Nung 2009 Christmas sung a Zogam Online (ZOL) te in X-mas gift dingin ITNA LEIBA JKKam (Norway)tawh a holimna (Interview) uh Tongsan website ah kong guang uh hi.
ZOL: Na Neulai, na laisimna leh music lama na kipatna khong hon gen masa dih ve le.
JKK: Ka Zolai sangsia ka nu hi in. Ka nu le ka pa sung pian unau 6 lak ah a neupen hi in ka nu tawh ki tam thuah ka hihmanin ka nu kiangah ka theihnop pepeuh laimalgawm ka dong a hong hilh teng tawh ka ki sin toto a, Sunday School ah nipini sim in Zolai tawh Pasian'thu kisin a hih manin Zolai a siam ka suak hi.
Ka la Sia Ka nu ka nu pen a ma nungak lai in Tedim Baptist Association sung khawng ah Solo kidemna a ki hel zel pahtawina a ngah zel khat hi in tu dong mah in Pawlpi khangnote Choir sinna ah ki hel zelzel lai hi. Tonic Solfa siam a hihmanin khat veivei a lasak te a Solfa mal in sa phei ziauziau zel a ken zong ka ciamteh zel hi. Pyidawtha Pawlpi ah Solfa siam, lasak siam laphuaksiam tampi tak om in Solfa sinna zong om zelzel a hih manin a kizang thei ding khom ciang Tonic Solfa ka siam hi.
Pilna sinna. Ka pian kum kum khat khawng ka phak ciang Pyidawtha pan Aungywa ka va teng phei uh a Tan lang, Tan khat, Tan Nih ka kah sung final Exam simin a khatna (First) ka ngah hi. Tan thum ka sim ding ciang Pyidawtha ah ciah kik leuleu in Tan 3,4,5,6 ka sim a tua sung teng in Exam ah lai hat hetlo in a tawpna lam ah kumsim phial in ka om hi. Ka Tan 6 kum lai siamlo phadeuh ka’ih ciang a ka Geometry siapa in ''Pau Khan Kam pen lai hai kei in, a nangh mahmah hi'' hong cih ciang ka maizum lua in ka khasiat bang suak gawp, a maikum tan 7 pen SDA sang ah kah in First ngah, Tan 8 Zozaang ah First, High School tan 9, 10 Thuklai ah first ngah.
1995-96 Kalay Degree College ah History Major tawh First Year ah First ngah, Second Year ciang kei bek Honours ngah in ko class pan kei bek Master zom thei suak. Yangon University pan bel biakna vai, siamsin vai le kipawlna tuamtuam ah hun tam piak zaw in lai hat nawnlo ci ding hiam mi 40 lak ah a 4 na a 5 na khawng bek ah ka om zo bek hi.
ZOL: La le Music na lunglut (uk) kipatna hong gen ve le
JKK: Ka neu lai kum 3 khawng ka phak lai a kipan in la a sasa khat ka hihna ka nu hong gen kik ciang ka nungtheih kikkik hi. Ka u nungakte 2 zong lasiam in amau sak khempeuh ka sakpih thei zel hi. Ka u Pau zong kawlla uk mahmah in a ma hangin tua hun lai (1980's) a Kawlgam sunga la minthang te ka thei kha hi. Ka nu 'n zong la tampi hong hilh hi. Ka khankhiatna Pyidawtha pawlpi hangin Solfa leh Choir cihte kei a dingin a lamdang lualo hongsuak in Choir zong ka phuak thei zel hi.
Middle School ka kah hun ciang in english la hoihsa leh ngaih ka kipan ta ihi. High School ka kahna Thuklai ah Stage show kah ka kipan a Drum tum kawmin Mangla dawng 3 ka sak leh hong ki pakta a hih manin kei zong tha ngahin ka ukna hong khang hi. 1995 kum in One Man Show (Pyidawtha), 1996 One Man Show (Pyidawtha). Baptist Churches sung Pastor Area, Association, Convention level khawng a la kidemna ah kei phuak te mah sa in Solo akhatna zong ka ngah zelzel hi. 1999 kum Chin Centenary laiin kei laphuah 3 in prizes ngah in kei solo in Second Prize ngah hi. Tua kum mahin Pyidawtha Baptist in Centenary Album hong bawl in tua pan Studio lut ka kipan hi. 2000 kum pan kipan in Yangon ah Gospel albums pawlkhat ah ka va ki hel kawikawi hi. Ka Single album ITNA LEIBA pen 2005 Febuary sung in ka bawl hi.
ZOL: Thupi mahmah ei. La leh music siam ding mah hi teh chi mai ing. Na u Pau na chih music/lasak lam ah bang tan tung ahia?
JKK: Ka u Pau pen la siam, a aw zong hoih, guitar zong a ma khop tum thei hi napin kihel khakna gina nei kha lo hi. A mau hun lai in Studio lut ding khawng ki ngaihsun ban kha lo ci ding hiam mopawi a Stage ah lasa cih ciang leh biakna pawi khawng ah va sa zel cih ciang bek mah hi mai hi.
ZOL: One Man Show na chih bang na chihna ahia?
JKK: One Man Show pen khat kia in lasa a Concert bawl cihna hi. Kawlla le Mangla sa in keima min tawh concert bawl in mi khat ciang lutman Ks. 50 ta la, mi 2000 val bangin concert hong en hi. Pyidawtha pen ka khua min hi. Zomi sinsen (minamdang kihello) inn 1000 kiim pha hi.
ZOL: OK. Ka theita. Kum bangzah na phaka la phuah kipan na hia?
JKK: Kum 15 kiim ka phak in laphuak kipan, ka pa hong nutsiatna ka khasiatna teng a mal gualin, a aw bulh in ka sak leh ka nu in hong za in "Kamno, na lasak hoih si e, nangma phuah maw?" hong ci in, "He" ka cih leh " Aw, nang la a phuah thei na hi ve le maw" hong ci hi. Tua lai a kipan laphuak thei pa cih kei le kei ka ki ciamteh hi. Pyidawtha Baptist youth la kidemna ah la phuak in sa pah a, a khatna ngah pah in lawpna le ukna hong khang tektek hi.
ZOL: La bangzah bang phuakta na hia?
JKK: Ka laphuak zah ciamteh khin kei mai ing e. Pawlpi sung khangno te lakidemna khat peuh a om ciang kei ta hong cial uh in, ken phuak in a mau pia in ken thei nawnlo zel cih dan khawng hi. A kisak kik ka zak ciang "Hi la thei ngei sing" ka cih leh kei phuak na hi gige, cih dan khawng zong om in ka laphuak Dawng 100 val ta in teh.
ZOL: Thupi mahmah ei. Dawng 100 val phuakta chih. Zomite a ding la hoih taktak tampi hong phuak lai dingin hong lamen hang. Bangchik hunin la na phuak deuha? A thu bawl masa maw a tune?
JKK: Hong kisawl leh hong ki cial a om ciang ka phuak ngun mahmah a, ahi zongin tamzaw bel ka lungsim sungah hong suak hun ciang a ka phuak tam zaw hi. A tamzaw pen a thu ding a hampi outline dan in koih in a aw ka bawl masa, a aw ka ngah khit ciang a lem ding leh a muibun dingin a thu tangzai tak in ngaihsun in bulh kik zel zaw ing. Khat veivei ciang lah a mal tung tawn in a aw ka zon kik zong om thei zel aih hang tawm zaw thamtham in teh.
ZOL: Nang bel la phuakin na la phuahte nang mah in sa hi china, midang tua bang hi khollou hi. Laphuaksiamte in sa siamlou, la sasiaamte in phuak siamlou chih bang om thei hi. Mipi in a phuaksiamte sangin a sa siamte mah ngaina zaw leh pahtawi zaw a batton om hi. Laphuaksiamte dinmun bangchi tawisang theih dingin na ngaihsun a?
JKK: Mipi in lasak siamte a ngaihnat zawk peh a hi mah ding a hi hi. La kiphuak kei le lah a saksiamte' sak ding omlo zel kawikawi ding a hih teh a mau phuak a hilo la khat peuhpeuh vai thupi na a a kisak khak hun ciang a phuakte min pulak thei le hoih sa ing.
ZOL: Na laphuahte lak ah koi hoih nasapen a?
JKK: Tu laitak a ei Zomite ka veina tawh ka at a hi " EI LE EI" pen a lamal, la aw, music te hoih sa ing, a music zong kei ma arrangement bang lian in kitum in ka lungkim abat lian loh hang hoih sa mahmah ing.
ZOL: Laphuah leh a sak ah koi nuamsa zaw?
JKK: Thu in la hi a kicih mah bangin laphuak leh lasak a nih in nuam ka sak na ki bang in teh, ka uk dan zong kikim mai e.
ZOL: Na Gospel albumte ngai kha khollou ka hi ding. Ahihhangin ITNA LEIBA bel ngai kha ing. Hoih sa peuhmah ing. I websitewww.zogamonline.com ah zong na late ki koih zek hi. A kikoih lai in ki contact na ding chih lah ki theilou ahihman in nang hong ki hilh lou hi. Bang na chi ngaih diam ah?
JKK: Hoih sa ing e. Ei mi pen tawm lai in minamdangte tatdan a ki ta thei nai samlo in maw, copy right cih khawng zong hoih tak a a ki nei zolo ki hi lai mawk in, i la hong ki ngaih sak hong ki deihsak hong ki zatsak cih pen tu ciangciang ei mi dinmun ah a lungdam huai cih ding hi e. Mai lam ah bel khua hun pai dandan in a ki khelkhel hun hong om le lah hampha sem ve ni in maw.
ZOL: ZogamOnline na veh ngai hia?
JKK: Aw.. Kei media lam tam hat mello hing ei.
ZOL: ITNA LEIBA music kua in hong tumsak, koi studio a khum?
JKK: Itna Leiba music hong tumsak te:
Guitar - Kyaw Khine (Khuppu, tun Lamka ah om),
Bass - Cin Khan Pum ( Emperor Band, a mau hun lai in Kawl gam ah top hi, tun khawl in a dang khat ah tum kik ta)
Keyboard - Tha Ghay (The Trees Band, Kayin te hi in Kawlgam ah Band tawh KB tum siam top ten ah kihel in teh)
Drums - Tokkie (T4 hun lai in tum, nidang Band minthang tampi ah ki hel, tun tam tum nawn kei)
Studio pen D Studio Yangon ah hi.
ZOL: ITNA LEIBA, EI LEH EI leh EDEN ZOGAM chihte bangkum a na phuah chihleh na phuahna background leh na phuahlai a na lungsim put nong hilh thei diam?
JKK: ITNA LEIBA cih nu le pa la pen 1997 kum khawng hi in teh, Sunday School sia ka sep lai in ITNA LEIBA cih thulu tawh Drama khat ka at a, ka sangnaupangte tawh Christmas zan hakni in Drama in ka lak uh hi. Mipi 50% bang a khitui uh luang hi. ITNA LEIBA Drama pen Video a bawl zawh ding ka ngaihsutsut hi lai mah ei..
EI LE EI pen 2005 kum a ka phuah hi. Ih Zomi sungah ki lemlohna le kipumkhat theihloh na, khat le khat ki langneihna tampitak a om ka mukha a tua thute ka ngaihsut ciang kei ommun panin na sa ngeungau in khi tui luang dedek, naam pilpel, in ka ngaihsun thei zel a, ken gen ding ci leng lah kua man hong thusim nailo ding a, bangbang hi ta leh ci in ka lungsim a om thute la in a phuak hi mai ing, a lamal lungngai leng ka ngaihsutna ki mu thei ding hi.
EDEN ZOGAM pen zong 2005 kum a ka bawl mah hi. Ih Zogam pen nidangin "Niim dildial Zogam" kici a tun niim dildial nawnlo, ankung nangawn hoih zo nawnlo, gamsa nangawn a beibei hi ta, singkung nam zong a mangmang hi ta. Guahtui le huih siangtho a kicinlohna pen i gam ki kep siamloh man hi a, Eden huan tawh a kibang ngei i Zogam pen tun keugaw ham suak ding hi ta, kem siam in gelsiam hi le hang ih Zogam in Eden huan bang kik zo lai ding hi cih ka hanthot nopna hi. ECOLOGY pen ka vei mahmah hi a, ahizong in kei naupangno khat in ka veina ka gen hang miten hong thusimsak hong ngaihsak lo ding aih ciang ci a ka gen Awareness ka piak taang a la a ka phuah hi.
ZOL: Thupi thei mahmah ei. Ei leh Ei chih na phuah a Zomi sunga kilemlouhna na chihte bangchibang kilemlouhna khong ahia neukha nong gen thei dia?
JKK: Gen ding a a kilawmlo pawl khat zong om in cin maw... Ei Zomi sung mah thauvui thautang tawh ki kap ( LAIZOM MELMA ) a luang tampi i sih lawmlawm pen na sa mahmah ing...,
Minam khat sung a Township kilamdanna, aw kaih tawm ki lamdanna, mun le mual i hong hal man a a ki it ding pipi gal le sa a i ki neih lawmlawm....,
Kawlgam Chin State sunga om teng zong ki pumkhat hi leng khut kuak khat zah zong kipha nailo kawmkal ah hi teng mahki sualsual lai lawmlawm...,
Kawlgam sung a Zomi khangno pawlkhat Zomi a hih a zum om in, Zomi vai khat pepeuh ah tha pia nuamlo awlmawh lo mawk uh hi ve aw...,
Biakna lam a ki gawm theihloh manin ih Social Community hong thanem sak zo mahmah mawk a ...,
Chin i hi a Zomi i hi a Mizo i hi zong in ki kankan leng i laizom vive na hi a maw..., hi zah liiliai ki sehsat lailai leng bang i suak zo tek zen tam maw...,
Minam le sisan tawh i ki zop pih vetloh ding minam dangte i it zawh kei le zong ei le ei beek ki it masa photphot ni....,
ZOL: Zomi sunga environment lam leh Ecology lam khong a vei a la aphuak nang kia na hilai diam chi ing.
JKK: Ih zak nailoh man a i theih nailoh a hih kei buanga leh EDEN ZOGAM simloh adang a om nailo mah hi phot lo dia maw.
ZOL: Na late English in translate in music arrangement zong a kul leh puah lai le chin na omna lam khong ah record le Zomi te music lama international level a recognize phak theihna ding potential om hiveh aw maw..
JKK: Tua zong ngaihsun kha zel ngei mah ing..., hanciam toto lai ni e.., Pasian in hong deihsak a leh piang thei lo ding a hia maw
ZOL: ZOMUS Secretary ana sem ngei na hihmanin ZOMUS tanchin tomkim hong gen ve. Koia kuate phuhkhiak, bang ngimna nei chih khong.
JKK: 2000 kum in Yangon ah Pa En Khan Nang, Rev. Thang Za Pau, Rev. Ngul Cin Thang, SB Langhno etc te in Yangon ah a phuat khiat uh hi. Zomite Music lamsang ding cih deihna hi.
ZOL: ZOMUS CONCERT Malaysia bang tupna a ki nei ahia?
JKK: Leitungbup a Zomite music a uk khempeuh pen pawlkhat a nei nuam ihihna tawh Malay a tung khinsate kiang ah ZOMUS vaihawmna nuai ah Malay ZOMUS Body kiguang a tua makai teng in hong sep uh hi. Kei bel Singapore ka om laitak a hih manin a va pha phei bek hi zaw ing. Ngiimna bel a kibang hi.
ZOL: ZOLIA CONTEST 2005 na chih zong thei nuam hang ei.
JKK: Ih Zomi a tamzaw i lungsim ah numei pen ki thusimlo kha thei zel in numei te dinmun lapsang nopna leh minamdangte in zong a na thupit sak mahmah uh na hi gige a hih manin ei Zomi sungah zong lunggulh huai ka sak na hangin kei ma ngaihsut tawm na tawh hong piangkhia hi a, innteek a sem pen Church Choir Leader and Youth Fellowship Leader ka sepna Tedim Baptist Church Yangon hi in Yangon khuapi a om Zomi Pawlpite kiangah lai kihawm in a nungak te uh hong ki dem uh a hi hi. Nungak contestant 16 ki hel a, Lia Vung Sen Lun in ZOLIA 2005 ngah hi. A maikum lam cianga bawl kik ding lunggulhna leh sponsor ding zong omkhin mah hi ven kei Singapore ah nasem a va zin in, lawmte in kei thupit sak zah a a thupi sa om khollo ih ci diam ah ki zom zo nawnlo suak phot e.
ZOL: Band/ Group a telna neikha lou maw?
JKK: Music Band& Group pen a kician om kha thei nai kei, ka neu lai One Man Show ka bawl theih lai 1996 kiim khawngin bel ka u JK Sian, Thawngpu, Liadeih, Ngaihlian cih te tawh ki Group ngei ung, tun bel tua te i manglam tawh ki bang kik ta e.
ZOL: Lasa siam na sakpen – Zomi leh Zomi lou ah?
JKK: Kei zak khakna ciang, Kawlgam sung a Zomi lasa lak pan: Pasal pan Kapno, Numei pan Sangi *Family Gospel* lasak dan siam sa pen ing. Namdang gamdang te bel siam kasak dan a tuam tek hi in gen ham sa ing, ka deih deuh bel Kawlgam pasal pan Lay Phyu, numei pan Tin Zar Maw. Mangla pan Bon Jovi, Bryan Adams.......... tampi...,
ZOL: Musician kua na ngaisang pena?
JKK: Zomi sungah bel former *Emperor Band* a Bass tum Cin Khan Pum , ITNA LEIBA a Bass hong tumsak pa mah siamsa pen ing, Za Lian bel a siam hang kei tawh kithuah kha ngeilo kaih ciang ka gen ding tam thei keng.
ZOL: Kawlgam Zomi music dinmun na muhdan
JKK: A siam le a minthang ding bek ki ut in sin kisawm kei, siam kisawm kei sa ing
ZOL India Zomi lasiamte la na ngai kha hiam? Na muhdan.
JKK: Kei ngaih khak sunsun lak pen Niangbawi * Hong zang in na deihna bangin* cih a sa nu siam sa ing a aw zong kicing sa ing.
ZOL: Tu’n koia om a bang sem na hia?
JKK: Tu laitak Vest-Torpaveien 12, 2870 Dokka, Norway ah om ing, ka nasepna pen Norway te in gambel mi *Asylum Seekers* a sanna uh zum khat ah Office Staff sem ing.
ZOL: Norway Radio ah na laphuah nasak kikhum chih ka na za a..
JKK: Non Government Organization khat a hi CARE te pen Norway a piding mahmah khat na hi gige in, kumkhat khatvei ta CARE te in NRK Telivision Program nei uh in tua a dinga la sa laphuak dinga ko omna city sunga CARE Committee te in hong seh uh hi. TV Action lian ah pen mi top 5 khawng bek a kitel hi in, kei a pen Studio zong gina tak a a kibawl hilo a hihna leh a mau zong International Level a lasiamte a hih manun quality zong a kiban zo nailo hi mai in cin top 5 lak ah ki hel zo keng. Ai zongin ka la pen NRK te khutsung a omsa a hih man in hoih a sak zawk deuh teng uh ai tam maw NRK Radio Station pan na suak sak dan uh hi.
ZOL: Norway hiam a Chin Famine Concert ah kihel kha mah the maw? Concert na muhdan tomkim hong gen ve.
JKK: Chin Famine Aid Concert ah Zomi lasa khat ka hihna tawh kihel mah ing. A’ihhang special guest hilo ka hihmanin a nop mellohna pawlpawl zong om mah hi. Kawlgam pan lasa dingin Haka 3, Falam 1 a kisam hi in mipi zong lah Haka Falam te vive hi zaw a hih man in kei tha hong pia ding om mel kei. Zola kei la mah sa ka’ihciang a a mau hong zak pih ngeilo uh hi. Ih Chin Community sung makai te ki thutuahlohna tam simsim omkhin a hihna hang ci dinghiam Zomi le a dang Chin a kici zawdeuhte kipawlkhopna ding bel tu ciangciang a hamsa mahmah tawh kibang. Ai’hhang ko a lasa teng bilbel Yangon pan a kimaingapsa vive ka hih na uh leh Artist te in kipumkhat a nasepkhop thei ding pen ka lunggulh tek na uh ki pulak ung.
ZOL: Mailam ah album bawl ding ahi hiam music lam ah bang project na nei a?
JKK: Sawm mah ing, music zong sin nuam ing.
ZOL: La phuahsiam, lasak siam, musician i hong sak leh nationalist leh laigelh siam zong ana hi gige na hi vele..
JKK: A siam hi nai keng in ka lungsim sunga om thu le la teng sang thei a, hoih a sa hi zaw ni teh... he he..lungdam!
ZOL: Tangval lai hi teh maw?
JKK: Tangval laimah ing. Val kingkeng lai ing ei ... he he
ZOL: I houlimna sim kha nungakte bangin vacancy om leh omlouh thei nuam ding uh hiven..
JKK: Nungak ong thei nuam a om le bel ki nuam mahmah ding ai ve .. he he
ZOL: Zomi khangthak la leh music lama suanhuai leh maban limchi na hihna ah music lam uk na Zomipih khangthakte bang advice ding na nei a?
JKK: Quantity sangin quality ki thupi sak zaw leh deihhuai sa ing..., lasa in i sakla guitar tawh a tum siamlo ki tam mahmah lai mawkin instruments khat hamtang siam huai sa ing. Tum siam khat nei le hang tua in i lasak i laphuak tampi tak hong huh mahmah ding a i quality hong khang ding hi. Tu ciangciang Zomi sunga laphuak le lasate a tamzaw in ih siam ma in i minthang masa thei zaw a hih manin sin kul kisa nawnlo kha thei zel a music knowledge ki haulo lua a hih manin i la te huang khat sung pan pusuak thei nai mahmah lo hi. Hanciam le hang i music luan hong ki lamdang in namdang ten zong deih ding a mipi in zong phattuam pih mahmah ding hi. Khangthak Music uk ten siam hong sawm taktak le uh deihsak hang ei.
ZOL :Hibanga ZogamOnline nong houlimpih theih manin ka lungdam mahmah uhi. Na maban, na hinkhua ah lamzanna leh lohchinna hong deihsak ung.
JKK: Kei zong hi bang a itna le pahtakna nong lahkhiat manin mi thupi tang tuam ing, lungdam angtang mahmah ing. Hih bang a online tawh Zomi sung thu kizak theihna website ih neih pen nakpi takin lungdam huai sa ing. Asem a bawl a gim a tawl te Topa'n thaman hong piaksak hen la hih ZogamOnline in mitampi i phattuamna a sem zo den ding in Pasian in thupha hong piaksak lai ta hen.
PERSONAL PROFILE Minpi :Pau Khan Kam
Min neu :JK Kam
Pa Min :Thang Ngin (deceased 1991)
Nu Min :Lam Tial (Dam lai, kum 75 phata, Pyidawtha ah)
Beh : JK (Jasuan Khupson)
Education : Thuklai High School - 1993
B.A ( Honours), Yangon University- 2002
M.A, Yangon University - 2004
Experiences :
1994,1998: Pyidawtha khua Middle school ah Teacher
1994-1999: Pyidawtha Baptist Church ah Sunday School Teacher
2000-2006 : Tedim Baptist Church-Yangon ah Church Choir Leader
2000-2006: Tedim Baptist Church-Yangon Youth Department Leader
2002-2004: Yangon Universities Zomi Siamsin Kipawlna ah Pawl Lutang(President)
2005-2006: Zomi Music Uplift Society ,ZOMUS ah Secretary
2005 September29 in ZOLIA CONTEST 2005 Yangon ah Makaipi
(Manager/Director)
2005-2006 Yangon Chins Baptist Churches Youth Fellowship ah Secretary
Hobbies : Music le kilawmtatna
Note: From ZOL: JKKam’ in Norway pan a laphuah leh sak "Care The Loving "a ngainuam khempeuh ngaih theih dingin nuaia link i taklang hi:
http://www11.nrk.no/urort/Laater/jkkam1/default.aspx
No comments:
Write comments