A beisa kum 2 kim pawl pan hong ging kiaukiau Zolai tawh Myanma Alinn (The New Light of Myanmar) kihawm ta ding, cih thu pen Hluttaw vaihawmna sabuai ah May 8 ni-in Tonzang pan MP Pu Neng Khen Pau in hong lui khia pet mah a, ih lungdam mahmah hi. Zolai tangthu thak khat hong gelhsak ahi hi. Ama’ dotna dawngin Information lam vuanzi U Paih Twe in, “Zolai tawh tua bangin Myanma Alinn hawm ding hi leng laimai 4 peuhmah aphak kul ding a, copy 15000 hawm loh phamawh ding hi. Tulaitak Zogambup ah Myanma Alinn copy 942, The Mirror (Kyaemon) copy 187 kigawm 1129 kihawm hi.
Zogambup ah Zolai tawh kumpi thukizakna lai hawm zenzen leng Zolai azang lo adangte in zong amau’ pau ciat tawh hawm dingin athu hong sung nainai thei ding hi. Zolai bek tawh hawm leng adangte thusim lohna suak ding leh lungsim kikhenna piang ding ahih manin Zolai tawh kumpi thukizakna lai hawm ding geelna om nai lo hi” ci-in gen hi.
Hih vuanzipa thugenna pen Chin World Journal Makaipi Salai Mang in May 20, 2015 ni a suak Democracy Today Journal sungah, “Chin State sungah minam neu tamlua cih sam hangin laihawm a nei taktak pen Khumi, Lai, Laizo, Zomi, Cho, Madu cih bang nam 6 khawng bek tawh kihawm khia hi. Hih thu vuanzipa in atel loh man hi ding hi. Kei muhna ah bel Hluttaw-pa thusunna pen thukim mahmah ing…” ci-in amuhna gen hi.Hih vuanzipa dawnna tungtawnin Zolai zang khempeuh, adiakin mipi tangmi ding a ih teel MP-te, kumpi nasem khempeuh leh kumpi vaihawmna sunga sungtang theite in ngaihsut ding leh hanciam lai ding tampi om ahih lam hong phawksak hi.
Hih Information lam vuanzipa’ thugenna pen Chin Media Network in zong May 23 ni-in, “Tualsuak minamte’ lai tawh kihawm thei lo ding cih pen tualsuak mite tuam bawlna leh amau’ pianpih hamphatnate khaktanna hi,” ci-in mawhpaih hi. “Hih bang a kikhaktanna pen gambup mai lam ding leh minam tuamtuamte ten khopna gam khat adingin a deih huai het lo thu hi…” ci-in 7Day News sungah Sia Sithu Aungmyint in gen hi.
Paulap cing lo tualsuak minamte tuam bawlna leh pampaihna lungsim tawh Hluttaw sabuai ah Zolai adin laitakin Zomi ulian uneu khempeuh in khuaphawk hun leh hanciam hun hong tung ta ahi hi. Zolai khang semsem hen la, kumpi vaihawmna sungah zong teek tang semsem ta hen!
Rev. Thang Van Lian
No comments:
Write comments