Skip to main content

World Baptist Alliance by Dr Do Suan Mung

World Baptist Alliance by Dr Do Suan Mung
Abeisa July 2-7, 2017 sungin Thailand khuapi Bangkok ah Baptist World Alliance ten Kumcin Khawmpi (Annual Gathering) khat nei uh hi. Tua khawmpi ah American mi Dr. Elijah Brown General Secretary thak dingin teel uh a, mai kum kipat ciangin tu laitak a sem Jamaica gammi Neville George Callam laih ding hi.  President bel South Africa gammi Paul Msiza mah hilai hi.  Hih khawmpi ah gam 50 kim panin taangmi 300 ding khawng kahthei hi.  Hih khawmpi sungah America a om ei Zomi kipawlna khat ahi, Zomi Baptist Association of America (ZBCA) zong member khat in kisang hi.  ZBCA pen Kawlgam a Zomi Baptist Association of Myanmar (ZBCM) tawh pawl kibang ahi hi.  Leitungbup Tuiphum kipawlna lian khat tawh kizom suak ahih manin amau zong lungdam angtang mahmah uh a, ei adangte in zong i lungdampih hi.  Baptist World Alliance ah ei naideuh a om Tuiphum kipawlna lian ahi, Myanmar Baptist Convention (MBC) ahi zongin, Lamka lam a Evangelical Baptist Convention te ahi zongin sauvei simlai in kipawl zo uh hi. Myanmar Baptist Convention (MBC) kipawlzo ahih manin MBC khutnuai a om Convention leh Association khempeuh zong a kipawlsa suakpah hi. Tutung in ZBCA tawh kibangin the Baptist Evangelical Church of Chad leh the Turkish Baptist Alliance te zong pawlmi in kisang hi. 

Mi tampi in Baptist World Alliance thu tam theih khollo ihih manin tawm genkhawm leng ka ut hi. Baptist World Alliance pen Baptist Union of Great Britain pana hong gahkhia ahi hi. Hih  kipawlna in leitungbup kipawlna khat (World Alliance) a lunggulh uh ciangin thulet bulpi dingte geel in 1905 kumin London a kibawl Baptist World Congress panin a phuhkhiat uh ahi hi. A kipat tungin Lai Siangtho siam leh thugen siam minthang Alexander Maclaren in tawlkhat president panmun la hi.

Tu laitak Baptist World Alliance sungah gam 124 panin Tuiphum kipawlna tuamtuam 238 kipawl hi. Tu laitak aphualpi uh Falls Church, Virginia, USA ahi hi.

Baptist World Alliance ah kipawlna dangte mah bangin President leh General Secretary mah alianpen hi-a, General Secretary pen Chief Executive Officer (CEO) zong hipah hi. Hih makai tegel ahuh dingin gam tuamtuam pan a kiteel Vice-President pawlkhat zong kikoih hi. Leitungbup kipawlna ahih zahkhat in amun zui in anuai a bangin khen guk kisuah hi. 1)the All Africa Baptist Fellowship, 2) the Asia Pacific Baptist Federation, 3) the Caribbean Baptist Fellowship, 4) the European Baptist Federation, 5) North American Baptist Fellowship, 6) Union of Baptists in Latin America cihte ahi hi.

Baptist World Alliance sungah mission (gammial nasep), evangelism & justice (gupna thugenna le thumanna), Baptist World Aid (huhna piakna lam), finance and administration (kipawlna sum leh pawl sung ki-ukna lam), communications (thu kizahktuahna, kizopna), promotion and development (khantohna lam) cih bangin kikhensawn hi. Papi, Numei le Khangno kipawlna zong om hi.

Baptist World Alliance a kipat tungin ngimna hoih mahmah tawh kipankhia ahi hi. Gammial nasepna le gupna thu tangkona azai nading, Pasian biakpiakna lamah khantoh nading, ki thutuahna ding le kipawlkhop theih nading, dongtuakte huhzawh nading, mihing khat ih thuneihna leh thuman thutak hutzawh nading cihte hi-a, thuhoih vive ahi hi. Ahoih phalo khat pen upna tuamtuamte etkak a zuun khawm ding cih hi-a tua thukhat hangin tuni in Baptist World Alliance pen ‘Lai Siangtho bek’ aci thu um mite le kipawlna ta dingin a lunglut huai lua lo kipawlna khat suak hi.

Baptist World Alliance pen a kiphuatcil in Lai Siangtho a um (Conservative Evangelicals) te kipawlna ahi hi. World Council of Churches (WCC) dan hilo hi. Tuni mah in zong Baptist World Alliance sunga om mi pawlkhat in ‘Conservative Evangelicals’ hi ung ci lai kha ding hi.  Ahi zongin, akalsuanzia uh limtaka ih et ciangin upna peeng (liberal) lam manawh mahmah cih kimu thei hi. Hih kipawl na sunga kihel America gam a (CBF) Cooperative Baptist Fellowship te bang upna peeng lamah khauhpai mahmah uh hi. A Lai Siangtho sangte uah Christian upna kia amaan hilo, Jesu kia lampi hilo, Lai Siangtho zong khial thei lua, Pasian zong Pasian kia cih ding hi kei, Nusian zong cih theih hi, ci-in hilh uh hi. Upna peeng pupi khat cih theih ahi, American Baptist Churches (nidang a Northern Baptist Convention) te zong Baptist World Alliance ah kipawl uh hi.

Tua banah, Baptist World Alliance in WCC te mah bangin Tapidaw kici khempeuh, Lai Siangtho um in um ta keileh, piangthak in piangthak ta keileh, kipawlkhop ding leh Tapidaw ahi lo biakna dangte nangawn tawh biakna thu ah kipawlkhop ding hanciam lua mahmah dihzen uh hi. Kipawl na zai ahih ding ut lua mahmah laizang uh hi.  Tua ahih manin pawl sung lut ding zong thu haksapi hikhol lo hi. Ih phawk ding ah, upna thu ah ih zaisak nop luat leh Topa Jesu thugen, kong kawcik leh lampi neu (Mt. 7:13, 14) tawh kilehbulh a, Lai Siangtho tawh kigamlatna piang denlel hi.
           
Hih kipawl sungah abeisa kum tampi sung amuan a suanpen uh America gama Southern Baptist Convention (SBC) te ahi hi. A mi mahmah tamin, sumtha zong hat uh hi. Ahi zongin, Southern Baptist Convention te Baptist World Alliance panin 2004 kumin paikhia uh hi. Upna peeng lam zuan sa lua uh hi. Baptist World Alliance sungah numei leh numei, pasal leh pasal kiteenna azang pawlpite sang uh hi.  Lai Siangtho tawh kituak lo numeite tuiphumsia piakna zong zang uh hi. Tua banah, Baptist World Alliance a panmun sang lente atamzaw gam khangto nailo (Third World Countries) pan vive hizaw a, thu kikupna khat om leh America dan a akhangto sa gamte langbawl pian den se uh hi. Southern Baptist Convention te apaikhiat lai un hih thu zong asiksan khat uh ahi hi. 
           
Southern Baptist makai khat in,’ Baptist World Alliance pen United Nations (UN) dan hi in gam khangto nailo te makaihna hi-in America hong langbawl den uh hi.’ ci in genkhia hi.  Baptist World Alliance pen Baptist World Alliance hikei in Baptist World Annoyance (Anawngkaai Leitungbup Tuiphum) hi ci in min pia uh hi.

Biakna thu ah kipawlna khat tawh ih kizop ciangin kha thu ah bang dinmun nei uh hiam, cih thupipen hi. Baptist World Alliance in Kha thu pikoih lo ahih manin Lai Siangtho tawh kituak lo upna neite nangawn pawlmi in sang lel hi. ‘Lai Siangtho bek’ aci thu um mi leh kipawlna ta dingin Baptist World Alliance pen a luthuai lo kipawl ahi hi. ‘Kipawlna in bangbang um taleh ken  ka upna mah na um peuh leng,’ aciziau ihih leh bel thukhat hi-a, tua pen dinmun kician (conviction) neih loh vai lua hi. Dinmun kician neilo a hamphat nading peuh akawi delhdelhte Pasian in thupha pia khollo zawthei hi. I cih mah bangin upna thu thupi koih khollo a thudang khat peuh a meet nading ngaihsun ihih leh Baptist World Alliance in bang ciang taktak kipawlna sunga mite en zo, vaan zo hiam cih ngak a et lai ding hi ding hi.  Nidang pekpek a lutte zong khawmpi khawng kah lengleng zel cih lohngal hamphatna tampi i theihpih kei hi.

Hih lai pen alutsa kipawlnate mawhsakna hilo hi.  Amau zong teltaka kan a amau dinmun tawh kituaksa alut uh hilel ding hi.  Ahi zongin, ‘Lai Siangtho bek’ aci thu um mi leh pawlpi tuamtuam pan (adiakdiak in Kawlgam, USA, Singapore leh Malaysia a om EBC te) akhava khatpeuh ih omkhak leh Baptist World Alliance pen hibang hi ci-a ih kihilhcianna ahi hi.

Labels:

Comments

Post a Comment

Popular posts from this blog

Zomi: Who They Are

Zomi Total population ca. 2,500,000 Languages Various Kuki , Mizo , Chin , Naga , Paite Religion Christianity , Animism , Buddhism , Laipian Related ethnic groups Naga , Meitei , Hmar , Mizo , Kuki Zomi [1] is the name of a major tribe found in various parts of South and South East Asia. The term Zomi meaning, Zo People [2] is derived from the generic name 'Zo', the progenitor of the Zomi. They are found in northwestern Myanmar, northeastern India and Bangladesh. Anthropologists classify them as Tibeto-Burman speaking member of the Mongoloid race. In the past they were little known by this racial nomenclature. They were known by the non-tribal plain peoples of Myanmar, Bangladesh and India as Chin, Kuki, or Lushai. Subsequently the British employed these terms to christen those 'wild hill tribes' living in the "un-admiral. They are Zomi not because they live in the highlands or hills, but are Zomi and call the...
2 comments
Read more

CHIN, ZOMI, MIZO, ZO cihtawh kisai Debate

CHIN, ZOMI, MIZO, ZO cih minvai tawh kisai India gam aom ih mipihte kikupna, Debate bawlna hi. Sausimsim in alunglut velvelte bekin atawpdong simzo bekding hi. This is the outcome of the debate about our nomenclatures like Chin-Kuki-Mizo-Zomi on FaceBook – Zolengthe Group. The debate Vaphual shows that every one of us clearly know who we are – We are Zo, but some opined that Kuki nomenclature should be used as it is recognised nationaly and internationally. This is the starting point of the debate: Dear friends, MIZO=ZOMI, then is it something like both side of a coin? If it is so, then there is no chance of sitting under one administrative umbrella. Another Point: Mizo or Zomi ~ Which one should be the right word? I know You will say both. But according to Pu T. Gougin, Founder President of Zomi National Congress, “The land come first and then the people” therefore, it should be Zo… Mi….. that means Zo = Land and Mi = People. He further argued that MIZO is a wrong word; ...
Post a Comment
Read more

Zawgyi KeyBoard Installer For Windows 7

Zawgyi Font for Bit 64 1. Firstly, install the file. The File is Zawgyi Font for Windows 7 . 2. Download this software, its a keyboard for  Zawgyi. 3. Go to "Text Services and Input Language" in Control Panel >>Fonts; and Select "Zawgyi Myanmar Unicode L" Then all will be ok! If you still have some problems on Bit 64, you can run Alpha Zawgyi and then, run the given file from Mediafire . That is "ZawGyil_amd64.msi, ZawGyil_i386.msi and ZawGyi_ia64.msi". Among all these three, you can choose whatever u wanna install, which of them is ok, that means you run one ".msi" file from the downloaded file. It will solve your problems. If you still have problem on installing Zawgyi keyboard on Windows 7, You add this IEZawgyiGtalkFont . Download this and run it. There will be ok! Zawgyi Keyboard Installer for Bit 32. Zawgyi Keyboard Installer for Bit 32 is to run Alphazawgyi only. If you run Alpha Zawgyi , everything is ok.
9 comments
Read more