Amasa-in nang leh nang nakithei hiam ci-in hong kidong leh kithei mah ing icinuam tek khading hi. Ataktak in, ei leh ei kitheih-telna pen ‘Philosophy’ i thu tawhphah thumung hi ci-in mipil tampi in sansat uh a, tua pilna ngahzawh ding hamsa mahmah hi. Kei leh kei kitheitel veng aw ci-a, kisial vuavua khat zong pen akithei tello takpi hizaw kanlai hi. Ei leh ei kitheilo in midangte amau leh amau kitheihtel nading Guideline vapiak vaivai zong pen haivai zawlai hi. Gentehna-in, “Kei kamin Go Sawm Piang hi,” aci lanlan khat zong pen ama hihna agen hilo-in, akiphuahsak (apu/apate’ piak) min agen hilel hi.
‘Know thyself’ cih thuciin pen Paythagoras kammal hi-a, mi kipilsakte leh mi kiphasak te mawhkawk nading a agelh hizenzen lo hi. Na hihna, nahih zawhna (Your Reality, Potentiality) kithei in acihna hizaw hi. Tuapen tanglai Greek mipil 7 te in Delphi khua Apollo biakinn lutna ah nagelh uh a, tuni dongin ‘Philosophy’ lamah mipil tampi in abuaipih uh thuthuk mahmah khiatna/deihna tampi anei thuciin khat ahi hi. Pawlkhat in asialam in khia uh a, pawlkhatte in ahoih lamin khia uh hi. Nidangin keizong ‘Know thyself’ cihpen ‘Nang leh nang kithei in’ acihna hi-a, mi kipilsakte khawng taina bekin kizang ding kasa ngei hi. Tuamah bangin pawlkhat in, ‘Know thyself’ cihpen, “Na haina, napoina, nahemna, nazawnna, nangauna, na kicin-lahna, na thanemna, nazawng khalna’ kithei inla kiphatphat, kipilsak se kei-in,” cihna bekin sansat uh a, midangte’ thuhilhna bangin azang zong om hi. Tuazong ‘Know thyself’ i adeihna/akhiatna namkhat ahi ‘Na hihna zah valin kiphat kei in’ cihtawh kinai napi mipil tampi khiatdan taktak nahilo mawk hi. Akhiatna namkhat leuleu ah ‘Nang leh nang kithei inla midangte’ hong ngaihsutna awlmawh sedah in’ cihna zong ahi hi.
Tua hi-a, ‘Know thyself’ tawh kisai leh ‘Self Knowledge’ tawh kisai thuthukpi ahihna leh, ei leh ei kitheih ding pen genziau bangin abaih-lohna pawlkhat mipilte kammal tungtawn in ikikum nuam hi. Mipilte’ sandan pawlkhat anuai-ah ensuk ni:
Ei leh ei kitheihtel ding haksa leh thuthukpi ahihna
“What a mystery I am to myself!”
Kei pen keimah kahihmawk bangzahta in theihhak hiam!
― Hans Christian Andersen (1805 – 1875)
“I know all except myself.”
Kei leh kei losiah kathei khin hi.(Kei leh kei bel kithei keng).
― François Villon (c. 1431 –1463)
“Who in the world am I? Ah, that’s the great puzzle.”
Leitung tuankhia-ah kei kua himawk kahiam? Ah, tuapen abuai-huaipi khat hi.
― The Rev. Charles Lutwidge Dodgson (1832 – 1898)
“The most difficult thing in life is, to know yourself.”
Nang leh nang nakitheih ding haksa pen hi.
― Thales of Miletus (c. 624 BC – c. 546 BC)
“There are three Things extremely hard, Steel, a Diamond, and to know one’s self.”
Ahaksa, akhauh phamahmah thum om a, Steel, Diamond leh ei leh ei kitheih nading ahi hi.
― Benjamin Franklin (1706 – 1790)
“Can one know oneself?”
Mihing khat amah leh amah akithei zoding hiam?
― Baroness Dudevant (Paris, 1804 – 1876)
“Who am I? is the only question worth asking and the only one never answered.”
Kei kua kahiam? Cihpen dottaak mahmah dotna leh dawngkikna om ngeilo dotna khat ahi hi.
― Deepak Chopra (born October 22, 1946)
Hih atung a tengpen mihai phengpaupau haiciakciat te hilo uh hi. Mihing nuntakna hoihtak a ngaihsun mipil, siavuan, politician, scientist, laigelh siam, laphuak siam cihbang danin kivakna tuamtek aneiciat vive uh hi. Tuate lakah Thales pen Greek mipil 7 (The Seven Sages of Greece) te’ lakah amasa pen dingin kingaihsun hi. Tua banah, ei leh ei ihihna bang a lungkim theihding akisapna ciang om hi. Anuai-ah ensuk leuleu ni:
“Wake up! Be thyself!”
Tho in/khuaphawk in! Nahih bangin hilel in! (Mikhat peuh i hoihsak bangin kineih khem sawm/gamtat sawm haihai sekei in).
― The Bhagavad Gita (Hindu Scripture)
‘Know Thyself’ was written over the portal of the antique world. Over the portal of the new world, ‘Be Thyself’ shall be written. The message of Christ to man was simply “Be Thyself.” That is the secret of Christ.
Tanglai leitung kongpi tungah ‘nang leh nang kithei in’ ci-in kigelh hi. Tuhun leitung kongpi tungah ‘nahih bangin hilel in’ (Midangte’ hihna deihgawh, eng sese kei-in) ci-in kigelh ding hi.
Mihingte’ kiangah Khazih i thupuak in ‘nahih bangbangin hilel in’ cih ahi hi. Tuapen Khazih i thusim zong ahi hi.
― Oscar Wilde (1854 –1900)
“Learn what you are, and be such.”
Nang bang nahi hiam cih kitel inla, tuabang in hilel/omlel in.(Kineihkhem tawmse kei-in).
― Pindar (ca. 522 – 443 BC)
Mihingte pen gamtat luheek, zia-le-tong, ngaihsutna, pilna, kivakna, duh leh deih, atuamtuam neiding a Pasian in hongbawl hi-a, siatna leh mawhna piangsak ihih liang keileh ei hihna bang a gamtat khuasak lelding ahi hi. Maitang zahtak neilo thutang gen pawl omding, tuamah bangin mi maimuh nopman a phatphat, akhialhna lah pulak ngamlo, amau zaknop ding thubek agengen pawl zong omding hi. Pawlkhatte kiniam khiat kineih tawm, pawlkhat awzol dakdak kisin tawm, pawlkhat athukhual mahmah kineih tawm, pawlkhat lah mipilte’ paudan, awkaih dan ciingtawm, kisin tawm cihbang danin kineih tawm zia-le-tong apaksak zong om hi. Kipuah phat ding pawlpawl a-om teii hangin kipuahphat kullo ihihna bang a suaktatak a omtheih zong kisam hi. Ei hihna taktak sangin mikhat peuh i tatzia leh hoihsakna bangin kineih tawm kisin tawm pongmawk pen ei leh ei akikhem kihilel hi. Theihding khatah, omna mun leh mualzui-a mite tatzia thukhunte zuihloh aphamawh na-ah zuihding hi-a, thukhun palsatna ahih keinak leh ei mimal i ‘Personality, Individuality’ zong thupiseh kul hi.
Tua banah, ‘Know thyself’ pen ‘Nang pen mimawkmawk lo, nalianpi bawlthei alamdangpi nahihna agenna in kilimzat pen hi. Anuai-ah ensuk ni:
“Know thyself, and thou shalt know the Universe and God.”
Nang leh nang kithei in (Nahih-taktakna/nahih-zawhnakithei in), tua hileh Khua-vannuai leh Pasian nathei ding hi.
― Pythagoras of Samos (c. 582 BC – c. 496 BC)
“Know ye not that ye are gods.”
Pasiante nahih lam uh kitheilo nahi uh hiam.
“As above, so below. As within, so without.”
Atung leh anuai kibang a, asung leh apua kibang hi. (Adeihna taktak asukha dingin khiat haksa-ing).
― Hermes Trismegistos
“.... The kingdom of God does not come with observation; nor will they say, ‘See here!’ or ‘See there!’ For indeed, the kingdom of God is within you.”
Pasian’ gampen, ‘Hiah om hi! Huah om hi! Cihbang danin muhtheih etciantheih dingin hongpailo ding hi; Amaantak in cileng, Pasian gampen note sungah om hi.
― Luke 17: 20-21 (NKJV)
“Poor wretch, you carry about a god within you, and know nothing of it.”
Miliangvai aw, nasungah pasian khat napuak kawikawi lam nakithei kei hi.
― Epictetus (AD 55 – AD 135)
“Man, know thyself, and thou shalt know the Gods.”
“The body is the temple of the God within you; therefore it is said, ‘Man: know thyself.”
Mihing aw, nang leh nang kithei in, tua hileh Pasiante nathei ding hi.
Na pumpi pen nasung a-om Pasian i biakinn hi; tua ahih manin, ‘Mihing aw, nang leh nang kithei ta in’ kici hi.
― Ancient Egyptian Sayings
“Do you not know that you are the temple of God, and that the Spirit of God dwells in you?”
Note in Khasiangtho’ teenna Pasian’ biakinn nahih lam uh kitheilo nahi uh hiam?
― I Corinthians 3:16 (NKJV)
“God stands in the congregation of the mighty; He judges among the gods.”
Mihat miliante kikhopna ah Pasian ding hi; Amah in pasiante lakah thukhen hi.
― Psalms 82:1 (NKJV)
I said, “You are gods, and all of you are children of the Most High.”
Ken kongcih in ah, “Note pen pasiante nahi uh a, navekpi-un Sangpenpa’ tate nahi uh hi.”
― Psalms 82:6 (NKJV)
Jesus answered them, “Is it not written in your law, ‘I said, “You are gods?” If He called them gods, to whom the word of God came (and the Scripture cannot be broken).
Jesuh in, “Note pasiante nahi uh hi ci-in na thukhun sungvuah kigelh hilo ahihiam?” Ci-in adawngkik hi. Pasian’ kammal hongpai khiatna mite pen pasiante hi naci ahih leh (Laisiangtho gen kisusia theilo cilai leng) ....”
― John 10:34-35 (NKJV)
Laisiangtho sungah ‘Note pasiante nahi uh hi’ cihtawh kisai-in theologians te’ muhdan leh sandan kibanglo-in kinialna tampi om a, tuavai ikinial tadih phot keiding hi. Ahi zongin Freemasons te in Buddhist upna leh laibu tampi siksan in ‘Mihing te amawkmawk lo Pasian namte hihang’ cih um uh hi. US gamah Presidents asemngei mi 1/3 leh, tulaitak US kumpi uliante sungah thunei pen te Freemasons vive hikhin uh hi. George W. Bush leh Clinton zong Freemasons mah ahi uh hi. Washington D.C. khuasat masa George Washington leh Benjamin Franklin te leh adang honkhat bangzong Freemasons hi uh a, tudongin US te’ dollar tung leh US te’ kiciap-tehna limpi (National Emblem/Seal) tuamtuamte ah amau lim (Freemasonic Symbols) tampi koih uh hi. Washington Monument khuampi bangzong Freemason ngeina (Freemason Ritual) tawh kiphungvuh ngiat hi. Tua banah, George Washington pen ‘Mihing Pasian’ (Divine Human) bangin sang uh hi. Igennop tomkaih pakleng, amau biakinn sung tokhum tungah ‘Know thyself’ ci-in gelhngiat uh a, tuapen mikona, mi mawhsak nopna tawh agelh uh hipeuhmah lo-in, nang pasian nangawn asuakthei nahih lam kithei in acihnopna uh hizaw hi. Hih Freemasons tevai pen tampi gelhdah ni-in, igennop abulpi pen ‘Know thyself’ cih thuciin i akhiatna taktak pen ‘Mihing thupitna genna in mipilte’n khiazaw uh hi’ cih ahi hi.
Zam Sian Sum
No comments:
Write comments