Zogam donghu tawh kisai ZIUSA

Zomi Innkuan USA
Executive Committee

To.
President
Zomi Innkuan kipawlna khempeuh

Zahtak Makaipipa/nu aw,

Zogam ah haksatna lianpi tung cih thu za ihhih manin ih dah mahmah hi.

Zomi Innkuan USA kipawlna Executive Committee in Zogam ah guahtui tamluatna hangin cimawh dongtuak, lazom Zomi-te huhna dingin Donghu Huhna Sum $2,000 puak dingin kikhensat hi. Hih Donghu Sum pen tu leh tu sungin a mun a mual ah akintak a kisapna a omleh zeekpak dingbek a kiseh ahi hi.

Zogam sung ah ih tuah cimawh dongtuahna pen tu le tu sung a veng ding hilo a, tui hong kiamin khua ahong pha zongin inn leh lo, kongzing lampi tampi sia a, nektawm ding antang anteh theipuamm haksa mahmah ding ahih manin Zogam in huhna tampi kisam ding hi.

Zogam puahkikna ding huhna sum dingin Zomi Innkuan kipawlna khempeuh, Zomi kipawlna khempeuh, Zomi Pawlpi khempeuh ahzong Zogam Huhna Sum kaihkhop dingin Executive Committee in kikhensat hi.

Tua ahih manin, Zomi Innkuan kipawlna khempeuh in kipawlna sungciat ah Zogam huhna ding sum leh pai kaikhawm in, Pawlpite sungbek hilo kiim leh paam a kipan kumpi thuneite tungdong ah Zogam huhna sum nget dingin zahtakna tawh hong zawn ung.

ZIUSA kipawlna sung ah Zogam huhna ding sum leh paai kaihkhopna tawh kisai ZIUSA Board thukimna lakkul ding a, Zogam huhna tawh kisai bangci bangin sem ding cih thuzong akin takin kikup ding kisam ahih manin, August 01 ni in Emergency Board Meeting zong kisam hi.

Zogam Huhna sum kaikhopna a tangzang dingin ZIUSA Zum lam pan hanciamna tawh Online Fund Raiser WebSite khat kibawl zo hi.https://fundrazr.com/campaigns/611cHa/ab/7524Vc
Hih WebSite pan kipuak sum khempeuh ZIUSA Bank ah a lut hi a, a kician mahmah mun ahi hi.


Executive Committee
Zomi Innkuan USA

Tang’in;

GSKhup
General Secretary

Tulsa, OK. July 31, 2015. 10;45AM.