Tuma kum 20 lai, Pa Pau, azi Nu Cing in nusia hi. Amau ahih leh ta ngek kha 1 gual tawh akigawmin ta 3 nei uhi. Nulepa deihgawmna hangin Nu Cing tawh a kiteeng hi a, tua hun in Pa Pau pen kum 30 val pha ta hi. Kumpi nasep zum kah kawm, inn na sem kawm in a tate pantah hi.
A veng a paam, nulepa te in innkuanpih ding khat lak ding a genpih zel sam hangin Pa Pau in sang zolo hi. Ka tate kei mah in kemto suak ning ci thei zel hi. Zi nei kik ding ka hi phial zong ka hel hun ding zong nei man keng ei” ci in ciamnuih le cihtak in dawngkik thei hi. Puan gina zong silh manlo, kithawi sitset cih bang hun zong om ngei phalo in a cianghciangh ah a om a sep ding te a sep kawmkawm mahin nitum khuamial in kum ong ki vei toto hi.
Pension sang ding zum apai ciangin ciangkhut a khut sam loh hangin awn khiukheu hi. A aw ngaih lua nawnlo hi. A vunte huai in tonta hi. A bilte ah khua zakna hoih pha nawnlo hi.Tu in ahih leh Papau kum 60 phakhin ta hi. A tate zong khangcing in gual ban zo ciat uhi. A U le neupen te gamdang ah om uh a, a lai pen ahih leh Kawlgam laizang lamah kumpi nasem in a om hi.
Kawlgam gam kikhelna huhau in phone simcard te mee ki sawkna panin Pa Pau in khat a ngah hi. A ngah khit zawh nipi ni khat Biakinn ah “Ka phone deihdeih Topa in ong pia ta, tun ka tate tawh kiho thei ta ding hing, Topa tung ka lungdam lua” ci in lungdamna luankhi nul kawmsa in teci panna bang nei hi. A inn sung inn pua cilo in a pai na peuh ah a phone a pua kawikawi hi. A phone neih zawh a maitai in a lungnop tuak mahmah hi. Lametna le lawpna kician a neih lam gamtat luhek na pan kithei thei hi. Nitum, nisuah ding lawptak in a ngaklah thei hi. Adiak in a tate tawh a kiho khit ciang bangin lungnop tuak mahmah zaw lai hi.
Nikhat Pa Pau phone bawlna sai ah hong pai hi. A ipsung panin a phone ong lakhia in “lawm, ka phone a kisia ai de, tusuang teng phone ong pai nawn het kei?” ci’n phone bawlpa ong lak hi.
“Aw, a tua cih zawh sawt ta maw, Pa Pau?”
“Kha 4 kim bang hita mah inteh. Ka neih tung lam kal khat 2vei, 3vei bang hong pai pen, a sawt ciang kal khat 1vei, kal nih 1vei cih bang a ong hito. A hoih tei tam ci a, ka hu ngaihngaih leh kha 4 val bang ong pai vet nawnlo aih ciang a, ka phone akisia ta ahi diam, ka phone ka laih kul diam aci hiveng?”
“Aw, koi maw i en deh. ……” ci in phone sai pa in a etsak leh hoih sitset lai ahih lam amu hi.
“Pa Pau na phone hoih mahmah lai ei..”
“Na cih takpi maw!”
“He, ka takpi hi.”
“Tualeh bang ding a ka tate’n ong sam nawnlo uh ahi tam?” ci in khitui nul kawmsa in phonesai pan in inn lam ah damtak in ong ciah kik hi.
“Kha 4 kim bang hita mah inteh. Ka neih tung lam kal khat 2vei, 3vei bang hong pai pen, a sawt ciang kal khat 1vei, kal nih 1vei cih bang a ong hito. A hoih tei tam ci a, ka hu ngaihngaih leh kha 4 val bang ong pai vet nawnlo aih ciang a, ka phone akisia ta ahi diam, ka phone ka laih kul diam aci hiveng?”
“Aw, koi maw i en deh. ……” ci in phone sai pa in a etsak leh hoih sitset lai ahih lam amu hi.
“Pa Pau na phone hoih mahmah lai ei..”
“Na cih takpi maw!”
“He, ka takpi hi.”
“Tualeh bang ding a ka tate’n ong sam nawnlo uh ahi tam?” ci in khitui nul kawmsa in phonesai pan in inn lam ah damtak in ong ciah kik hi.
Nulepa te in tate hong it mahmah uhi. Tate neihsa, lawhsa duh man, deihgawh man hilo zaw in, tate mel muh khak bek, a aw zak khak bek tawh a lungkim khin uh ahi hi.
Sumlepai, minleza hang bekin hong it ding hileh i neulai, bangmah theihnailoh lai pek in zong ong nusia thei lel hi. Tua hi a, nulepa te tung i itna te hunpia in lak khia zel ni, cimtak kei ni.
Pate Ni, Nute ni bek ahilo nisim in Nute ni, Pate ni bangin i itna, i ngaihna te lakkhia in lungdam sak ni. Nulepate lungnop sak nading hanciam leng Pasian ciamsa lei thupha te i ngah pelmawh ding hi.
Nk Khanno (Zingsol)
Src: ZomiDaily
Comments
Post a Comment