lai-a hong dingkhia i Zomi political party ZNC President masa Pu Pum Za Kap hong nusiat ni-in gamsung gam pua a om Zomi political activist khempeuh in i mimal in a hi zongin, kipawlna min tuamtuam te tawh a hi zongin dahna hong pulaak kawmin ama tungah zahtakna kong pia uh hi.

           Tua tawh kizui mahin Kawlgam democracy ki ukna hong om theihna dinga, politic lam tawh kisai makaihna na hong sepsak leh Zomi min tawh hong dinkhiatpih ZNC party makai te sung pan hong nusia sa, Pu Vungh Za Pau, Pu Khual Za Nang leh Pu Gin Thang te banah khua tuamtuam pan activist hong nusia sa Zomi makai dang khempeuh zong phawk kawmin, amau te tungah zong zahtakna kong pia uh hi.

          Tua mah bangin Zomi, Zogam leh  Zo minam te suahtakna dinga nasepna ah nuntakna, guh leh ban, inn leh lo, sum leh paai, thagui thataang, neihsa lamsa hong suplawh sa mimal a kua mapeuh leh Zomi te i khangui kizom a thumaanna leh cihtakna, siangthona, itna deihsakna leh thukhualna hoihna te hangah thongkiat khaukhih leh bawlsiatna hong thuak lawh Zomi khempeuh zong kong phawk uhaa, ka lungsim sungtawng uh pan kong thuakpihna uh hong pulaak kawmin zahtakna kong pia  uh hi.

          Hong nusiat a zi a ta, a u a nau, a it a ngaih a lawm a gual, a mipih a sa pih, a minam ading in leh Pasian gam a dinga a seppih khempeuhte tungah Pasian Khasiangtho hehnepna hong tung kim ta hen cih ka thungetna uh hi aa, ama lungtup leh ama deih Zogam leh Zo minamte suahtakna, ngahding kilawm hamphatna te hong om theihna ding vaihawmna leh kalsuanna te hong picin theih semsem na dingin, Kawlgam kumpi vaihawmna leh ki ukna haksatna tampi sungah hangsan taka amah i Pu Pum Za Kap maban tuni donga hong zop sak hong dampih lai Pu Chin Sian Thang leh a seppih/a vaihawmpih Zomi Zogam political activist khempeuh Pasian in hong makaih sak hen la, amah i Pu Pum Za Kap hong  deihsak i Zomi Zogam sungah matut gualzawhna suahtakna leh picin na nopna daihna ki-it kilemna te ataka muhtheih dingin Pasian in ama nungsang ah a om lai Zomite maban khempeuh lam tuamtuam panin thupha hong piak sak ta hen.

          Hong nusiat lampi hoihte ko khangno te in ka tunna peuh uh panun hong it Zomi Zogam leh Pasian Gam adingin a hoih thei pen leh a etlawm thei pen dingin ka hih theih zahzah un a maban teng kong na zomto zel ding uh hi cih Norway ZNC-LA panin ZNC phungpi ah leh Pu Pum Za Kap Innkuanpih te tungah thu kong puak uh hi.

Pasian, Gam leh Minam ading deihna itna nasepna leh thungetna  kiukhat pan,

ZNC-LA Norway tangin,

Hong phawk mah mah hong dahkhawm,

Sia Thang Khan Thawn Suante