GZA Thu kikupna pan'

GZA = Global Zomi Alliance ii sapna om bang in Lamka lam buaina tawh kisai panlak zia ding thu kikupna TBCY biakinn ah tuni 1:00 - 3:30 pm sung nuamtak in kinei thei hi.

Kipat thungetna Rev Dr Jacob Kham Khan Mung in hong neih khit ciang in Lamka pan Zogam Zolei ading aa anuntakna apiakhia Zogam Salphate zahtak piakna in "Tawlkhat Sung Daihna" akineih khit ciang in meeting nuamtak in kipan hi.

Meeting pen GZA Associate GS Rev Dr Go Cin Zam in hong makaih aa tua sung ah muhna tuamtuam a kigen tekna ah GZA in India kumpi tung ah apiak ding aa hoih asak Lai (memorandum) zong Mung Lan Thang/ Thangboi in meeting kah khempeuh ettheih ding in hawm hi.

Meeting ah anuai aa bang in ki khensat hi:

1. India kumpi' tung ah Mung Lan Thang/ Thangboi in hong geel lai pen kipia ding hi.
- GZA makaite in Ambassador' khutsung ngiat ah a piak theihna ding in Mung Lan Thang/ Thangboi in hong vaan ding hi.

2. Lamka buaina tungtawn aa hong piangkhia Zosuante' kipawl khopna ahi Joint Action Committee tung ah dahpihna lai GZA min tawh kipia ding aa tua lai ding pen GZA president Rev Dr Pau Khan En leh GS Rev Dr Do Suan Mung te'n hong vaihawm ding uh hi.

3. Zogam Salphate akivui ni ni in Zangkong ah zong sivuina service nasiatak in kibawl ding hi. Tua lai ah mediate zong kisam khawm pah ding aa ih lungpho nopnate tua lai ah ki gawmkhawm ding hi.
(Hih thu leh atung aa thute ah akisam bang in Rev Dr JM Paupu leh Rev Dr Zambawite hong kizom ding uh hi)

Hun khakna ding in GZA President Rev Dr S Pau Khan En in thupha piakna hong nei hi.

P/s
Tudong bang mah hong suah nailoh ciang in kiallap ding aa kong pulak zual ahi hi.

Meeting kahte avot leh moh tawh hong vakte leh meeting nuamtak bawl theihna ding aa mun le mual hong pia inntek TBCY pawlpi' tung ah lungdam mahmah hang.

Itna Tawh

Mung Lan Thang/Thangboi
Zangkong