Ci Kisawh Coffe Haikhat

Ci kisawh coffee haikhat

Amau ngel pen Companyte nitak annekkhopna pan kituak kha uh hi. Pilna
nei, melhoih duangcing khat in company sungbup ah tuanu pen minthang
vangvang hi. Amah ahih leh mi mawkmawk khat cih theih phial hi. A hel
a tam mahmah tuanu pen a man zong a lunggulh gieugiau zawh sauvei sim
ta hi. Nitak annekpawi a mankhit ciangin coffee dawn khawm dingin
aman, tuanu hong zawn hi. Thakhatthu a a zawtvat tak ciang lamdang sa
vat himah tase leh a nial ding kilawmvatlo ahih manin a lusin in hong
sang hi.

Coffee sabuai ngei ah gen ding bangmah hong omlo mawh hi. Anih un hi
ngualngual tuak uh hi. Dawn semsem in ciah ziauh ding cih bekbek
tuanu lungsim sungah om hi. Nasempa in coffee hong piak tak ciangin
thakhat thu in aman “ lawm nong hehpih na tawh ci hong pia ve. Coffee
ka dawn ciang ci sawh a ka dawn pen zongsatna khat in nei kha zen veng
aw” hong civat ciang, tua nu in lamdang a sak bek thamlo nasem pa
nangawn hong cimawh pak hi. Ama kampau a za khempeuh in a mittang uh
ama tungah hong gawmtuah vat uh hi. Amah zong a mai hong san teitai
hi.

Nasempa hong piak ci pen a coffee hai sung sawh in damtak hong dawn
hiathiat hi. “Bang hang coffee sungah ci sawh hiam?” cih a theihnopna
pen ip zo nawnlo ahih man in tuanu in hong dong khia ta hi. Amah zong
them hong hibual pak hi. Tua khit ciang kammal khat khit khat lo
ciatciat in, “Kei bel tuipi ngeipan a khangkhia hi ing. Ka neulai hi
leh tuipi sungah tuak in tuipek den ing. Tuihuai ten hong khak ciang
ka kam sung tuipi tui alte ka kam sungah hong lut hi. Tun inn ka tun
lohzawh sauvei lua ta ahih manin inn phawk a ka lung a len sim coffee
sungah cikhah in dawn kha den ing. Inn le kei kigamlatna pen a nai
dingin hong bawl tawh kibang”

Ama kammal in tuanu lungtang hong sun kha hi. Hih pen pasal khat in
inn phawk ing cih a genkhiat a zak masakna a hi hi. Inn phawk a
lungleng pasal khat pen innkuan sung a kin mi, innkuan a it mi hi
ci-in hong ngaihsun kha hi. Ama gen tai tampi gamlatna a om munkhat I
thu a kigen pen tuanu in hong ngaihnopna lungsim hong suak hi. A
khingcip a sabuai kim pen damdam in hong gamlum suah hi. Tua nitak a
nih un thu tampi a genkhop theih ban uh ah tuanu a ciah ciang a inn
dong khak khuan hong ngah kha hi.

Tua khit nungah amau gel kimu mun pian hi. Amah pen a thukhual, mi a
kin, hehpihna a nei mahmah mi khat ahih lam tuanu in hong telpian ta
hi. Amah pen tuanu lunggulhziate tawh a kituak mi khat na hi hi. Ama
zawtna niallo a, hibang a amah tawh a kitheihkhak manin tuanu lungdam

mahmah hi. Ama zawn in khua sunga om coffe sai tuamtuam ah amah tawh
tu khawm uh hi.
Sai a pai sim un “Ci hong pia o maw, ka lawm in coffee sungah ci khah
a dawn pen zongsatna khat a nei aih ciang a” ci-in ngetsak den hi.
Hibang dan in tangthu hong mankuan tak ciang, anih un kiteng in
nuamtak in a nuntakna uh zangkhawm hi acih zel bangmah in a nuntakna
uh hong nawn khawm uh hi. Hibang nuntakna a nawk khop uh kum 40 khit
ciang a pasal damlo in hong si hi. Hih tangthu pen hiciang tawh a man
ding hi ta ei a cih laitak in ama koih laikhak khat tuanu in hong mu
kha hi.

Amah a sihma in tuanu ading a gelh lai ahi hi. Tua laisung hi danin kigelh hi.

“Nang kong khem toh suaksuak khak hong maisak in. Amasa pen coffee i
dawnkhop na phawk lai hia? Tua lai in kei bang gen a bang sem kha ka
hiam cih zong tel kha het lo mai hi ing. Bang ngaihsun kha a nasempa
ci lasak ka hiam cih zong thei keng. Coffee sungah ci sawh a dawn ding
cih zongsatna zong ken nei kha keng. Hih kong khemna pen nang lunglut
na hih manin ka khanglang phial ci kisawh coffee dawn kha ing. Aman
taktak gen khia ding ci-in hanciam zel ing. Ahih hang nang heh a, kei
nong taisan khak ding lauden ing.

Kei tun a pai ding hi ta ing. Na heh ding lau nawn keng. A si khinsa
khat bel na maisak ding hamsa ken teh mate? Hih ka nuntak sungin nang
tawh ka kiten khak pen kei ading a gol pen lungnopna hi. Phamkhit nung
nuntakna dang a om zenzen a leh zong nang tawh kituak khawm nuam lai
ing. Ahih hang ci kisawh coffee bel ken dawn nuam nawn keng. Ci kisawh
coffee pen dawn ding bangzah a hatsa cih nang thei kha kei teh mate?
Ahih hang nang kong itna lungsim tawh tua coffee pen ci sawh in dawn
den kha ing”

Lai a sim khit takciang tuanu hong lingkhia vat hi. Kei khem a thuak
kai ve maw ci in hong kingaihsun hi. Ama zak nawnloh ding kammal khat
hong gen khia chialchial hi. “Kei hong itna lungsim hanga amah le amah
kikhem mawk. Lungkim ing ei”

Hih ci kisawh coffee sungah itna bangzah a kihel tam? Itna I cih bel a
kiteh thei van khat hi kei.

Khemna I cih pen a kimaisak theilo mawhna hi kici hi. Khemna
pawlkhatte in nuntakna khat kisiacip sak thei hi. Khemna pawlkhat ten
bel nuntakna pen lungnopna tawh tawpsak thei hi. Nang e kua teng khem
ngei na hia?
Bang khemna teng tuak ngei na hia?