Pa aw, pa....

"Pa aw Pa..."

Ka neulai thu hi
Ka pau theih cil hun pawl ee...
Ka NulePate in hong dot theih uh thu khat,
Nu Nu it zaw maw?  Pa Pa it zaw?
Kei dawnkik na,
"Nu Nu mah it zaw"
Ka Nu'n ka Pa en in nuihsan,
Ka Pa'n ahih leh maitai tak mahin hong en gige..
Hih a lamdang mipa' thu
Ka khuak neu lua ahi diam?
Ka ngaihsun kha kei mawk hi.

Hi bang teng zawh teh...
Khualzin in gamlapi ah tungin,
Hem lam nuih mai tampi ka tuahkhak ciang'
Ka Pa' itna nuih maitang ka mitkha ah,
Pa aw Pa...
Ka Nu it zaw ing ka cih hun lai?
Na nuih maitang na tak sinthu ahi zen diam?
Ka sinlung ah hong phawgkik veh!
Himah lo hia?
Pate I cih pen...,
A khasiatna cillum tawh valh!
A tate uh nuntakna khauvak na ding,
Phun lo, puam lo a hanciam den....

Ka neulai hun,
Innkuan kimin an kuang um khawm...
Ka ngaihsut sim'n, luankhi luang zel...
Nipi nitak an hi veh aw!
Aksa meh huan ka um khop uh'
Sasin, salungte ka Nu'n ka Pa suah den,
Ka Pa in bel....
Tua sasin, salungte balnen thiamthiam..
Ko a tateng hong hawm sak zen...
A ma ading, ak khe teng le ak ngawngguh la se,
Ka Pa kiangah...
Bang hang a guh teng bek ne na hia Pa?
Ka Pa'n nui kawm sa in,
Ken a guh limsa hi veng! hong ci,...
Hih a lamdang mipa' thu
Ka khuak neu lua ahi diam?
Ka theisiam kha kei mawk hi.

Tun ahih leh, hemlam sinthu tampi kawmkal ah,
Nunta, khuasa'n ka om kawmin,
Ka benghem ah ka Pa aw thawn!!
Pa aw, Pa...
Limsa ing na cih ak khe le ak guhte..
A lim takpi mah ahi zen diam?
Ka sin lungah hong phawngkik veh!
Himah lo hia?
Pate I cih pen...
Gentheih haksat palsat ngam,
Ei a tate nuntak nopsak nading...
Lamnop lammam hong sial sak.

Ka neulai-in, ka Nu' khut nel zaw
Ka Pa' khut pek len nuam lo'
Ham phiatphaut ci'n gen kha ngei ing,
Ka Pa'n ka biang hong nap khit teh,
Tupek khat tawh lo kuan dingin pai khia zel..
Hih a lamdang mipa' thu
Ka khuak neu lua ahi diam?
Ka thei ban kha kei mawk hi.

Tu ni in ahih leh..
Leitung nun zia,
Ka mang bang phial mawk veh, sumlepai lah lawh haksa diak..
Ka Pa' khutpek bang hang'n ham cih ka theisiam ta...
Ka sinlung ah hong phawng vat veh!
Himah lo hia? Pate I cih...
Aksi taang bang a mit ngei lo a phia sipsip...
Ei atate siksan dingin a nunna uh hong kipia zen...

Zan lam diakin, Inn ka ciah leh...
Ka gim, ka tawl hong telsiam sak,
Ka Pa in sa meh huan ding gen hiven...
Ka Pa' aw suah, ni dang bangin siang nawn lopi,
Ka Pa' hatangte zong kim nawn lopi...
Citciat ci ding maw?
Ka Nu'n aksa meh hong huan...
Ankuang um khop, ni dang zahin Innkuan kim lo,
Ka Nu'n bel a ngeina bang mahin..
Ka Pa' ading sasin, salung thuksak zel,
Ka Pa in bel...
A khut ling keuhkeuh kawmin,
Kei kuang sungah sasin, salung hong piak sawm lai..
Ka Pa' khut ling len khawmin, Pa aw nang' ne zaw in ci thei buang tang!
Ka luankhi mal gial bang hong kia, ki-ip zo keng...
Pa aw, Pa.. hong it ing ka cih kawmin,
Ka Nu' lam nga-in, "Nu aw ak khe teng le ak ngawngguh
Kei hong pia in" ka ci thei ta,
Ka Pa'n zong nuih mai kawmin hong et mu ing,
Kei mah bangin ka Pa' khitui zong luang hiven..
Ka Pa' ngawngkawi in lungdam lua in kapkhia kha ing.
Himah lo hia?
Hih a lamdang mipa' thu
Tuni in hoih phatakin ka thei siam ta hi....
Lungdam ing Pa aw, Pa..
Na khan kum khua sawt ta hen.....


Khat Thang