Kiukna {Politics} lamsang alungluut sanggamte,
Kawlgam Kiteelna huzaap-in Kawlgam sungsuak minam khempeuh hongvaat kawm-in Zomite-zong hong nommoih leiteei-a, upmawh leh lametna tuamtuam kisung theikim ahihman-in thuhoih khat ahihi. Kei-zong nengcik khat thusunna kongnei nuam-hi.
Zogam-ah NLD:
Tua ahihleh Zogam NLD makaaite leh supporter te-in kua phungvuh ding?
Zogam tanzil-ah, NLD Headquarters' thuphuukna tawn-in NLD' ading-a apang Zomi khempeuh-in amau' party-ah meé-khia theilo dinmun (ahoihlam) ahihman-in NLD' mi teng-in USDP-hiam, CNP-hiam, ZCD-hiam khatteeiteei abawh, aphungvuh kuul cihna ahihi (azenzen-in NLD-awh kuangluui-sawm a-om teeiteeileh Zomi lak-ah politics kimawl ding-a muanhuai hetlo cihna ahihi).
CNP-pen "Chin" minpua bek hilo-in, Chin min-tawh Zomi asu-giapgiap mite' ukna, kamkaih letna leh vaaihawmna bulpi-mah ahihman-in Zogam-ah khuaksia khinsa mi ahihkei naakleh meé apia zahding-a ahaii om saamlo ding-in lametna om-a, Semi Final kah zoloding (mibanglo I-tamluat keileh) muhkholh theih ahihi.
USDP-pen tutadih gamukte hi-a, aphungpi-pen "Tuugun asilh Ngia ahihkeileh Taangpi puansilh Gaalkaapte" ahihi. Apute' cihcih amang azuui ding-a thukhun: phualpi thukhun zuihding akikhun naaknaakleh neekpak tepawl longaal Zomite' ading lamet omlo ahihlam numei naupang-in atheihsa (bumtuak bang-a a-amcip mite lobuang-in atheih-uh) ahihi. Ahizong-in, Zogam USDP makaaite leh supporter te' taangthu tuanthu, mimalthu, muanhuai leh muanlahhuai cihthute aphual-a amu-athei mipi' muhna, theihna tungtawn-in meé kikhia dinghi.
ZCD-pen tutadih "Zomi" minpua liuleu political party khatbek neihsun hi-a, cikmah hun-a kiukna lam-ah amapang ngeilo, 1990 Kiteelna pan-in ZNC min-tawh MP Tutphah nih leh thum akingah saam hang-in seem khalo, ne khalo, ciam khalo vive ahihi. Athu-in kiukna nasep lam-ah moii mahmah, akeuhtuúng ahihi. Akeuhtuúng ahihman-in Zomi' ading-in suangtaat saatngam nangawn omlaai phingpheng khading-hi. Phualpi' thuthu ci-a thukhun kician anei tungsiah maaibiak nading mun omlo ahihman-in suakta tak-a phuutna, nawkna-ah kizanghthei khading (atawsawn, alamhilh siam I-omleh) cihte mitkha-a muhtheih pawlkhat om-hi.
Zomi NLD-in kuazaw phungvuh ding?
Zomi NLD Supporter khempeuh-in USDP leh ZCD koizaw phungvuh zawding cih thugui tung-ah Zogam MP teelcingding za-ah 50 kinga khading-hi. Adiak-in, Zogam Saklam teng: Tedim, Tonzaang leh Cikha kuam-ah NLD' phungvuh zawzaw-in MP tutphah luahzo dinghi: Koizaw phungvuh zawding cihthu-pen NLD Makaaite leh Executive Committee members te' khut-ah kinga ding-a, tua uliante-in thu-khingkhai hongsiam mahmah ding-uh mipi' kisappen ahihi.
Zogam Khanglam (Zogam' khanglam hilo, Zogam leitaw lamteng) leh Zogam Suahlam: adiak-in Kawlpi kuam leh Tamu kuam-ah ZCD min-tawh kuangluui I-thahaat-hiam, kuangmun I-tuh-hiam, NLD-in hong-ot zahkhop ding-in kuang I-luui uhhiam cihthu naakpi-in hong thupi-a, mapanglo I-hihlehbel Zomi hongkhual theiding NLD-tawh khut kileen vet-a campaign bawlding kisam khading-hi, tua hikei-in, ZCD amau' pai-in pai, NLD amau' pai-in paileh Zogam Khanglam leh Suahlam teng-ah Zomi' thuneihna a-omlo khinsa baan-a a-om ding-a lamette nangawn beimang takpi dinghi.
Politics-pen akimawl mite adiak-in atual-a kimawlte-in thuuktakmah, saupi-mah huam-a et tiuteuding naakpi-in thupi-hi. Kimawlna tualpi sung-a kimawl mite apualam pan-in akhialhna, amun awng, amun bing kitel mahmah-a, ahizong-in apualam pan-a I' otsansan "aw"-pen asung-a kimawl mi-in za kei-in ngai keileh angeimah bangbanglel ding-a, ahizong-in kimawl mi-in pualamte' aw ngai-in a-awnna hu-in, abinna aphuutvang naakleh gualzo peelmawhding ahihi. Politics-zong tuabangmah hi-a, akimawl mi-in pualam pan-a thusunnate athupi-laak theih mateng lawi bualna bualno sung bekmah-ah akimawlteng buan phengphang-in kituhtuh, kinawtnawt, kiphuulphuul lelding ahihi.
ZDC Makaai upate-pen kei mimal-in minam kalsuan nading-a MP Tutphah khempeuh hong luahleh ka' deih-mahmah party hi-a, "mi' sep theihloh aseem siam ding-a muanna" hi-tuan lo-hi. Zomi minpua-a namdang lak-ah naakpi-a I-ki tawitawm laaitak, hahkat tak-a I-ki pulaak laaitak ahihna-tawh kizuui-in, minam minpua party-in tutphah hong ngahleh minam' ading mapanna-pen tawmcik hong muiibunh zawkei-tam cihciang-tawh lametna ka' koih-hi. Ataktak-in, minam vaai taktak-pen minam avei khempeuh-in I' sep theihciat om-a, ahizong-in mimal sepna sang-in pawl min-tawh kalsuanna-in muiibunh zawtham-hi. Tua mapan nading min aki-pua theiding ZCD Party bek political party kinei-hi.
Zogam information unofficial ahihkeilehpersonal information tantan-ah, makaai lamsang USDP leh NLD tebangpen ZCD makaaite' sang-in lianzaw, hauzaw, gualzawlzaw, meeltheih hauzaw vive ahihi. Ahitazong-in, MP Tutphah ngah ding-a I' lunggulh mite-pen amau tutphah mah-tawh amau bekmah hongzol, honglian, hongthau, honghau , hetlo ding-in, amau' kipiakna ziak-a mipi hongvaan, hongneekngaih, hongveii, hongpanpih theiding mite adeih I-hihi. Khenkhat-in "ahauh loh-in kua huh zoding" cithei khading-hi. Zomite' kisap-pen sumtang huhna (huaiham duhhop khenkhatte-in sum bekmah en teutau saam naven) peuhmah hi masa lo-in, athu ahihi.
Athu-pen naakpi-a athupi ahihi. "Akipatciil-in Thu om-a, Thu-in Pasian-tawh omkhawm-in, Thu-in Pasian ahihi" John-in acih mahbang-in thu lo-in kikhuasa theilo-hi. Thu lo-in suahtaakna om theilo-hi. Thu lo-in thuneihna cihbang om theilo-hi. Thu lo-in plan, project kibawl ngeilo-hi. Thu lo-in geelna omlo, geelna lo-in sepzuihna omlo, lawhcinna-tawh kinahvawh ngeilo cihna ahihi.
Zomite' kisap thu-pen:
Zomi-in Kawl leh Vaai mahbang-inveiitheihna gui-guk (အာရုံ ၆ ပါး)-tawh akilam mihing ahihi.
Zomi-in mihing ahihman-in Mihing' Hihtheihna Vaannuai Thuphuanpi(Universal Declaration of Human Rights: 10 December 1948) leh tua tungtawn-a ameegkhia "Hihtheihna" khempeuh-tawh akipaaikaan mite ahihi.Zomi-in British Colonisation mapek-in Zogam-ah teéng khinzo uh-a, tua Zogam leitang aneite ahihman-in tua leitang tung-ah thuneihna aneihding vaannuai thumaan ahihi.British, Burmese leh Indian te' thukhaam mapek-a kipan Zomi-in ama' ngeina, zuihsuah leh theihneihte (values and norms) anei, ama' ngeina-tawh vaaihawm-a khuasa minam ahihman-in tua ngeinate namdangte-in hong zahtaak sakding thumaan ahihi.
Hihte-pen Zomi khangthak khempeuh-in I' mitsuan masakding thute hi-a, "ko nongteel uhleh High School, Town, Health Centre, cbt" cihte ciangciang-tawh I' meé mawkpiak lohding naakpi-in thupi dinghi. Hihbang meé zonna-pen an kuang khat-tawh Esau bang-in I' gam azuak ding-a hongzol-uh ahihlam patau tak-a phawkding ahihi. Atung-a Mihing' Hihtheihnate khatbeek neilopi-in saanginnte, zatote, myone-te bang-a mangding? Mon Yua paisuk-a saangkah, zato lup-tawh bang kilamdang? Lamsaap themcik nuamtuam ciangmaw? cihte naakpi-a ngaihsut phatding kisam-hi.
Political party paizia-ah, National level party khat-in ဗဟို akici phualpi nei-a, tua phualpi' thukhunna pualam-ah bangmah seem theilo-hi. Tuabang-a akhih, kamkaih aleen a-omlo ZCD party-pen makaai upate gina takeileh kigii (boundary) aneilo penpen hongsuak ahihman-in Zomi NLD-te bang-in ZCD hong buaksuk le-uh MP tutphahte kiluahzo ding-a, atung-a "Mihing' Hihtheihnate" phuutna lam-ah naakpi-in hong kipiak uhleh minam' ading lamet omkha mawhlo dinghi. Kawlgam ulian khinsate mahbang-a amau' thubek, amau' angsung bekmah hongkhuat hetloh dingbek akisam hongsuak dinghi.
Abeisa mapanna omsate ciangciang-ah ahihleh party tuamtuam avekpi-in kua-mahmah minam khual-a kalsuan om naailo-hi. Mipi' maai-ah kamdimdim-a akidem zuahzuah-uh hang-in kuamah minam it omlo uhhi. Amau mimal kikhual uh-a, a-party nangawn-uh akhuallo vive hilel-hi. Tua kawmkaal-ah, "MINAM" min ngaihsa ahihkeileh deih theihna tuihual-in minam hong nawkkha theita ahihman-in makaai aginaat keileh akisapna apulaak theiding mipi lakpan hong-om zeuhzeuh tading-a, mipi gina takeileh ma akaaizo hong-om zeuhzeuh tasaamding ahihman-in neina peuh-ah minam min-mah keng den-a, "ka' minsiatleh minam minsia, ka' minphatleh minam minpha" cih lungsim pua thei-in, khuapi-mi lungpuak puaktheih hunta-hi. Tua tungvuum-ah, minam misiat khaakding naakpi-a huutding, daalding, humding mimal mawhpuak-a I-seh theihding hunta-hi.
Party khatpeuh-a mapang makaai upa hitaleh pawlmi maimai-ciang hitaleh I' ngaihsutna abeisa ciangciang-ah "hia te-tawh kidem, zoding, ..." cihciang hi-a, tua zom-ah neekpah dingciang bekmah-tawh kibuai toden-hi. "Kidem"-in I-zawhleh kidempihte' tung-ah eengtat, tuambawl, paampaih., I-lelhleh langbawl, elbawl tosuak pahpah, nu-unau pa-unau nangawn kinuak, kikhen cih-a kipanatoiiciik lungpuak khempeuh nusiataktak tading-in Zomi khempeuh-in "Self-Sanctification Process" kipan taktak ta-ni!
Atawpna-ah, 2015 Kiteelna-pen tulaaitak-a Gamukte' tanzil ciang-tawh akizawhleh Zomite' lamet khopding bangmahpi hong-om hetlo lelding ahihlam phawk-a, party kidanna peuh-tawh kiphin, kiko, kizahko, kipholaak, zuauphuak-a kigensia, ki-aakgualkhen, ki-gaalneih zahdong kitukalhna apianloh nading mimal kim-in
ngaihsun teutau-a, "an neekkhat/nih, dangkasan peekkhat/nih" lametna ciang-tawh minam kalsuanna ahihkeileh Zomilungsim Tuihual (the Wave of Zomism) I-sukkhaak hetloh nading mimal kim' mawhpuak ahihi.
Deihna akibat keileh akibat nading haanciam totoding hihang!
Zomi Pasian' Thupha!
Zokhai
***********************************************
T. Zokhai ITNA-IN GUABANG HINNA-HI
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560
***********************************************
No comments:
Write comments