Nupa Kikal Mawhpuakna

Pasal tampi te’n a zite uh kiang ah nong zahtak ding, na lutang ka hi, Laisiangtho ah kigelh hi cithei zel uh hi. Ziten zong kei numei ka hi a nong tuaci bawlding hi kei hi, nong iit ding Laisiangtho in gelh hi ci leu leu uh hi. A nihtuak un a dik uh a, ahi zong tuadan in agen tuak tuak uhciang in tua Nupa sungah adiklo khat om cihna ahi hi. Ei leh ei mawhpuakna lamphawk kha nawnlo in koppihte mawhpuakna lam phawkzawk zel pen tuaci bang kiselna  piangsak zel hi. Tua ahihman in Pasal in amah mawhpuakna a phawk a, Numei in zong ama mawhpuakna a phawk pen thupi a Laisiangtho deihdan zong ahi hi. I koppihte mawhpuakna lam bek enlo in ei leh ei mawhpuakna lam i et kisam dinghi.

ZI IIT DING (Pasal mawhpuakna);
“Na zi banghang a itt na hia ?”cih dotna kidong leng tamtaktin melhoih man, nunnem man, dik man, hauh man, laisiam man, a haksat man, kamsiam man, a hehpihhuai man , midang a batloh man leh thu tuam tuam hang hi in genmaithei a, A khente’n bel, iit hiziau mai, a hang le ka thei tuankei ci zong om dingin lamet huai hi. Hih  igente hanga ittna ahih leh hih ittna tepen ittna dik hitheilo hi. A hihleh bang chi dan itna pen zite ading itna dik hi ding hiam? Sawltak Paul in bel eima pumpi iit bangin zite iit ding ahi hi ci a, I taksa in a naa, a vot ahihkeh asa neucik a thuak di zong kiphallo in keptheih dan teng in kikem a. Mi tampi te’n taksa kephoihna ding  sum tampi pi zang uh hi.

I damlouh ciang in zomg  dampah ut in zatui in i ki-en pah a. Tuabangin i taksa kep mah bangin pasalte’n lzong Zite kep ding cihna a hi hi. Eima taksa /pumpi iit bang a iit ding dan a hi hi. Sau genlai leng, numei tepen Pasal nakguh pan akibawl ahih manin pasal cisa mah mah ahi uh hi. Numei in pumpi dang nei in, khe nih, khut nih, lu khat…nei mah leh pasal sungpan a lakkhiat ahihman in pasal in a zi a et ciang in midang khat dan a a et ding hilo a, amah pumpi mah mah dan a, a et ding ahi. Tuadan in en leh amah taksa a iit bang in iit thei ding hi.

Laisiangtho a nupa masa pente en leng, Adam in a zi (Eve) amah taksa mahmah pan a kibawl ahi cih kithei tel mah mah a, midang dan in koih hetlo in amah guh, taksa leh pumpi mahmah dan in pom ngai hi. Adam in a zi kipatna thei mah mah a, amah apan a kibawl hi cih a theih mah bang in pasal in zong zite pen midang kuate hiam tanu zi ding aneihdan a ngaihsut mai mai ding hi lo in, Eima pumpi / taksa / ci le sa mah mah ahi cih a angaihsut ding ahi hi. Cih atheih ciangun Zite itna dikin thei dinguh hi.

Pasal tampi in zite itna piak  sang in numei mai mai ci in bangmah athu simlo tampi om a, Zite khutthak siakna a zang gige te bel eimah i ki-itt loh manleh leh mihai kipilsakte cileng ki genkhial lo ding hi. Zite simmoh bel eimah kisimmoh cihna ahi hi. Zite mudah pen eiman kimudah cihna ahi hi. Zite abawlgenthei tebel eimah akiibawl genthei cihna ahi hi. Zite avua, a gawt gige te bel eimah akigawt cihna ahi hi. Zite bangmah a simloute bel eileh ei bangmah a kisimlo cihna ahi. Tua ahih manin Pasalin az hoihtak a akep a, a iit zoh mahmah kan a hoih omlo cihna  hi.

A zi a iit zoh khop leh amah ki -iit ahihman in Pasal amah a ki-it leh ki-itloh pen a zi akepdan apan muhtheih ding cihna suak hi. Jesu in Saptuamte a iit bang a Pasal in zite iit ding ahihdan Sawltak Paul in Laisiangtho ah teltak a agen i mu hi. Jesu in Saptuamte a ding a nuntakna piakhia hi. Tua in Jesu’n Saptuamte a iit bang a zite iit ding ahihleh bel eima nuntakna sang zite  itt zawding cihna suak hi.

PASAL ZAHTAK DING (Numei mawhpuakna);
Laisiangtho ah numei in a pasal thu aman ding, zahtak ding, Pasian tung a akiniamkhiak bang a apasal tung a akiniamkhiak ding cih thupiak khauhtak mai kimu hi. Numei lutang pasal ahi a, tua ahih manin kiniamkhiak a, a lutang a zahtak pen Laisiangtho deihdan ahi hi. Laisiangtho ah Sara kiniam khiakna teltak in i mu thei a. A pasal Abraham pen ‘TOPA ’ ci in sam a, hihpen nume khempeuh in a etteh ding ahi ci in i Laisiangtho in gen hi. Numei in a pasal pen a ‘Topa’ dan a a koihtheih leh bel a
mawhpuakna zo hoih mah mah cihna ahi hi. Numeite’n a pasalte uh a ‘Topa’ dan un koih kha ngei hetlo uh a, tua ahih manin nupa kal buai kha thei zel hi. Sara etteh  ding Laisiantho in a gen pen numei teng in zuithei leh nupa kal cidam mah mah din upmawh huai mah mah hi.

Numei in a pasal a zahtak leh a gamtatna ah hong kilangkhia ding hi:
A meh huan ah – a pasal duhdan,
A sum zatdan ah – a pasal in gimtak a azon te mawkzat ngamlo ding, amah muhsa tezong apasal thulo in mawkzat ngamlo ding hi,
A kizem dan ah – pasal neihsa ahi cih a kizemdan ah kimu dinga, apasal deihlo dan in kizem lo ding hi,
A kampau ah – a pasal maizumna ding genlo ding a, apasal lamto ding hi,
Pasal dang a pol danah –  pasal dangte a polhna ah nupi ahi cih mangngilh lo ding hi,
A pasal innkuan te a kepdan ah – a pasal a zahtak leh a pasal innkuante tung ah thusiam ding hi,
Muan huaiding –  a pasal omloh kal in muanhuai ding hi,
A pasal deihdan mawk kalhlo ding – a pasal in thu a gen pen amah ngaihdan ahih ciah kei le zong su zuk zuk mawk lo ding a, nemtak in a ngaihdan gen zaw ding hi,
Thu khensatna lahna ah – a deihna ngaihsutna bel gen ding a himahle a pasal pen bangkim ah thukhensatna neisak ding hi,

Numei in pasal a zahtak theihlohna khat bel in ah, pasalte sang a tungnunzaw a ut zawk man ahi hi (pasal thuzawh ut). Eden huan apat kipan, Evi in Adam thuzawh in khelhpih hi (a pasal thu manglo in amah thu a pasal mangsak hi). Hihpen tungnunzaw tuh cihna ahi hi.  Eden huan apan ki pat numei in tungnunzaw tuh gige uh hi. Pasalte thuzawh pen numei ut lam tak ahi hi. 

Numei in a tuploh leh theihloh kal in a pasal thuzawh sawm (tungnunzaw) tuh  den kha thei hi. Numei khenkhat in a pasalte uh a ‘Topa’ uh ahihlam phawk kha lo in simmawh cih bang om tham hi. Pasalte eisang sang a naupang zaw hileh   ‘U’ kici pen zuilo in min khong a sam zat zat, pasalte haibawl, tua bek  hilo in Pasalte tung ah khutkhia ngam numei zong hawnkhat om ta hi. . Topa’n bang cin angaihsun diam? Numei in a lutang a zahtak keileh bel amah leh amah kitawlem cihna himai ahi hi. Laisiangtho  in  ‘na lutang zahtak inla thunuailut in’ a cih numeite a ding sansiam haksa mah mah  leh pom ding a thupiak ahi hi.

Numei mawhpuakna pen a lutang thu aman ding leh zahtak ding ahi hi. A tuacih zawh kei leh bel a mawhpuakna zolo cihna ahi hi. Pasalte zahtakna leh thunuai lutna ah Christian te sang in Hindu leh Muslim numeite’n a mawhpuakna uh zo mah mah uh hi. Pasian tate’n isuahtakna ineih pen zangkhial lua  deuh i hi diam.? Numei in a mawpuakna a zawh ut a leh a pasal a lutang ahi cih a theih gige a, a zahtak ding ahi.

THU KHUP NA:
Nupa kituak leh nuamsa hih theihna dingpen hih a tung a mawhpuakna zuihzawh kisam a. Pasal in zite iit ding, numei in pasalte zahtak ding. Hihpen Laisiangtho in zuitheileng cilo a, zuih ngeingei dinga thupiak ahi hi. Hihte zuihbel a haksat hun om mah mah dinghi, ahizongin i ngaih, i angkawite tung ah bel hih mawhpuakna zawh haksa hetlo ding bang hi. A hatsakding ngaihsun lo in kipaktak in zawh sawm leng Pasian in hon panpih ding a  Pasal lawhcing, Zi lawhcing kisuak ding hi.

Pasal /Numei in a kawppih te hoihlohna, chinzawh lohna lam enlo in amah mawhpuakna a zo hia cih ki-en zaw leh hoih zaw ding hi. Tua ban ah, Pasal in a zi mawhpuakna bek a et-et sang in amah mawhpuakna pen zawh sawm henla, Numei in zong  a pasal mawhpuakna bek a et-et sang in ama mawhpuakna pen zawh sawm zaw leh kilemna omzaw ding hi. Pasal in a zi kiang ah, ‘nong zahtak ding ahi’ a cih sang in ‘kon iit zo hia?’ cih thei hen la. Numei in a pasal kiang ah, ‘nong iit ding ahi’ a cih sang in ‘kong zahtak zo hia?’ ci thei gige leh bangzah takin a nupa kal uh anuam dia?

Laisiangtho pansante;
Ephe: 5: 22 -33;
Gen  : 2: 22 -23;
Eccl  : 9: 9;
1 Pet : 5: 7;

Ref - Rebuild & Restore Ministry
Translated by:
Compiled by Tuangboih Zomi