Kawlgam A Uk Taktak Kua Hiam?

Nung abeisa 2015 gambup kiteelpi (general election) khit ah gam ukna nei (USDP) leh NLD makaih Kumpi thakte January 2016 sungin aluite tawh panmun kilaihna nei uh a, February 1,2016 akipan mai kum (5) sung gam-ukna / thuneihnate lenin hong makaih ding uh hi. Hih a kilaih ding vai tawh kisai-in kumpi sem laitakte le a gualzo NLD (opposition party,NLD) te kikal ah makaite ahun zui in kimuhkhopna (key player) nei den uh a, lungkim huai takin vaipuak le panmunte kipia tuah dingin thuhoih vive tawh holimna nei den uh hi.

Hih bangin thuhoih lahoih vive tawh akihonate hangun Kawlgam mpite lungdam mahmah in, Kawlgam mai lam nino suak bangin nuntak gimnam kisa ciat hi. Kum tampi sung galkap thuneihna / thaumuk tawh kimakaihna panin, mipite' thuneihna tawh kimaihna/ukna thak ah kilut taktak ta ding suak ahih manin, Kumpi thak asem dingte in zong panmun limtak lak mahmah kisam dinga, tua manin March 2016 kha bei kuan ciangin nasep kipanthei pan bek ding uh hi.

Kumpi Kahthak Dingte In Bang Zah Ciang Kikhelna Piangsakzo Ding Hiam?

 

Hih thu igen ding ciangin, Kawlgam  ii thukhunpi(constitution) neih ngei thum teng igen masak kul ding hi. Kawlgam in (1947 constitution,1974 constitution leh 2008 constitution)gambup thukhunpi(3)kinei hi. Amasa penpen thukhunpi pen upadi siam kawl mipilte leh mualmi mipilte’n aminvawhna vuah, Kawl minamte aituam phattuamna dingin kigelh hi (one group show) ci’n minvawh uh hi. Anihna gambup thukhunpi pen U Ne Win leh a party Burma Socialist Program party gualtung tuanna ding bekin kigelh hi (one party show) ci leuleu uh hi. Athumna tulaitak i zat thukhunpi (2008) leuleu ciangin innkuan khat mimal khat hamphatna ding leh thuneihna ding bekin kigelh hi(one man show) ci’n i neih thukhunpi thumte akantelna pan-un upadi siam ten minvawh liang uh hi. Tua ahih manin hong tung ding kum(5) sung i kuakua in gam makaipi (president) asem zongin gam khat akhantohna dingin muibun takin asep theihlohna dingin thu tawh kikhih lingleng ahihi. Tulaitak Kawlgam ukna kilamzia ah (2008) thukhunpi siksanin kilam kikalsuansuan lai ahih mah bangin, tua kantan / palsat in bang mah kisem thei tuanlo ding ahi hi.

 

 

Gambup Dalna Leh Kepcinna Nei Council (National Defence and Security Council)

 

Hih Kipawlnapi Council ah member (11) kihel  a, tuate in; (1) Gam makaipipa/nu (president), (2)vice president-1, (3)vice president-2, (4) Galkap mangpipa, (5) Galkap mangpipa huh, (6) Mipi dawl Innpi Thuzeekpipa (speaker of house of representative/lower house), (7) Minam dawl Innpi thuzeekpipa (Speaker of House of Nationalities/ Upper House), (8) Galkap vuangyi pa(Union Minister of Defence Services), (9) Gamsung lamsai vuangyi (Union Minister of Home Affairs), (10) Gamgi lamsai vuangyi pa(Union Minister of Border Affairs le (11) Gamdang lamsai vuangyi (Union Minister of Foreign Affairs) cih bangin member / Department lianpi 11 nei uh hi.

 

 

Hih council pen gam-uk kumpi lam panin (union government) pan mihing (5) hi a, galkap mangpipa lampan ama seh mihing (6)kihel uh hi. Tuate in: Union mister of defence services, union minister of border affairs, union minister of home affairs, commander- in -chief leh deputy commander –in- chief teng uh hi a, gam-uk kumpi lam pan sangin mimal(1)tamzaw uh hi. Hih council pen kha(1) atawm pen nihvei ta bang meeting nei uh hi. Gambup vai thupi tuamtuamte ah galvai savaite hih council member teng khensatna tawh asia apha akip ahi hi. Hih council ah galkap lampan meetang (vote) (6)nei uh hi. Gam makaipipa(union president) ahih leh meekhia theilo dingin, aman thuzeekpi(chairperson) bek semthei hi a, meetang a langnih-in thukimna le thukimlohna ah meetang akikim leh bek meetang pia thei pan ding hi, cih thukhunpi ah om hi.

 

 

Tua ahih manin athupi khensatna a om sialin galkap lamte in zoden keii ding cihnopna ahi hi. A tungah i gensa vuangyi thumte ahi, union minister for defence services, union minister for border affairs leh union minister for home affairs cihte galkap mangpa in ama deihdeih sehthei ziauziau aa, president in sehtheihna thuneilo hi. Tuabanah galkap mangpipa (commander-in-chief of defence services) in gamkee state&region khempeuhah ukna lam vaipuak la dingin (minister of border affairs) khat tek,a zaneu penpen colonel level) khattek ama thu tawh ama deih bangbangin galkap khat koih thei ziauziau lai hi. Tua border affairs minister galkap pa in galkap mangpipa tawh a-ut hunhun in(direct) kihothei ziauziau-in thuzaksakna (report) pia den hi.

 

 

State&region makaipi(prime minister) te in ama uk-na gamkee (state&region) sungah thukin (gtna:Rakhine state) vai bang dante ah ama thu tawh bangmah thukhensatna piatheilo-in, hih border affair minister pa thukimpihna bek tawh galkap mangpa cih bang bangin thu kikhensat ahihi. Hih border affair minister sem galkappa pen, gamsung lamsai vuangyi pa(union minister for home affairs) pa khutnuai ah om aa, tua pa pen galkap mangpipa in ama deih bangbang akoih hilai hi. 2008 gambup thukhunpi ah, Kawlgambup aa om thautawi khempeuh in gambup galkap mangpipa(commander-in-chief of defence services) khutnuai ah om ding hi, cih thu ahihi. Gam sung cing ahi palik (Myanmar police force) khempeuh leh amakaipipa zong galkap mangpipa’ khutnuai mah ah om ahi hi. Atatak in hih palik pen (Myanmar police force) gamdang dan hi le amah le amah aki-vaisai (independent body) ding ahi hi.

 

 

2008 thukhunpi ah gam makaipi (president) in hih council member khempeuh thukimpihna tawh galkap mangpipa (commander-in-chief of defence services) khat seh ding hi, ci’n thukhunpi khenpi (324) ah ci hi. 2008 thukhunpi ah, gam makaipi(president) in gambup ii lutangpi(head of the State) gambup kumpi makaipi(head of government),avaang nei pen leh asang pen dinmun ngah hi ci napi’n, a thupi khensatna khempeuh hih atung ah i gen council member teng thukimna vote akhai uh teh  azozaw (meetang tamzaw) lam thukimna bek tawh vai kihawmthei bek ahihi.

 

 

Gam makaipipa  in ama thuneihna tawh thongkiate suahtakna pia theilo (the president has no power to grant
Amnesty) gamdang gam khat tawh gal kido ding, kilem ding khentatna pia theilo(the president has no power to declare war on other country), ama thu tawh gam khat leh gam khat kizopna khawlsak theilo (the president has no power to cut off diplomacy) leh gambup thukin tangko theihna(a state of emergency) neilo hi cih 2008 thukhunpi khenpi(204,b) na ah gen hi.

 

A khawk mahmah khat ah, gamsungah buaina mipi sona (popular uprising) nasia mahmah dingin gam sung gam lumna,ngongtatna cihte a om leh gambup makaipi(union president) in a thuneihna khempeuh(political power) kici (executive power,legislative power,judiciary power) khempeuh galkap mangpipa ka ap hi cih, lai suaksak ding aa, tua hun akipan galkap mangpipa in gam sungah daihna om ta hi ci’n kiteelpi (general election) a omsak kik dong ukna aana (sovereign power) khempeuh len ding hi. Tua pen 2008 constitution in galkapte a aituam piak hamphatna hi aa, tua bang ahih pen thutang (official) hi hilai hi.

 

 

Gambup Makaipipa (President) Sehtan Hawm theihna:

Gambup makaipi(president) ahih leh agualzo party(pyituh hluttaw&amyotha hluttaw) kigawmin teelcing taangmi (MP) khempeuh ii vote tam ngah penpenpa ahihi. Amyotha Hluttaw pan vice-president khat ki sehto aa, Pyituh Hluttaw pan vice-president khat kisehin, galkap taangmi teng aitaangin galkap mangpipa in ama deih penpen khat vice-president seh thei hi. Tua teng thum pen gambup innpi ahi Pyitaungsuh Hluttaw(Union parliament) aa teelcing taangmi khempeuh in meetang khai ding uh a, meetang a tamngah penpen gambup makaipi (president) hipah ding hi. Meetang atam ngah pen nihna pa ahih leh vice-president-1, atawm ngah penpen ahih leh vice-president-2, hi ding hi.

 

Tua khit tak teh gambup makaipipa (president) in ama deih bangbang party kibangin kibang keizong, teelcing taangmi ahih teekteek kisamlo-in ama deih bangbang vuanzii(cabinet ministers) la ding aa, tuateng in muntuamtuam (department)ah vuanzii (union minister) sem sak ding hi. Tua teng banah gualzo party ii sehtoh ahi gambup makaipi (president) in gamkee (state&region) makaipi ding(prime minister) ama deih bangbang koih ziauziau thei ding a, tua akoih makaipi (prime minister) in mun tuamtuam ah (ministry) tengah makai sem dingin ama deih bangbang makai khattek(state&region minister) koih thei leuleu ding hi. Tua banah minam innpi(amyotha hluttaw) leh mipi innpi(pyituh hluttaw) thuzekpi leh ahuh ding (speaker&deputy speaker) gambup ah tutna tam ngah penpen agualzo party ii sehtoh gambup makaipipa (president) in asehtheih banah gamkee(state&region) khempeuh innpi(parliament) ah thuzekpi leh thuzeekpi huh (speaker&deputy speaker) amau deih bangbang sehtheihna thunei hi.

 

 

Kawlgam Kumpi Kilamzia (Government System of Union of Myanmar):

 

 

Gam Ki-ukzia(government system) ahih leh presidentialism cipong uh hi. Ahi zongin, presidentialism kumpi ki-ukna azang USA te khong tawh lah kibang lozel hi. USA gamah gambup makaipi(the president of the United States of America) in gambup innpi (Congress) ii thukimsa khat ama thuneihna (Veto power) tawh hemkhia / kantan) thei hi. Tua banah gambup innpi (Congress/House of Representative & Senate) kigawm sehli suah sehthum meetang (vote) aval nak leh gambup makaipipa (President) thuneihna (veto power) nial theihna thuneihna nei zel uh hi.

 

 

Kawlgam kumpi ki-ukzia bel presidentialism hizo tatak loin, Pseu-do Presidentialism ciang bek hi ci’n gamthu lamsang thukhunsiamna nei (Consititutionalist) te'n gen uh hi. Cihnopna ah Presidentialism tatak hilo-in alang ciang(Quasi) bek hipan hi. Tua banah gambup innpi (Union Parliament) ii thukimsa thukhun khat pen gambup makaipi(president) in ama thuneihna tawh hepkhiat theihna thuneihna(veto power) gam bup thukhunpi (Constitution) in phallo hi. A thukim kei leh suaikailo (No signature) thuh lo ding cih ciang bek ahi hi. Ahi zongin gambup thukhunpi in gambup innpi (Union Parliament -amyotha hluttaw+pyituh hluttaw) ii bawlsa thukhun (law) khat pen gambup makaipi (The President of Republic of the Union of Myanmar) in mawhpuak lakna (the president is accountable for union parliament) ci ahih manin, banglo khat thunawngkai om leh gambup makaipi-in mawhpuak lakna (Accountability) neilai hi. Apiandang leuleu khatah, gambup makaipi (President) pen gambup innpi (Union Parliament) in muanlohna leh deihlohna tawh mawhmatna thusunna (Vote of no confidence) aneih uh hangin, amau deihloh mawhpaihna tawh gambup makaipipa (president) mawk khawlsak theilo bilbel zel uh hi. Tua ahih manin, gambup innpi (pyitaungsuh hluttaw/union parliament) pen thupi mahmah hi, kicithei hi.

 

 

Thukhupna:

Gam-uk makaipi(union president) in amuibun tatak thuneihna neilo aa, galkapte thukimpihna lo tawh bang bangin mipi in i teelcing taangmi (MP) a diandian uh hang mipi khut sungah gam-uk thuneihna (political power of civilian government) hong tun ding sawt simsim khat i ngak lai kul ding hi. Mual dawn aa aksipi tang kiaukiau galmuh bangin suahtakna, khantohna, itna leh pilna tawh kimakaih gam khat i suahna ding bel khangluite pau le mualmong et tawh kibang lai kha ding hi.
By: Bob Tuangpi (Mauvom)