Kapteel Hydro-power Kum 5 Cinna leh Dr Donghno te nupa

Kapteel Hydro-power Kum 5 Cinna leh Dr Donghno te nupa

Leitungbup a om Zomi akuama ciat,

Itna khut tawh ih biak Pasian min in na khut taklam uh kong len masa hi.  Australia gam, Sydney khuapi ateng Dr Suan Za Dongh le azi Dr Maisiete nupa Kapteel khua ah January 9, 2018 ni-in in hong ciah uh hi.

Dr Donghno te nupa pen Kawlpi pan in Pa Thual Sian Sang @Thualpi (BOC,Hakha ) leh Pa Thual Khan Thang (s/o Suan Khan Nang, Accountant (District Civil Dept) at Falam)leh a lawmnu Nu Cing Sian Mu- te nupa in a mawtaw uh tawh Kawlpi ah na dawntuah uh hi. Tua panin Tedim lam hong zuanto uh a,  January 8, 2018 ni zan 9:00pm in hong zan tun uh a, Tedim Teeltuivon Kipawlna mintawh muakna naisia takin na nei uh hi.  Zan sawt khin ahih manin nitaak an neek ding zong sai ah a lap lmialmial  uh hiphial hi.

A zingciang zingsang khua hong vak ciangin Tedim panin kapteel lam zuan in Pa Thualpi leh Pa Thual Thang te nupa bek hilo in, Tedim Teeltuivon kipawlna min tawh Pa Neng Khan Pau(Halleluijah) leh  Nu Hau Bawk(d/o Shuan Khan Nang), Cing Khawm Dim leh a nau nu Huaitawng(D/o Pa Thualneu) in hong zui uh a, vekpi in Dr te nupa tawh numei 5 leh pasal 4 hong kizui thei uh hi.

 Kapteel ah Dr Donghnote nupa muakna dingin zinmuakna kongpi(gate) te nasia takin kibawl a, tua mun ah pawlpi kim pan bek hilo in, khua sung nulepate ahi thei zah in zinmuakna nei dingin lamdung ah dim takin kiding zihziah hi. Dr te nupa leh khual pan hong zui sanggamte muakna late leh ngeina lam a tuamtuamte tawh kidawn ziahziah hi. Zinmuakna ahih leh Dr te nupa in hong hawmthawh phial ahi zongin khuapih tuipihte in amau hih theih tawp in a kivaihawm hi a, သမၼတ pa hong pai zongin hizah sangin nasia zaw tuan kenteh kana kici liangh uh hi.

Zinmuakna teng a kizawh khit ciangin Hydro ih bawlna nak ahi Tuito lui pana Ih lak  tui kholna tuibem va en in, tuibem pen limtak kikem in, siangtho sinsen in aom a muhteh Dr te in tha ngah mahmah hi. Tui tawh kisai pen deih zah in hat zolo a, a pipe pen neu deuh ahih manin a Generator ie piakkhiat zawh zah ie 57% bek akizang pan ahihna zong Hausapa in Dr Maisie dotna tungtang ah dawnkikna nei hi. Adang 43% pen ih pipe pen 6” bek ih zat hi a, 10” tawh kilaih zo leh mei tha a vek in kizang thei khin ding hi cih hausapa in gen hi.

Nitaak an pen cihtaak leh simtaak hitase kei leh hanciam theih tawp in a lim pen kivaihawm a, Vok luang khat, bawng luang khat, ngalpi luang khat leh aisa sa tawh nitaak an neekpihna kinei hi. Pute a gil a vah uh diam bel thei kei ve hang in, ko a va kihel kha pawl bel ka gil uh vah mahmah hi.

Nitaak nai 6 ciangin khuapih a hithei khempeuh kikaikhawm in AG (Rev Hau Lian Kham Memorial Church-HMC) biakinn ah Dr te nupa leh hong zui thei sanggamte tawh  kimuhkhopna thupi khat kinei hi. Tua hun gelna sungah hong zin sanggamte kimeltheihsakna leh lungdamkohna letsong kipiakna te ahi zong, Pahtawina la leh Dr Donghno in kammal vaikhaknop hong neihte vaikhakna hong nei uh hi.

Dr Donghno in kammal hong vaikhak a thupi diak ka ciapteh phat diakte lak panin: Mei ih cih khuavak in Zeisu hi a, leitung ading khuavak hi. Hih mei pen Pasian in hong itna hong lahna leh eite ki-itna bulphuhna hang ahi hi. Tedim gamah gam keu in, puah phat kisam a, Kawlpi leh Tedim kikal leitang ah a zing zihziah singkungte tu in kum 20 sungin na keucip ahih lam a muh thu, lopa te keu in, om thilthial a, singkung lopa a om kik theih nadinga a lunggulh thu leh, hih Kapteel a Hydro-power mei tha hong piankhiatna thu a cingin hong gen to deudeu in mipi in tha kingah mahmah hi.(Dr Donghno gelh "Kapteel Hydro thu" zongkisim thei hi.)

Dr Maisie in tampi kong gen ding om nawn kei, ken a sum hong hanciam in kong sik a, no thathang si in na hanciamna uh hang hi. Kipawlkhopna ie a gah hi cih hong gen hi. Mipi lampan a kipau khia kammal khempeuh in lungdam kohna vive hi a, Dr te nupa zong lungkim ding uh hi cih ka lamen uh hi.

January 10 ni zingsang ciangin Buhlei mual kici mun awng ah Bawlung Tualpi ding etna kinei a, International Standard Ground khat kinei khin ahih ciangin behlap thuah kei ni in ih neihsa pen puah in zuun ni cih hong gen hi.

1. A masa in hih meivak hong tanna tungtang leh hih mei hangin na lungdam takpi uh leh hydro meiset hoih tak na kep sak un. Sawtpi a kizat theih nading leh khang sawtpi a ih nuntakpih theih nading a lunggulh thu hong gen hi.

2. A zom ah gam hal kei un. A keugaw gam le lei te ah singnote na suan unla, pawl(singkung lopa po lohna) munte ah hanciam in singkung na suan un. Tua hi leh ih meiset in tui kicing in hong ngah dinga, ih meiset zat dingin hong kicing ding hicih hong gen hi.

3. Sing na phuk nawn het kei un. Ih gam hong nim in hileh gamsa-te in hong beel in guahtui hong kiat hun hoih kik ding a, ih gam no suah ding a, gamsa-te in zong nuamsa ding cih hong gen hi.

4. Tua bek tham lo in gamsate zong na kap nawn kei un. Hun khat ni ciangin gamsa te in lampi te hong kan in, mihingte in kikihta nawnlo in, motor in lamkanna ah a ot(awn)  hun hong tung ding hi hong ci hi.

Hi bang a hun hoih ih zat khop theih nading in Dr pa genna mah bangin 2009 December kha sungin Dr Donghno Tedim hong ciah in, tua a meek dok dingin Pa Do Za Tuang (Kapteel Hausapa) leh a lawmte in na bawh uh a, Kapteel ah na ciahpih uh a, a lunggulh uh Tanghlui tui (neek tui) lak theih nading in a panpih ding uh a lunggulh thu, tua himah leh Dr Donghno lunggulh in singkung lop ate nim kik dildial a, tum akum 20 lai hun a bat kik ding a lunggulhna te pulak in meiset vaihawm sak ding kamciam a kipiakna uh a takin hong gah khia hi.

Dr Donghno te nupa in sum le paaite amau ip sung pan sawk in, a cinlohteh a lawm a gualte kiang vuah huhan hong nget sak a, khua sung nu le pate hanciamna tawh ma kipangkhawm hi. Hih project pi pen kum thum sung sinsen kisem hi. Hih mei vai ah sep leh bawl khempeuh a kizawh ciangin December 27, 2012 ni in nasia tak in Meiset Honpawi kinei a, tua mun ah zong Dr Donghno mahmah hong kihel hi.

Dr Suan & Maisie Dong te hong leisak uh meiset Dynamo pen 100KW hi. Meiset bek tawh hong piang zolo ahih manin mei tha kaihna Transformer 3 kilei a, tua te pen 160 kVA, 100kVA leh 50kVA te ahi hi. Meikhau sauna pen 11kV te 6307 ft, 220 voltage te 30427 ft sau in kihawm khia hi. Sum bei vekpi a kituat ciangin Ks 54,519,700(Teng 600) val hi a, nitha bei pen 9,500 val kibei hi.

Kapteel ah tu in, mei tang in, TV, Internet, Hand phone, Rice Cooker, Ironing cihte akipan inn sung nasep vanzat tuamtuamte electrical vive hi ta hi. Kapteel akici na muh nai keileh khat vei hong pha in hong hawh in. Gual gen minthang Len Nupa zong va vel khawm ding hi hang. Len Nupa na muh khak kei leh na khang ah na kisik ni khat hong om teitei ding hi.

Dr Suan & Maisie Dong te muakna a kisa late anuai a bang ahi hi.

Zinmuakna La

1. Khim bang zing teeltuivon nun niam te tung,

Tung Sianmang hawmsiam lawmlawm ee,

Doctor Donghno, Dr Maisie Dongh le,

Vontawite tawh zing vaihawmna

Gia bang nong zuun pianna teeltui vangkhua ah,

Na khutma uh sunni bang tang ta.

            Tang bang damin(    ), Tuang nong tung ciat uh maw?

            Banzaal ziat( ) suan khut hong len ungh.

            Pheiphung suan zaitha nong neem uh maw?

            Lungdam maitai tak hong muak ungh.

            Sian Sinthu(  ) an bang kumkhawm ni,

            Sian min phat(                      ) zaila awi-khawm ni.

            Sinthu khat damtui bang luangkhawm leeng,

            Teeltui vangkhua sunni bang tang ding.

            *Teeltui Vontawi Sian in tawisang hen.

2. Vangkhua gia bang zuun ding tuang hong tung ta,

Zotang bang nong dam kim uh maw?

Tuanglam haksa, mual le guam, suk le to ah,

Sunggil kial, laidip nong neem uh maw?

Teeitui vontawite adingin saalphate,

Lau Kha Siangtho in lum bang sung hen.

3. Khim bang zing tteltui vangkhua nun in nuam,

An bang itna tumdang lua ee,

Pu Donghno leh Pi Maisie Donghte banzaal,

Vangkhua sunni ban taang ta,

Mualliamsa tuun le zuate mu bang ngai ung,

Sian min phat zaila awi-khawm leeng ee.

Lamal: Pr Nawn Za Huai

Nun in Nuam

1. Mimbang pianna Teeltui vangkhua Sianmang hong itna pian dang,

Mim gual tung va bang hong tuangsak a, Thupha namcin hong pia hi;

Khang sawnsawnte’n tu bang a cin ding, vangkhua kil bang a Khanna,

Limbelh Sianmang lum bang hong sun man hi.

            Doctor Dongh le Maisie Donghte nuntakna zangh in,

            Vangkhua pianin hong dang ta,

            Limbelh Sianmang lum bang hong sunna,

            Gual tung va bang ih tuanna

            Simlei mim  bang ih pianna Teeltui vangkhua ah,

            Lungdeih Hydro power sunni bang tang ta.

Phamsate aw zuang hong tho vevua, vangkhua pian in dang ta ee,

Lam bang paak zaideih awi-khawm ve ni Sian in lum bang hong sung ee,

Phamsa tuun le zua zuang hong tho in maimit hong suan dih ve vua,

Mim bang pianna ih vangkhua nun in nuam ee.

3. Tung Sianmang an bang itna pian dang lum bang hong sunna pian dang

Tualniam vangkhua lum bang hong sung in paak bang tawi in hong dom sang,

Sian siam in guallai lam bang ih paak vangkhua sakmin lawi bang thang,

Sian siam hi, Sian siam hi lam bang paak ni.

Emanuel Baptist Church (ZBCM)

Khua Siam Pi le Pu

1. Vangkhua khim bang zing lamet bei ih om lai in

   Sian in zingvai hong hawm a, Teeltui vontawi te lungdeih ciibang  

    hongteel lametna Aksi pizingsol hongsuak ta…

CHO:  Hong muak ungh khuasiam PilehPu tangbang dam    

            tuang hongtung ta maw, Teeltui tuailai ten ngilhmawh 

            namin uh paak bang hongtawi-in zailakongawiuhhi… 

2. Zunlohlen kai in vangkhua giabang zuun ding Sian tawh kop   

    hanlung hongciam Pu Suan Za Dongh leh Pi Mai Sie anbang

    itna etlawm Teeltui vangkhua sunni bang hong taang ta…

3. Vangkhua giabang zuun damtui bang luang khawllo aw,  

    Pianna vangkhua paak bang hong tawitawi lai uh Sianin

    siamhen la Khan kumkhua sawt in Teeltui vangkhua ah

    nunnuam nga bang leeng khawmni…. 

    Phuak: Rev. Song Sian Pau (HMC-AG)

    Aw Bulh: Pr. KhupSuanLian

1. Sesum minthang lambang zonna Pupa theihloh siingdang

    gamlei ah pheiphung kisuan kisuan zotawi tangpal liapalte

    laizom melma bang aa, sesum minthang ngaihman a tunlo

    zualo siang va kawm laiah nei ciinlehtuai tawh gibang hong

    khen vaimang se sum hi.

    CHO: Tangbang dam lai paal amni khawlkhopin sawmsial man

               ee a ci Zomite hi hang tunlehzua leh lialehtang ten tomkal 

               ihnun sung ih pal laini ih pal laini Sianmang aa ding 

               TunlehZua lialehtang ten zangsiam veni.

2. Ih pallai ni ih pal laini zaitha hatlai momno ihhihlai mi 

    lunzatam aa ding pallaini zang den ding maw tung aa khai 

    mu bang a lensianlengh lengvan laizawl ah nasiang lo bang   

    kawmnuam ing heina peuh ah tang bang dam awtung  

    sianmang tawh ma ciang suankhawm ni

3. Tang bang nadam laihiam aw cin Tunlehzua’n lailung na gelgel   

    ung sesum minthang loding Sian in hongsiam ta hen aw lung  

    tuptui bang tung in vangkhuasiang lam zong ding in  lai lung na  

    gelgel ung e tang bang dam in TunlehZua tawh holung kumkik  

    ding sian in siam hen 

    (Teeltui Zai Awi Group)

Mi1{1. Min bangpiannaTeeltui vangkhua lai

       {2. Sinlai hong pom vangkhua giabang zun….

        :kumsawt khimbang zing nuai simlei taikhua hongvak sak. Aw2.{Aw Pu Donghno geelsiam phuhbang kho, Hydropower ni bang tang ta..

Aw 4{Khangsawn momno ten tubang a ciin ding in Pu Donghno Pi Mai Sie…

 Mi1. {Tangbang dam ding sianin siam hen aw

 Aw4 {Vangkhua nuamtuang bang hongtung .. 

 Aw1 sprano Ta

      ** Bass only(Tang bang dam tuanghongtung ta maw)

  Mi1. {Banzal ziatsuan hong len ung} 

  Aw4.{Zaideih awi lambang paak, deih libang cinna. 

          {Oh-oh-oh-oh-oh-oh, phuh bang kho den hen

          {Zaideih awi lambang paak deih libang cinna.

            Phuak: Pr. Suan Lian Thang(KZBC) 

Zo lapi Pawlkhat:

1. a) Puvon lungdeih ciaugal vangkhua kilbang khang ee dawh in 

        tam tah ee

     b) Teeltui vontawi hanlung ciam un sin sung bang ciimkim veh  

        aw khaimulensiamzilveh aw    

        PU TUAL KHUA MANG  

  

2. a) Khuadeih a vangkhua ka suan aw ka suan tu-bang ziingveh aw

    b) Ka suan tu-bang zing veh aw vangkhua peek in zai hen aw

         PU THUAM THAWNG LA

a)  Siang sung pak silbang ongtawi ding Pu Donghno leh 

     Pi Mai Sie aw, zosuan tangbang nongdam hiam cing ee

 b) Pu Donghno hawmsaim, Teeltui vangkhua tungciang 

     aksi bang tang ta aa, nahawmsiam sawn aw cing ee

     khangsawn a ciin ding  aw ee

     Lai pian Pawl pi

3. a) Teeltui vangkhua nibang taangsak minthang aw taangbang dam tuang na hong tung hiam aw….

    b) A gamvangla siang nong kawmna zaitha patpuan bang na nem aw      

        Phuak : Awn Khan Gin (Veng 1)

 4. a) Zosaun tongdot liimbelh mang aw vangkhua pakbang nahongtawi nun nuam in lam bang na pak ung. 

     b) Gam lei anbang it man aa, sinlai nagel tuanglam pheiphung suanka zaang hi ee…

         Phuak : Tuan Do Cin (Veng 2)

5.  a) Teeltuivangkhuagia bang zunsiam Dr Dong leh ang kawi Maisie Dong taang bang dam ban zal honglen ung ee

     b) Ang nong van aa dam tuihei siamsiang lam zongkhau bang zaam aa Hydropower nibang tang ta ee

         PhuakLianKhen Thang (Veng 3)  

6.   a)  Pupa khan a khim bang a zing 
Siantawh kop in Pu Dongh no leh Pi Maisie Dong 
vangkhua sung ni bang hong tang sak ee.

     b)  Sian hawmsiam ee pianna gam lei 
giabang a zun Pu Dong no leh Pi Maisie Dongh 
tangbang dam khan kumkhua sawt hen aw…

         Phuak: CingNgaihNuam(Veng 5)

 7. a)  Pupa khan a khim zing tawh kilbang a khang
      Lun vontawi ten tang lobang phong ee

    b) Lia leh tang aw lung I tai nam I vangkhua leh 
   I siang sung teng Aksi bang tang silsial lawm aw ee

         Phuak : Zo Khan Man ( Veng 6 )

8.  a) Teeltui vaang khua lumbang sung ding 
Dr. Dongno Dr. Maisie Dong na hawm siam uh 
libang hong cing ven, Ih vangkhua sunni bang tang ta.

   b) Sunni bang taang Hydropower  

malbang in kothei hi leng phamsa  
Tun leh Zua lai zom gaih teng tawh 
Dr. Dongno cin Paak bang ong  tawitawi nuam veng ngaih aw.

  

9.  a) Namcin von tawi zatam lai ah, Sian in ci bang aa hong teel Dr.   

       Minthang siahuan  Dongno leh Maisie Dong te aw taang bang       

       damin tuang nong tung tuang nong tung na aw.

   b) Tangbang dam tuang nong tun vua leh Teeltui vang khua lo        

        bang nong khualna Hydro power sunni bang,

       taang ven khang sawn ten tubang a cinding in, 
       na min thei bang lo ung e ngaih aw.

         Phuak: Ai Khan Shuan (Veng 9)

A video pen Youtube pan et theih ding leh man pawlkhat hong koih ungh. Na et sak ciat un.

Thupuak: David Lian