Rev. Dr. David Suum tangthu tawm

Rev. Dr. David Suum tangthu tawm

Zomi sung ciangbek hilo, Kawlgam bup minam tuamtuam huam in Music lamah a gamtang mi muanhuai Rev. David Go Lian David Suum @ Sia David Suum in IWS Sangpi panin Doctotrate (DWS) leh Master (MWS) Degree te, June 13, 2015 ni-in hong ngah khia ahih manin, lungdam pihna thu i pulak hi.

Sia David Suum pen i minam sungah Music lamsang mimuan huai mahmah khat hi-a, gamdang panin Master nih leh Doctorate hong ngah khia ahi hi. Kawlgambup huam in Yangon ah a hunhun in Music training zong pia zelzel hi.

Leitungbup Zomite’ kipawl khopna khat ahi GZA (Global Zomi Alliance) panin zong Music Committee ah Convener panmun bulpi len in om hi. Sia David Suum hangin i kipak hi.

Dal Sian Hung

David Go Lian Suum @ Rev. Dr. David Suum tangthu tomno

David Go Lian Suum pen Tapidaw innkuan hoih sungpan in khangkhia hi. Kum 4 aphak in apa Sia Hang Khan Pau (ATEO, Muse) in hong nusia a, anau Zam Man Niang pen a Nu gil sungah kha 2 phapan hi. Tagah in akhankhiat uh hang in a Nu in Pasian thutawh hoihtak in pan tahto hi. Aneu tungpan tan 4 hunciang dong Pasian thusung ah BYG (Baptist Youth Group) ah khangkhia a, tua pan tan 10 ciangdong apawlpi Bethel AG ah khangkhia in lawptak in kihel hi. Tan 10 azawh khit ciangin a pano Rev. Hau Lian Kham sang siapi na sepna Evangel Bible College, Yangon ah Lai Siangtho sangkah kipan a, 1997 in B.A (Bible-theology) zo in “academic award” leh “leadership award” tawh sangman khawm hi. 1997 January pan in Grace AG, Yangon ah hunbit in Pasian nasep kipan hi.

Kumlang asepkhit ciangin Philippines, Manila a om Victory Leadership Institute (tu’n Every Nation Leadership Institute tawh kilaih) sang panin “Associate degree in Advanced Christian Leadership” tawh 1998 in sangzo hi. Tua ban ah Philippine Baptist Theological Seminary, Baguio sangpi ah sangzom suak a, 2001 kum in MCM (Master of Church Music) degree (Conducting leh Ministry) major namnih leh “field education award” tawh sangman khawm hi. 2001 kum akipan in minam khempeuh, pawl nam khempeuh in Pasian phatkhop ding veina lianpi Topa in ngimna (vision) neisak hi.

Philippine pan sang aman khit ciangin apawlpi Grace AG ah ciahkik a hunbit in music director sem a, 2002 ciang in Pasian piak ngimna tawh kizui in GMI (Grace Music Institute) sang phuankhia hi. GMI pen pawl leh minam khempeuh kahtheihna music sang masa pen ahi hi. 2004 kum in a innkuanpih nu Man Zen Niang tawh pumkhat suahna nei hi. Sianu Niiang pen aneu tung pan in ukna aneih kawllam (Burmese cultural dance) tawh Pasian nasem in apasal tawh ma pangkhawm hi. 2005 December in Tedim khuapi ah Zomi Bup Pasian Phatna Pawipi (Zomi Festival of Praise), mi 4000 tawh Hallelujah Chorus lapi sakkhopna ama lunggulhna (vision) leh hanciamna tawh a piangkhia ahi hi.

2002 akipan in asang kahna Evangel Bible College ah kum 7 sung hunlang tawh “church music” hilh a, 2010 akipan in GMF (Gospel Music Festival) pawipi ah “Worship & Music director” leh GZA (Global Zomi Alliance) ah music convener sem hi. GMI music sang kum 7 aphak ciangin Pasian in Grace AG pawlpi ah pastor semding in teel beh hi. Tua hangin MEGST (Myanmar Evangelical Graduate School of Theology), Yangon ah “pastoral study” sinbeh a, 2011 in M.Div ngah hi.

Kawlpau leh Zo pau tawh phatna leh biakpiakna (live worship) te veina tawh sem hi. Zola tawh phatna le biakpiakna (live worship) te inntek pawlpi leh kipawlna tuamtuam te tawh a makaih khop CD/DVD te anuai a bang ahi hi.

1) Zeisu Pahtawi Ni (Rev Dr Chin Do Kham & Canaan Innkuan, Kaleymyo) – 2000
(Phatna le Biakpiakna kikum masa pen – CD)
2) Worship His Majesty (Agape Ministry Center, Kaleymyo) – 2006
(Kawlgam ah Zomi te live worship masa pen – CD/DVD)
3) Evangelistic Live Worship (Zomi Christian Fellowship, Malaysia) – 2007
(Malaysia ah Zomi te live worship masa pen – CD/DVD)
4) Topa Ka Phat Ding (Aizawl AG) – 2008
(India gam ah Zomi te live worship masa pen – CD/DVD)
5) Jesus Loves You (Zomi Community Church, Ft. Lauderdale, Florida) – 2009
(USA ah Zomi te live worship masa pen – CD/DVD)
6) Zeisu in Topa Hi (Rev Dr Chin Do Kham & Zomi Christian Fellowship, Tulsa) – 2011
(Tulsa a pawlpi khempeuh kigawm khawm a Pasian Pahtawina – CD/DVD)

Tua ban ah GMI music sang kum 10 aphak ciangin Pasian lampi honsakna tawh IWS (Institute for Worship Studies), USA ah anupa un sangzom a 2015 June 14 ni-in DWS (Doctor of Worship Studies) degree leh a innkuan pihnu Siama Man Zen Niiang MWS (Master of Worship Studies) tawh, anih un sang mankhawm uh hi. Zogam bek hilo, Kawlgam bup ah “worship” tawh master leh doctor ngah masa uh hi a, anupa un “Pasian biakpiakna tawh Kawlgam ah muibun tak in semding” (to impact the nation through worship ministry) cih ngimna tawh anungta uh hi.



Lungdam!