ZAM Thupuak May 08, 2016; ZAM Thupuak Vol 10, Issue 48

UNCHR te thusiamna tawh Refugee leh Assylum Seekers te’n nat leh sat hun cianga sumlehpai lamah ih belh theih dingin REMEDI min tawh Insurance hong vaihawmsak uh hi. REMEDI pen Refugee Medical Insurance cihna hi. Nidang in hih REMEDI pen Tune Insurance te tawh a kizom hi a, tun ahileh tua kizopna hun ciangtan bei khin ahihmaninte tawh kizom ta uh hi.
TUNE Insurance te tawh a kizop hun sung un Insurance a nei Refugee te’n hamsatna pawlkhat tuak uh hi. Gentehna in Tune Insurance pen ih leizawh ni 60 khit ciangin nungta pan hi. TUNE Insurance card nei gige a Zato ah ih kilah ciangin thuneite in tua ei neih Insurance Card pen hong theihpih lo miau thei uh hi. Tua banah sum bei teng khempeuh zong ei lampanin ih piak masak kul a, tua khit ciangin TUNE te zumpi ah Zato ih kilahna laidal teng khempeuh tawh sum bei zah ih va ngetkik kul ahihmanin lampi sau in vaisah thei hi. Tua bek hi lo, khat veivei zumpi panin sum kingahkik lo thei lai hi.
RHB te ciangin tua bang om nawn lo ding hi. Insurance lei man bel tamzaw deuh cih bek hi in, a dangte ah vaisah lua cih bang om nawn lo hi. Medical Card khat hong bawlsak ding uh a, tua Card pen Bank card tawh kilamdang lua lo hi. Cihnopna ah tua Medical card pen Bank card danin sumkholna leh sumkhakna in kizangh thei cihna hi lo hi. RHB Insurance na lei khit naakleh na Medical Card sungah cinat ciang beka na zat theih dingin (Zato bek ah cihna) mimal ahileh RM 10,000 na om pah dinga, Innkuan ahileh RM 12,000 na om pah ding hi. Tua Medical card nei peuh lecin Zato na lup ding ciangin Registration Fee (RM50+) bek na piak kul dinga, tua lo Deposit cih bang nengneng nang piak kul kilkel nawn lo ding hi. Tua ahihmanin UNHCR pan a hong kivaihawmsak RHB Insurance na lei khit naak leh na leini mah in nungta pah cih thei inla, deih loh penin Zato na lup khak zenzen lezong na UN Card leh Medical Card pua khawm tangtang peuh lecin nang buai kullo in Zato te leh RHB te na kizom ziau ding uh hi. Tuabanah hih Insurance pen Refugee te leh Assylum Seekers Card (Laidal ahilo) tawi teng bek in lei thei uh hi. Midangte’n lei thei ngiat lo uh hi.
RHB Insurance tawh kisai theih huai phadiak te (GHS Kumpi zato tawh kizopna)
Hih Insurance pen Refugee leh Assylum Seeker Card (laidal hi lo) neite bek in lei thei,
GHS pen kum 16 -64 kikaal teng bek in lei thei,
Mimal lutman kum khat ai : RM 164.30/,
Innkuan (nulehpa leh kum 18 cingh lo tate thum) kum khat ai : RM 206.70/,
(Kum 18 cingh lo ta thum val a om leh a behlapna mimal khat ciangin RM 20 ta piak beh kul),
Mimal ahileh sum RM 10,000/ ciang bek kingah, tuazah a val leh nang piak ding hi ta,
Innkuan ahileh RM 12,000/ ciang bek kingah, tuazah a val leh nang piak ding hi ta,
Zato na lup leh Room saap man ni 30 ai hong piaksak ding, Intensive Care na lut leh ni 15 ai hong piaksak dinga, tua banah Siavuan zatman, van zat man, Mawtaw zatman cihte zong a vekin hong sik ding hi.
Cancer leh natnagil huh theihte ahileh bel Insurance a lei zawh ni 120 val a ngak phot kul ding hi.
PA – Personal Accident Insurance (Tuahsiatna tawh kisai ah)
PA leiman pen a tuamin RM12.20/ piak kul hi. GHS na lei leh PA zong na lei loh phamawh hi, bang hang hiam cileh ei pawl pen ih nasep hamsa ahihmanin tuahsia lo ding cih kigen thei lo hi. Ahizongin PA bek kitang lei thei lo hi cih tel ni,
Accident tuahna hangin sihna leh khantawn mibatlohna na tuak zenzen leh PA Insurance in RM 23,000 tawh hong siatvat dinga, misi innkuanpihte tungah zong gaalna RM 2000 zong kipia ding hi.
Kum 18 pan kum 64 kikaal ten lei thei,
Ih theih gige ding ah khamtheih guihtheih hanga Accident tuak, na neihsa pumpi tung or sung natna, HIV leh kumpi deih loh sepna hanga tuahsiatna cihte PA in huh het lo hi!
Tuaban ah Accident tuak a zato tung man lo, sikhaan ah kilak cihte bel ei sum piak phot kul a, tua khit ciang siavuante lai tawh RM 2000 nuailam ahileh a khuanungah PA in a beizah nang tung hong piakik ding hi.
Hih Insurance in a huhloh natna pawl khat:
Naupaai, nau suak, nau sia,
Gui awk, amah leh amah akibawlsia te,
Lungsim kicingh lo, mihai,
Pumpi sungah a tuamtuam laihna, a thak khek man beizah,
Zato ah ki-etsakna leh siavuan thudotna sum bei (zato lum lo cihna) cihte huamsak lo hi.
Dotbeh leh lei theihna munte
UNHCR Insurance Hotline – 012 330 6469 (Monday to Friday, 8am to 8pm)
PRA Assist: 011 330 19019 / 011 330 19020
Address: Suite E-09-01, Plaza Mont’ Kiara,
No.2, Jalan Kiara, Mont’ Kiara
50480 Kuala Lumpur
(Nai 24 sung / nisim kidong thei. Malay, English, Burmese leh Peter Khai om ahihman in Zomi pau zong kingah!)
RHB Insurance: 1300 220 007 (Fax – 03 2163 7277)
Address: Level 12B, West Wing, The Icon,
No. 1. Jalan 1/68F, Jalan Tun Razak,
55000 Kuala Lumpur
(Community zumte ah zong a sawt lo in Form hong ki koih ding ahihmanin kilei thei ding hi)

Sonoco Company ah nasemding pasal 20 kideih

Hihpen Company lianpikhat hi a, nasep dingpen Packing bawlding, Production Operator semding ahihi.
Nasep hun: nikhat nai 8:30 sung, Kalkhat khatvei Off
Khasum RM1000, OT naikhat RM7.86, nikhat OT nai 3
Omna pia, Transport vaihawmsak
Amun: Sungai Buloh, Sungai Chua, Rawang
Nasep alunggulh taktak te bek in hih Phone 0111 2828 482 ah min sazian hongpia un. Pawlkhat in minsazian mawkpiak uh a, ahunciang hongpailo uh ahih manin nawngkai mahmah theihi. Mi acin hunhun in Interview ni ding ZAM Facebook Page leh Thupuak cihte panin hongki zasakkik dinghi.

The Loaf Bakery ah nasep ngahte theihding

04 May ni Interview khin, nasep ngah mi 8 te pen 12 May 2016 ni in ZAM zumah zingsang 8:30am lap in navan uh tawh hongki thawipah un. Tuani Bank Card leh Typhoid zatui kisutding vaite hongki paisuakpih dinghi.

UN zumvai dawp theih nite

Mi pawlkhat te bangmah thu kankhol lopi in UN zumah a ma ut hun in gamlapi pan hongpai thei zel a, tuni mi dimkhin, ahihkeileh tuni na vai kan/dot theih ni hilo, zingciang hongpai in ci-in ki vaikhak ziau thei zel hi. Sum bei, gim leh tawl ban ah hun tampi bei a hong pai hing nacih hang phatuam lo hi. Tua ahihman in hihni te ah paitheihsawm in. IAD: Mon, Tue, Fri
RST: Mon, Wed, Fri
Zingsang 7am ma in tunsawm in. Motor tamlua cia na zekai leh nikhat a beibeh dingin theikhol pah in. ZAM zumpan inzong lai ki gelhsak theihi.

Tu kaalsung ih panpihtheih ZAM Member te

• The Loaf ah nasep mi 8 ki ngahsak
• Tualzaang pan sanggampa khat HUKM zatopi ah
• Tuilangh pan sanggamnu khat ACTS huhna ngetsak
• Mualpi pan sanggampa khat HUKM zatopi ah
• Singzung pan sanggamnu khat HUKM zatopi ah
• Kap Do nang leh Thang Nem Mung te Taste House Kitchen & Bakery ansai ah nasep guan
• Thalmual pan sanggam te khat IPR ah kibuaipih
• ZAM Member te ading UN vai UN ah laikhak 26 kigelhsak
• DS/File tuai UN ngah nailo member te tawi ding file zong ki bawl sak thei
• Valvum pan sanggamte khat IPR ah kibuaipih

Na UN vai nakan nuamhiam?

Na UN vai lunghimawh in kannop dotnop nanei hiam? UN Department tuamtuam ah lai gelhsaknop naneihleh ZAM Member te ading in pekkhatzong manngenlo in ZAM zumpan lai ki gelhsak theiden hi. UN Card hongki laksakte zong ngetkikna lai ki gelhsak theihi.

Laibu thak ki leithei

Christian Nuntakna ah a kisam theihhuai thute
Laimai 231, Laigelh Daniel Kauffman, Lailet Rev. Langh Khan Thang (D.Miss), ZAM zum ah bukhat RM10

Na UN Card Hongla In ZAM Zum Ah

Nu Nieng Ngaih Nuam (354-14C02008)
Lia Mang Dei Huai (354-14C02008)

Kimat kihen na tuahkhak leh

ZAM Card tawi te kimat kihen atuak na omkhak uhleh:
Sia Tuangpu: 016 254 4093, Sia Go Mang 018 202 1216

Lungdam Kohna

Mana Zomi Christian Church pan ZAM thupuak a ding
RM150 hongpiak manin lungdamna lianpi ih tangko hi.

Na UN Card Number lotngah sawm in

UN Card tawh akiman pawlkhat akimatphet in amante’n UN Card laksak uhhi. Zum atun ciangin amin leh Card Number abanban in dong uh a, tuamun pan UN Card Number atheilo, a lotngahlo te UN neilo, bangmah atawi vetlo in ciapteh sakziau thei uhhi. UN Card neipipi hong suaktalo, akimansuak ihcihcih tepen amau ii UN Card Number atheihloh manun kumpi theinei te’n bangmah tawilo in na ciamteh uh ahih manin thong akiasuaksuak pawlkhat omthei mawk hi. Sanggam aw, tumahmah in nang leh na innkuanpih te nakidong dih un. Na UN Card Number na theician taktak hiam? Tuabek thamlo Phone Number zong khat hamtang lotngah sawm in. Operasi aom ciangin UN tawitawh atawilo tawh alom in hongki manding hi. Tuakhit ciangin na Phone leh na vanneih khempeuh hong laksakding uh a, Phone Number khatpeuh na ciaptehtheih keileh thongsung Camp sung panin kuamah tawh ki thuza theinawnlo in na buaicip khakding hong kidahpih mahmah hi.
ZAM nabawlciang inzong nangmin tektek mahtawh na bawlding hoihzaw hi. Amin taktaklo tawh abawl te deihloh pen thongkia in innlam ciahnading Matpongtin ki vaikhakleh amin kibanglo ahih manin buaihuai mahmah a, aciahding hunin ciahtheilo in a awkcip omthei hi. Innlam ah nazat minmah tawh ZAM Card bawlzaw in.

ZAM kumcin leh Palaai kiteel hunding zaksakna

Hun leh nite hong bei zelzel a, ZAM kumcin leh palaai kiteel hunding zong hong naito hiaihiai ta hi. Tua tawh kizui in April 25 ni in ZAM kum (10) cinna khawmpi vai ding leh makai kiteelna ding vai ZAM Advisors teng tawh thu kikupna kinei thei hi. Kum (10) sung tawntung a nungta Pasian in haksatna leh gentheihna a tuamtuam sungpan hong kalsuanpih in Pasian’ hehpihna mah tawh ih Zomi Kipawlna hiciang maa a suanthei ih hihi. Makai kiteelna ding tawh kisai, akisam bangbang vaipuakna hong nei dingin anuai a Election Committee mi 7 teng kiseh hi.
Rev. Dr. Cin Sian Pau (Convener) Ph: 017 329 1810
Rev. Thawng Ngaih Khup Ph: 010 264 3312
Rev. Gin Do Khup Ph: 017 369 1478
Rev. Thang Do Khen Ph: 017 611 5622
Pa Thang Za Khai Ph: 012 621 2447
Rev. Gin Khan En Ph: 017 334 1760
Rev. Dai Sim Mang Ph: 016 6157 573
Minam itna leh veina takpi tawh hunbit a semnuam, aki piakhia nuamte hongki muak hi. Candidate akihel nuam khempeuh in atung a Committee te tungpan 01 – 31 May khakhatsung Candicate Form ki latheita hi. Theihding: Candidate alutding khempeuh Khua makai leh Pawlpi makai te theihpihna bektawh kisang dinghi.

Kumcin khawmpi & kiteelna:

Ani : 07 June 2016
Ahun : 11am – 5pm
Amun : ZAM Hall
Chief Guest: Australia pan Pu Zokhai
(ZAM Founder) zong hongki helding hi.

Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.