Neino in zong sing hoih nono a puakkhop ding a ngah ciangin aki suat leh aki suanzo kei hi.A khuadak leh a gal ah Tawpi singtawnpua a pailai a-mu hi.Neino in,ka gal a singtawnpua aw hongsuan in a cih leh Tawpi in hongsuan leng honglau ni teh aci hi.Tua ciangin Neino in banghangin honglau ding ka hia acih ciangin Tawpi in zong Neino vasuan in,a suat kawmin a samzang khat bawhsak a,khua mual suangpi nuai ah a koih hi.Tua ciangin Neino acii hong naa a,a thoihthoih uh hangin a damthei kei hi.
Neino nu a lungkham lua mahmah ahih manin Neino damsak a omleh numei ahih leh ki zawlsak ning Pasal ahih leh ki tengsak ning ci-in a ciam hi.Tua laitak in Tawpi in,innkun panin na ngai sim a,a denciangin innsungah nalut in Neino nu kiangah Pi den in banggen nahia ci-in a dot leh Neino nu-in
bangmah gen keng e naci hi.
Tua ciangin Tawpi in genmah teh genkhat na nei mah ve,acih teitei ciangin bangmah ci keng e,tu laitak in ka tanu Neino a damsak omleh numei ahih leh ki zawlsak ning Pasal ahih leh kitengsak ning ci bek ing aci hi.Tua ciangin Tawpi in kei man thoihdam ning ci-in suangnuai a,Neino samzang vala a,Neino lutungah a koih leh Neino aci hong dampah hi.
Tua ciangin Neino nu-in,a ciamsa mah bangin Neino leh Tawpi a kitengsak hi.A nu-in,a sa puak dingin innnuai a,vokpi go unla pia un aci hi.Tawpi in vok an pia a,Pi aw,hih ahi hiam?acih leh hi kei aci hi.Tua ciangin Tawpi in vokpi kongngak hoih hen voktal kongngak hoih hen aci hi.Tua ciangin vok tukguk khat napai a,Tawpi in Pi aw,hih ahi hiam?acih ciangin hi nai kei aci leuleu hi.Tua khit ciangin vok tukgiat khat napai leuleu a,Tawpi in Pi aw,hih ahi hiam?acih leh hi mah aci hi.Tua ciangin Tawpi innnuai ah va tuaksuk a,vok deksi a dawn hi.
Vok gil bawlbawl a,Tawpi in vok gilzangteng inn-nuai ah ki kiatsuah khembawl in naupangte kiangah ka temta kiasak kha ing va tawm un,acih ciangin naupangte in a tawm nuam kei uh hi.A pi in,va topsak un acih ciangin Tawpi in,kei man vatawm ning ci-in inn nuai ah tuaksuk a,vok gilzang a khiatsukte a ne hi.Nau pangte in ensim uh a,hua lai ah Tawpi in sagil teng neve e ci-a akiko uh ciangin Tawpi in,naupang phialphual sa phialphual veihnamkhau ka i-uai aci hi.
Tua ciangin a pi in,asa uh huan a,tawmvei a huankhit ciangin Tawpi in pi aw,sa a minta hiam?ci-in a dot leh min nai kei,inntungte tuibuk vasim tadih in,aci hi.Tawpi vapaikhia a,a sawt loin na tungkikpah a,pi aw,sa a minta hiam?acih leuleu leh min nai kei e,inn nuaite tuibuk vasim tadih in aci leuleu hi.Tawpi a sawt loin tungkikpah a,pi aw,sa a minta hiam?ci-in a dong thithe hi.A pi in,min nai kei innkongte tuibuk vasim tadih in acih ciangin Tawpi napaikhia leuleu a,hun sawtlo sungin tungkikpah a,a pi kiangah pi aw,sa a minta hiam?ci-in a dot thithe ciangin a pi in,a zak mahmah zong cimtak ing min in minta kei leh thuk mai un aci hi.
Tua ciangin Tawpi in annthuk a,a ne ta uh hi.Tawpi in Neino kiangah Neino nang bak bangzah na gaita a,acih ciangin bak khat zong gai naikeng aci hi.Neino in Tawpi kiangah U aw,nang bak bangzah na gaita a,acih leh bak 3/4 bang gaita ing aci hi.Tawpi in dong leuleu a,Neino nang bak bangzah na gaita a,acih leh bak khat ka gaita acih kawm in,U nang bak bangzah na gaita acih leh bak 6/7 gaita ing aci hi.
An a nekkhit uh ciang un,Tawpi leh Neino a innlam uh zuanin pai uh a,khua mual a tun uh ciangin Tawpi in Neino kiangah Neino aw,mi lampai bangin khe tawh pai maw,ahih kei leh miliam pai bangin khe bai a,pai koi na utzaw hiam?ahih kei leh vazuang len in leng leng na utzaw hiam?ci-in a dot ciangin Neino in,ei-ut thu hi leh vazuanglen in leng leng ka utzaw hi acih ciangin Tawpi in a meitawh Neino zialzial a,a zialkhit ciangin a lenpih vingveng hi.Tua ciangin a mo liahnu in Takha nu,Takha nu aw,na ta mi in lenpihta ei,ci-in kap ngutngutsa in a ciahkik hi.
Tua khit ciangin Neino nu in,taksih ngan sagih huan a,Neino lazo dingte in hih ka taksih ngan huan gai ding a,hih taksih teng lomlom ding a,khepi cia phasak ding hi.ci-in tha a cial hi.A khuapih tangvalte in taksih ngan sagih nene uh a,a gaizo a omkei uh hi.A taksih huan lomlom uh a,khepi cia a phasak zo a omkei uh hi.
PHUCHIL LEH NANTAL TE UNAU
Tua ciangin a khuadak vua leh a gal ah Phucil leh Nantal te unau aisa sawk amu uh hi.Neino nu in,hua tak a,Phucil leh Nantal samdih un,acih ciangin a khuapihte in,ei hih zawhloh hih zo mahmah kei un teh a cihsan uh hi.Neino nu in,ci kei un hihzo kha thei ding uh hi,acih ciangin Phucil leh Nantal sam uh a,Phucil in ne a,a gaizo kei hi.Ahi zongin Nantal in a nek leh gaizo a,taksih ngan sagih a lomlom leh zabel cia khepi cia a phasak zo hi.
Tua khit ciangin amau unau Neino ladingin kuanpah vingveng uh a,lampi ah a paipai uh leh munkhat ah Tawpi khekhap mu uh a,Phucil in,Nantal,Nantal,hih bang khekhap hiam?acih ciangin Nantal in,zu khekhap va khekhap aci hi.Mailam zuan in paipai uh a,munkhat ah Tawpi khekhap a om leuleu hi.Phucil in,Nantal,Nantal hih bang khekhap hiam?acih ciangin Nantal in Mu khekhap Tawpi khetot acih ciangin Phucil in Nantal ken lau ing acih ciangin Nantal in giahbuk khat bawlsak a,a zawngno mat tawh Phucil a nusia hi.
NANTAL TAWPI TE KHAU AH
Nantal amah bek pai vingveng a,Tawpite omna khua atun ciangin dainawl a Nupi khat kiangah zintung hi.Nantal in a zinnu kiangah hih ka temta Neino na piaksak in,acih ciangin a zinnu in,a temta Neino a pia hi.Tua ciangin Neino in Nupi nu kiangah hih koi a temta hiam?ci-in a dotciangin Nupi nu in,ka zinpa hongpiaksak hi,acih ciangin Neino in temta nam a,tang a,tuan a,Nantal gimlah a nam a,ahi leh na zinpa hong hawh hen ci-in Neino in Nantal a inn ah a hawh dingin a vaikhak hi.Tua ciangin Neino te inn ah Nantal a hawh hi.
Neino te a tunciangin bang hong ci tun nahiam?ci-in a dot leh Sakhi khedap in hong nei in,Sazuk liangdap in hong zang ding a,Ngal khaat pua in,a bungbu lehlam in innka khuam ah hong kah ding hi,aci hi.Tua khit ciangin Neino in,Nantal phekhual tawh zialkhawm a,khintungah a koih hi.Tua khit a sawt loin Tawpi hongtung takpi a,Nantal gen bangin Sakhi khedap in zang a,Sazuk liangdap in nei a,Ngal khaat pua in,a bungbu lehlam in innka khuam ah a kahto hi.
Tau ciangin sa ne uh a,Neino in,Momai sa paih ne ee,ci-in Nantal sa limci tata a paih hi.Tawpi in saguhbawk khat la a,khualau sa paih ni ee ci-in saguhbawk a paih leh Nantal taltang kha a,Nantal si a luangkhia hi.Tawpi in Neino kiangah ii inn miliam gim namlua acih ciangin Neino in banglak ah miliam gim nam mahmah ken teh khintung a,ka sasi koih kibua hi-in teh acih leh Tawpi in va en ning acih ciangin Neino in kei man va en ning ci-in Neino in en a,Nantal sisan luang khenpeuh a va nulsiangsak hi.Tua khit ciangin Neino in,a zu neih khenpeuh a pasal Tawpi dawnsak a,Tawpi zu kham in,a ihmu hi.Tawpi ihmut kal in,Neino in,abil sikzumsa tawh vuhsak a,Tawpi in Neino,Neino hongsuam nahi ding hi acih leh banglak a,suam khawng gen nahia,aci hi.Tawpi a ihmut kik ciangin Neino in,abil ah gatang abahsak hi.
Tua Nantal in,a suktai sagih paltan a,a inn dung innvai kan in,a inn vengnu kiangah Tawpi in hong delhsawm zenzen leh hih ka kan teng a kanzawh leh hong delh henla kei hih bangbang ahih zawh kei leh hong delhvet kei hen ci-in a vaikhak zawh ciangin Nantal in Neino a ciahpih vingveng hi.
Tua khit a sawl loin Tawpi khanglo a,a inn vengnu kiangah Neino koi ah hawh hiam?ci-in a dot leh a inn vengnu in den deuh mahmah in pasal khat tawh ciahta uh ei,Tawpi in delh a hong sawm leh a suktai sagih vei hong paltan henla a inndung innvai hong kan hen,hih teng ahih zawh kei leh hong delhvet kei hen ci-in hong vaikhat hi,acih ciangin Tawpi in a suktai pal a,a palzo kei hi.Hi mah leh Tawpi in a delh veve hi.
Nantal leh Neino in,tungtun pangkhat ah sun an,a nek laitak un,Tawpi in a vapha hi.Tawpi in va bawhpah ngamsam loin khuai vah in,a leng diaidiai hi.Tua ciangin Pasian leh lungzai kiho uh a,Miliam ii gumzaw diam,Saliam ii gumzaw diam acih uh hi.Saliam in,zu leh sa neleh ne loplop Miliam in zu leh sa a nek ciangin pasian ana tai in,Lungzai ana tai kha in hong ci uh hi.Miliam gumzaw ni aci uh hi.Tua khit ciangin pasiante in,Nantal,Nantal natung a,khuai lenglai vat in,acih ciang un,Nantal in a namsau tem tawh a vat leh tumnih a kisuah hi.Nantal in Neino kiangah na pasal koi ah hawh hiam?ci-a,a dot leh sa beng hi ci-in dawng hi.
LEINUAI MITE TAWH
Tua khit ciangin Neino leh Nantal pai uh a,a Upa Phucil a nusiatna giahphual a tungkik ta uh hi.A zawng matpen in,I mote hong tungta e,acih vial leh kua U kua nau thei khang ci-in a zawng khekop pan man a,sangkil a den leh a ta bang a tolh zuahzuah hi.A zawngsa huan uh a,a nek uh ciangin Phucil in a khebom teng a tangkha hi.Ne ding a,a kithawi ciangin a zawng kheme te in,Phucil tal nasun pahpah uh a,a ne thei kei hi.Ne ning cileng hongsun zuazua acih ciangin Nantal in,hongla in,nasa zong ne thei lo ci-in suhsak a,a kuaihtan khit ciangin Phucil in a ne thei ta hi.Phucil in Nantal lim mahmah e,aci zaw mah lai hi.
Tua khit ciangin a thum un pai uh a,Leinuaite in Neino a deihgawh uh hi.Leinuaite in,mual ah mual ah kua teng naki nil uh aci uh hi.Nantal in,Phucil tawh Nantal tawh Neino tawh kinil ung e,kawl khuang a,salang ka kaih,kasa tonpih na ngai un,PHUNG acih ciangin Leinuai mite a khinpah diamdiam uh hi.
Nantal in ka ihmutsuak lua mahmah in tomcik khat kong mengme pak ding a,Leinuaite in Mual ah,Mual ah kua teng na kinil uh hong cih ciangun Phucil tawh Neino tawh kinil ung e,kawl khuang a salang ka kai,ka sai tonpih na ngai un PUNG naci un,ci-in a vaikhak khit ciangin Nantal a ihmuta hi.Tua khit ciangin Leinuai mite in,Mual ah Mual ah,kua teng na kinil uh acih ciangun Phucil in,Phucil tawh Nantal tawh kinil ung e,kawl khuang a salang ka kaih,ka sai tonpih na ngai un,PHENG acih leh Leinuaite in,a nehpah uh hi.Leinuaite in Neino laksak uh a,Phucil lei at tansak in,Leinuai ah a paipih uh hi.
Tua zawh a sawt loin Nantal khanglo a,Neino koi ah om hiam?ci-in a dot leh Phucil lei attansak uh ahih manin Phucil pau thei loin a kiang a,phaipheng phung khat a kawkkawk hi.Nantal in hiah a bang om hiam?ci-in phaipheng phung a bohkhiat leh kuavang khat om a,tua kuavang sungah Nantal a valutsuk pah hi.Nantal Leinuaite khua a tunciangin ka U lei leh Neino hongpia meng un,acih ciangin Leinuaite in a nuihsan lel uh hi.Nantal in nong piakkhiat meng kei ua leh ka veih ka pek ding a,nakhua uh phel langkhat lengmang ding hi.Vai ka muutding a,na mit langkhat ciat uh a tawding hi.A cih ciangin Leinuai mite in nang veihpek hangin kuamah khua phel langkhat leng ken teh,a cihsa uh hi.Tua ciangin Nantal in a veih a pek leh Leinuai mite khua phel langkhat lengmang vingveng a,vai a muut leh Leinuaite mit langkhat tek a taw pah hi.Tua ciangin Leinuaite in,a U lei leh Neino a pia hi.
Tua ciangin Nantal in,Neino leh a U leii leitungah kahtohpih dingin Phucil,Phucil khau nazun oh,acih ciangin Phucil in,khau na zunzun a,Neino leh Phucil leii,leitungah a tungto pah hi.Tua khit ciangin Nantal kahtoh sawm leuleu a,Phucil,Phucil khau na zunzun oh,acih ciangin Phucil in Neino deihgawh ahih manin ki zakkhem bawl in,sattat in naci ahia?aci hi.Tua ciangin Nantal in,Phucil,Phucil khau nazun oh,a cihkik leuleu ciangin Phucil in adawn ngei bangin dawng leuleu a,sattat in naci ahia?aci kik hi.Tua ciangin Nantal a hehsuak a,naluang naban sattat aw,acih leh Phucil in,sattat takpi a,Nantal Leinuai ah a kiasuk kik leuleu hi.
Hun saupi khat Nantal Leinuai ah a om khit ciangin zi khat a nei hi.Tua ciangin Nantal in linggui suan a,Neino muzo dingin nongsiam leh ka linggui suan in,zan khat thu in,van na kawi in,aci hi.Tua ciangin Nantal zi in,a tate kiangah na pa linggui suan nabawh khiasak pahpah kei ua leh napa un,leitungah hong taisan mangding hi,acih ciangin a tate in,Nantal linggui suan a bawh khiatsak pahpah uh hi.
Tua ciangin Nantal in,a tate kiangah hih ka linggui suan nong bawh khiatsak lai ua leh a botkhia masa penpen kong thatlum ding hi aci hi.Tua ciangin Nantal in lenggui khat suan kik leuleu a,Neino muzo dingin nongsiam leh ka linggui suan in,zan khat thu in,van nakawi in,aci hi.A zan ciangin a lenggui suan in,van nakawi takpi a,Nantal leitungah a kahtoh leh a tate in papa ngai in,akah nainai uh hi.Tua ciangin Nantal in a tate hehpihhuai sa ahih manin a vei leh tak ah a puak kawm in,lei ah a kahtohpih hangin a tate kiasukkik veve uh ahih manin Nantal bek kahto vingveng a,leitung a tung kik hi.
LUSUANGTE TAWH
Leitung a tunciangin Phucil tawh Nantal a paikawm leuleu uh hi.Lusuangte in,Neino deihgawh leuleu uh ahih manin Neino in,Lusuangte a dingin Ai-leem a,Nantal a dingin Sing a leem hi.An a nek uh ciangin Nantal ang ah sing koih a,Lusuangte a ding ai-a koih hi.Tua ciangin Neino in,Nantal kiangah thu a hilhsim hi.Lusuangte in mual leh mual hong ki tuahsak ding uh a,ahi zongin na en kei in,na et leh Lusuangte in singkuang amau ang ah koih ding uh a,ai kuangpen nang ang lamah hong heisak ding uh a,nang nasi ding hi.
a cih hihmah leh Lusuangte in mual leh mual guam leh guam a kituahsak uh ciangin Nantal in lamdangsa in,bang ci bangdan hiam?ci-in a en hi.A et kal in Lusuangte in singkuang amau ang ah,hei uh a,ai kuang Nantal ang ah a koih uh ciangin Nantal in,ai kuang nekha ahih manin a sipah hi.
Nantal a sihkhit ciangin Neino in,sing ka leem sing ka leem Nantal ading sing ka leem,Ai ka leem ai ka leem Lusuangte a dingin ai ka leem ci-in a kapkap hi.Lusuangte in Nantal a vuina mun uh Neino theisak lo uh ahih manin Neino in,a zon kawikawi leh mun khat ah sial cing naupangte in,la nasa uh a,Nantal Nantal nahan mual zangah sial cing naupangte lam liailiai uh e,aci uh hi.Sial cing naupangte lasak Neino in a zak ciangin naute aw,Nantal han honghilh un,hiah a khipitang kongpia ding hi ci-in a zolbawl ciangin naupangte in hilhpah uh a,hih mun ah ahi hi ci-uh hi.
Tua ciangin Neino in,Nantal Nantal nahan mel lah ka theihloh,na han mual ah sial cing naupangte lam liailiai ci-in akah kawmkawm in,a han khuatsuk a,Nantal dip ah temta a bullam ngat in,a ma ang ah temta mukzum lam ngat in,Neino in,Nantal kawisuk a,a nih un asi khawm uh hi.
Tua khit ciangin Lusuangte thangpaai in heh mahmah uh a,Neino luang leh Nantal luang la khia uh a,Gunpi gal langkhat tuak ah a paai uh hi.A paihna mun uh ah Neino leh Nantal Luangtei sing leh Zuang singin po uh a,a dawntuak ah kikawi lai uh hi.Tei sing leh Zuang sing a dawntuak a kikawi leuleu ciangin Lusuangte thangpaai leuleu uh ahih manin a khua zangbup un,kuan uh a,a phuk uh hi.
Lusuangte in,Tei sing leh Zuang sing phukphuk uh a,kitan dektak himahleh a puk nuam kei hi.Lusuangte khuapih numei naupangte in,singphukte sun anpuak hongtung uh a,tua ciangin ii singphuk la,puk nuam kei in,ii gil zong kial mahmah ta,ahih manin,ii sun an ne phot ni,ci-in a singliim nuai ah sun an a nek laitak un,a singphuk uh puk ahih manin Lusuangte singin delh lum khin uh hi.Khua sunga omlai numei naupangte heh mahmah uh a,tua singkung hal uh hi.
A hal hal hang un,tumkhin zolo ahih manin a kangtum zolo teng tuisungah paai uh a,tuisunga apaihte uh Ngami a suak hi.Tua ahih manin tuni ciangdongin lui ii vak ciangin Ngami ii matkhak leh kithuhsia himhim ci-in kua mah in,Ngami a mannuam kei hi.I kisap luat manin lui ii vak ciangin Ngami mu le hang tuahpha ii kisa kha hi.Ahi zongin hih taangthu tawh ngaihsun taktak le hang tuisunga Ngami akici te pen Neino leh Nantal kha hihtuak mawk hi.Tua ahih manin Ngami a thei khenpeuh in man nuam lo zaw uh hi.
Lungdam.
Credit :Zomi Sumbawi.
No comments:
Write comments